నిందితుడికి ఐఎస్ఐతో సంబంధాలు,,,,బార్క్ నకిలీ సైంటిస్ట్ కేసులో షాకింగ్ ట్విస్ట్

దేశవ్యాప్తంగా సంచలనం సృష్టిస్తోన్న బాబా అటామిక్ రిసెర్చ్ సెంటర్ (బార్క్) నకిలీ సైంటిస్ట్ కేసుపై పోలీసులు విచారణలో విస్తుగొలిపే వాస్తవాలు వెలుగులోకి వస్తున్నాయి. బార్క్ శాస్త్రవేత్తగా చలామణి అవుతోన్న ఝార్ఖండ్‌లోని జంషెడ్‌పూర్‌కు చెందిన అక్తర్ కుతుబుద్దీన్ హుస్సైన్‌ అనే వ్యక్తిని పోలీసులు అరెస్టు చేసిన సంగతి తెలిసిందే. అతడి సోదరుడు అదిల్‌ను ఢిల్లీలో అరెస్ట్ చేశారు. ఈ ఇద్దరు సోదరుల బ్యాంకు ఖాతాల్లోకి 1995 నుంచే అనుమానాస్పద రీతిలో వివిధ మార్గాల్లో నిధులు జమ అయినట్టు ముంబయి క్రైం బ్రాంచ్ పోలీసుల విచారణలో బయటపడిందని తెలుస్తోంది. మొదట్లో లక్షల్లోనూ.. 2000 సంవత్సరం తరువాత ఇవి కోట్లకు చేరుకున్నాయని గుర్తించారు.

భారత అణు వ్యవస్థలకు సంబంధించి రహస్యాలను చేర వేసినందుకు విదేశాల నుంచి ఈ మొత్తం వారి ఖాతాలకు చేరినట్టు అనుమానిస్తున్నారు. అక్తర్‌ హుస్సేనీకి చెందిన ఓ ప్రైవేటు బ్యాంకు ఖాతాలో అనేక అనుమానాస్పద లావాదేవీలు వెలుగులోకి వచ్చాయి. తాను శాస్త్రవేత్తను అని చెప్పుకున్నందుకు 2004లో అతడ్ని దుబాయ్‌ నుంచి బహిష్కరించిన విషయం కూడా వెలుగులోకి వచ్చింది. సోదరులు ఇద్దరూ ఝార్ఖండ్‌లోని తమ పూర్వీకుల నివాసాన్ని 1996లోనే విక్రయించినా తనకు తెలిసిన వారి ద్వారా నకిలీ ఐడీలను సమకూర్చుకున్నట్టు సమాచారం. తమ పేరిట ఉన్న పలు బ్యాంకు ఖాతాలను కూడా క్లోజ్ చేసినట్టు తేలింది.

అన్నదమ్ములకు పాకిస్థాన్ గూఢచారి ఇంటర్ సర్వీసెస్ ఇంటెలిజెన్స్ ( ఐఎస్ఐ )తో సంబంధాలు ఉండొచ్చని పోలీసులు అనుమానిస్తున్నారు. అంతేకాదు, ఇరువురూ పాక్‌కు వెళ్లొచ్చినట్టు కూడా అనుమానాలు వ్యక్తమవుతున్నాయి. అక్తర్‌ను ఝార్ఖండ్‌కు చెందిన మునజ్జిల్ ఖాన్ అనే వ్యక్తికి అదిల్ పరిచయం చేశాడు. మునజ్జిల్ ఖాన్ వారిద్దరికీ హుస్సైని మొహమ్మద్ ఆదిల్, నసీముద్దీన్ సయ్యద్ ఆదిల్ హుస్సైని పేర్లతో నకిలీ పాస్ట్‌పోర్ట్‌లు సిద్ధం చేశాడు. దానిపై జంషెడ్‌పూర్‌ 30 ఏళ్ల కిందట విక్రయించిన తమ ఇంటి చిరునామా ఉన్నట్టు గుర్తించారు.

తరుచూ ఐడీలు మార్చుకుంటూ అక్తర్ రహస్య జీవితాన్ని గడుపుతున్నట్టు గుర్తించారు. వీటితో సాయంతోనే అతడు విదేశీ పర్యటనలు చేశాడని భావిస్తున్నారు. అరెస్టు సమయంలో స్వాధీనం చేసుకున్న డాక్యుమెంట్లు, అణ్వస్త్రాలకు సంబంధించిన వివరాలతో పాటు పాత బ్యాంకు ఖాతాల వివరాలను పోలీసులు సేకరిస్తున్నారు. ఏయే మార్గాల్లో నిందితులకు నిధులు అందుతున్నాయో గుర్తించేందుకు విస్తృత స్థాయిలో దర్యాప్తు చేస్తున్నారు.