ఛత్తీస్‌గఢ్‌లో గూడ్స్‌ను ఢీకొట్టిన ప్యాసింజర్ రైలు.. 10 మంది మృతి

ఛత్తీస్‌గఢ్‌లో మంగళవారం ఘోర ప్రమాదం చోటుచేసుకుంది. బిలాస్‌పూర్ సమీపంలోని జైరామ్ నగర్ స్టేషన్‌లో ప్యాసింజర్ రైలు.. గూడ్స్ రైలును ఢీకొట్టింది. ఈ ఘటనలో ఇప్పటి వరకూ పది మంది ప్రాణాలు కోల్పోగా.. పలువురు తీవ్రంగా గాయపడ్డారు. ఘటన గురించి సమాచారం అందుకున్న రెస్క్యూ సిబ్బంది అక్కడకు చేరుకుని సహాయక చర్యలు చేపట్టారు. క్షతగాత్రులను బయటకు తీసి చికిత్స కోసం సమీపంలోని ఆసుపత్రులకు తరలించారు. మృతుల సంఖ్య ఇంకా పెరిగే అవకాశం ఉందని అధికారులు తెలిపారు. బిలాస్‌పూర్-కట్నీ రైల్వే స్టేషన్ మధ్య నవంబరు 4న సాయంత్రం 4 గంటల సమయంలో ఎదురుగా వస్తోన్న గూడ్సు రైలును కోర్బా ప్యాసింజర్ రైలు ఢీకొట్టడంతో ప్రమాదం సంభవించింది.

ప్రమాదం జరిగిన వెంటనే మెడికల్ యూనిట్, డివిజనల్ ఆఫీసర్లను రైల్వే యంత్రాంగం పంపింది. ప్రమాద తీవ్రత దృష్ట్యా ఉన్నతాధికారులు బిలాస్‌పూర్ నుంచి బయలుదేరారు. తాజా ప్రమాదంతో బిలాస్‌పూర్- హౌరా మార్గంలో ప్రయాణించే అనేక రైళ్ల రాకపోకలు నిలిచిపోయాయి. పలు రైళ్లను రద్దుచేయగా.. మరికొన్నింటిని దారిమళ్లించారు. ప్రమాదంతో ఓవర్‌హెడ్ వైరింగ్, సిగ్నల్ వ్యవస్థలు తీవ్రంగా ధ్వంసమైనట్టు తెలిపారు. ప్యాసింజర్ రైలు ఢీకొట్టిన తర్వాత దాని ఇంజిన్, బోగీలు.. గూడ్స్ వ్యాగన్లపైకి ఎక్కిన దృశ్యాలు ప్రమాద తీవ్రతను తెలియజేస్తున్నాయి. ఘటనకు సంబంధించిన పూర్తి సమాచారం ఇంకా తెలియాల్సి ఉంది.

రైల్వే అధికారులతో కలిసి ఎన్డీఆర్ఎఫ్ సిబ్బందితో కూడిన రక్షణ బృందాలు ప్రమాదస్థలానికి వెంటనే చేరుకున్నాయి. రక్షించిన క్షతగాత్రుల్లో ఓ బాలుడు ఉన్నారని అధికారులు తెలిపారు. గాయపడినవారికి రైల్లోనే మెడికల్ టీమ్ ప్రథమ చికిత్స చేసి, ఆసుపత్రికి తరలిస్తున్నారు. ప్రమాద కారణంగా రైల్వే స్టేషన్లో చిక్కుకున్న ప్రయాణికుల కోసం ప్రత్యామ్నాయ రవాణా ఏర్పాట్లు చేపట్టారు. టెక్నికల్ బృందాలు ట్రాక్, విద్యుత్ వ్యవస్థలు పునరుద్దరణ పనులు చేపట్టాయి. ఈ ప్రమాదానికి గల కారణంపై రైల్వే అధికారులు విచారణ చేపట్టారు. సాంకేతిలోపమా లేదా మానవ తప్పిదమా అనేది ప్రాథమిక నివేదికలు సూచిస్తున్నాయి. కాగా, ప్రయాణికుల సహాయార్థం రైల్వే హెల్ప్‌లైన్ నెంబరు ఏర్పాటుచేసింది. చంపా జంక్షన్: 808595652, రాయ్‌గఢ్: 975248560, పండ్రా రోడ్డు: 8294730162. ప్రమాద స్థలంలోనూ 9752485499, 8602007202 నెంబర్లను అందుబాటులో ఉంచింది.