నా ప్రతీ కదలికను గమనిస్తున్నారంటూ....జేడీ వాన్స్‌తో పెళ్లి వార్తలపై స్పందించిన ఎరికా కిర్క్

టర్నింగ్ పాయింట్ యూఎస్‌ఏ దివంగత వ్యవస్థాపకుడు చార్లీ కిర్క్ భార్య, ఆ సంస్థ ప్రస్తుత సీఈఓ అయిన ఎరికా కిర్క్ వ్యక్తిగత జీవితంపై మీడియా నిఘా తీవ్రమైంది. ఇటీవల అమెరికా ఉపాధ్యక్షుడు జేడీ వాన్స్‌‌ ఆమెను కౌగిలించుకోగా.. ఇందుకు సంబంధించిన వీడియోలు, ఫొటోలు నెట్టింట తెగ వైరల్ అయ్యాయి. దీంతో అంతా జేడీ వాన్స్.. తన భార్య ఉషా చిలుకూరికి విడాకులు ఇచ్చి ఎరికా కిర్క్‌ను పెళ్లి చేసుకోబోతున్నారని వార్తలు వచ్చాయి. అయితే తాజాగా ఈ కామెంట్లపై ఎరికా కిర్క్ స్పందించారు. తాజాగా ఒక టీవీ ఇంటర్వ్యూలో మాట్లాడుతూ.. గట్టిగా బదులిచ్చారు.

ఎరికా కిర్క్ తన బాధను, ఆగ్రహాన్ని వ్యక్తం చేస్తూ... చార్లీ కిర్క్ హత్య కేసు విచారణలో పూర్తి పారదర్శకత అవసరమని డిమాండ్ చేశారు. "నా భర్త హత్య జరిగినప్పుడు అతడిపై కెమెరాలు ఉన్నాయి. నా కుటుంబం దుఃఖంలో ఉన్నప్పుడు కెమెరాలు ఉన్నాయి. ఇప్పుడు నాపై, నా ప్రతి కదలికపై, నా ప్రతి నవ్వుపై, ప్రతి కన్నీటిపై కెమెరాలు విశ్లేషిస్తున్నాయి" అని ఆమె భావోద్వేగంతో మాట్లాడారు. హంతకుడు టైలర్ రాబిన్సన్ విచారణలో కెమెరాలను అనుమతించాలని కోరుతూ.. "దాచడానికి ఏమీ లేదు. నిజమైన దుష్టత్వాన్ని ప్రతి ఒక్కరూ చూడాలి. ఇది భవిష్యత్తు తరాలపై ప్రభావం చూపే అంశం" అని ఎరికా స్పష్టం చేశారు.

చార్లీ కిర్క్ మరణానంతరం తక్కువ సమయంలోనే టీపీయూఎస్‌ఏ సీఈఓగా బాధ్యతలు స్వీకరించిన ఎరికాపై కొందరు వ్యాఖ్యాతలు విమర్శలు గుప్పించారు. ఈ ఉద్రిక్తత మధ్యే మిస్సిసిప్పిలో జరిగిన కార్యక్రమంలో జేడీ వాన్స్‌ను పరిచయం చేస్తూ ఎరికా చేసిన వ్యాఖ్యలు మరింత వివాదాస్పదం అయ్యాయి. "చార్లీ స్థానాన్ని ఎవరూ భర్తీ చేయలేరు. కానీ వైస్ ప్రెసిడెంట్ జేడీ వాన్స్‌లో నా భర్త పోలికలు కొన్ని కనిపిస్తున్నాయి" అని ఆమె అనడం, ఆ తర్వాత వేదికపై వాన్స్‌ను గట్టిగా కౌగిలించుకోవడం మీడియా దృష్టిని ఆకర్షించింది. ఈ ఆలింగన సమయంలో వాన్స్ చేతులు ఎరికా నడుముపై ఉండగా.. ఆమె తన చేతి వేళ్లను వాన్స్ జుట్టులో ఉంచడం అనేక ఊహాగానాలకు దారితీసింది.

నేను పెళ్లి చేసుకున్నా..

ఇంటర్వ్యూ సందర్భంగా.. తన భర్త చార్లీ కిర్క్‌కు సంబంధించిన వీడియోను చూస్తూ ఎరికా కన్నీటి పర్యంతమయ్యారు. "క్షమించండి, ఒక్క క్షణం ఇవ్వండి. నేను అతడి వీడియోను ఇంత సేపు చూడటం ఇదే మొదటిసారి" అంటూ ఆమె దుఃఖాన్ని ఆపుకోలేకపోయారు. పాశ్చాత్య నాగరికతను కాపాడటం కోసం చార్లీ కిర్క్ చేస్తున్న ఉద్యమానికి ఆమె సమ్మతి తెలిపారా అని యాంకర్ ప్రశ్నించగా.. ఎరికా కిర్క్ సున్నితంగా ఇలా సమాధానం ఇచ్చారు. నేను దేనినీ అంగీకరించలేదు, నా జీవితంలో ప్రేమించిన వ్యక్తిని మాత్రమే పెళ్లి చేసుకున్నాను అని చెప్పారు. కాగా సెప్టెంబర్ 21వ తేదీ నుంచి జరిగిన చార్లీ కిర్క్ సంస్మరణ సభలో కూడా ఎరికా కిర్క్ భావోద్వేగానికి లోనయ్యారు. చార్లీ తన ప్రాణాలు తీసిన వ్యక్తి లాంటి యువకులను రక్షించాలని కోరుకునేవాడన్నారు. అందుకే ఆ యువకుడిని తాను క్షమించినట్లు వివరించారు.