ఆ తేదీ తర్వాత జన్మించిన వారికి ధూమపానంపై పూర్తి నిషేధం!

ప్రపంచంలోనే మొట్ట మొదటిసారిగా 'జనరేషన్ ధూమపాన నిషేధాన్ని' అమల్లోకి తెచ్చిన దేశంగా మాల్దీవులు చరిత్ర సృష్టించింది. నవంబర్ 1వ తేదీ నుంచి ఈ విప్లవాత్మక చట్టం అమల్లోకి వచ్చిందని ఆ దేశ ఆరోగ్య మంత్రిత్వ శాఖ ప్రకటించింది. ఈ నిర్ణయం ద్వారా మాల్దీవులు పొగ రహిత భవిష్యత్తుకు బాటలు వేస్తున్నట్టు ఆరోగ్య శాఖ పేర్కొంది. మాల్దీవుల అధ్యక్షుడు మొహమ్మద్ ముయిజ్జు ఈ ఏడాది ప్రారంభంలో ప్రతిపాదించిన ఈ చట్టం.. 2007వ సంవత్సరం జనవరి 1వ తేదీ తర్వాత జన్మించిన ఏ వ్యక్తైనా పొగాకు ఉత్పత్తులను కొనుగోలు చేయడం, విక్రయించడం, ఉపయోగించడం పూర్తిగా నిషేధిస్తుంది. అయితే ఈ నిషేధం పొగాకు అన్ని రకాల ఉత్పత్తులకు వర్తిస్తుందని ఆరోగ్య మంత్రిత్వ శాఖ స్పష్టం చేసింది.

పర్యాటకులకు కూడా పూర్తి నిషేధం

కేవలం స్థానిక పౌరులకే కాకుండా.. హిందూ మహాసముద్రంలో 800 కిలోమీటర్ల మేర విస్తరించి ఉన్న ఈ 1,191 పగడపు దీవుల పర్యాటక దేశాన్ని సందర్శించే విదేశీ అతిథులకు కూడా ఈ నిషేధం వర్తిస్తుంది. రిటైలర్లు పొగాకు ఉత్పత్తులను విక్రయించే ముందు కొనుగోలుదారుల వయస్సును తప్పనిసరిగా ధృవీకరించాలని చట్టం నిర్దేశించింది. మాల్దీవులు ఇప్పటికే ఇ-సిగరెట్లు, వేపింగ్ ఉత్పత్తుల దిగుమతి, విక్రయం, పంపిణీ, స్వాధీనం, వినియోగంపై పూర్తి నిషేధాన్ని కొనసాగిస్తోంది. ఈ నిషేధం వయస్సుతో సంబంధం లేకుండా అందరికీ వర్తిస్తుంది.

చట్టాన్ని ఉల్లంఘిస్తే భారీ జరిమానాలు..

ఈ చట్టాన్ని ఉల్లంఘించిన వారికి మాల్దీవుల ప్రభుత్వం కఠినమైన జరిమానాలు విధించనుంది. మైనర్‌లకు పొగాకు ఉత్పత్తులను విక్రయించిన వారికి 50,000 రుఫియాలు (భారత కరెన్సీ ప్రకారం రూ.2.88 లక్షలు) జరిమానా విధిస్తారు. వేప్ పరికరాలను ఉపయోగించిన వారికి 5,000 రుఫియాలు (భారత కరెన్సీ ప్రకారం దాదాపుగా రూ.28,000) జరిమానా పడుతుంది.

మాల్దీవులు తీసుకున్న ఈ నిర్ణయం అంతర్జాతీయ స్థాయిలో ఆసక్తిని రేకెత్తించింది. న్యూజిలాండ్ 2023 నవంబర్‌లో ఇదే తరహా చట్టాన్ని అమలు చేసినప్పటికీ.. ప్రవేశ పెట్టిన ఒక సంవత్సరం లోపే ఆ నిర్ణయాన్ని రద్దు చేసుకుంది. మరోవైపు బ్రిటన్ కూడా ఇలాంటి జనరేషన్ నిషేధాన్ని ప్రతిపాదించింది. అయితే ఆ చట్టం ఇంకా శాసన ప్రక్రియలో ఉంది. ఈ నేపథ్యంలోనే మాల్దీవుల ధైర్యపూరితమైన చర్య, ప్రపంచవ్యాప్తంగా ధూమపాన నియంత్రణ విధానాలపై చర్చను మళ్లీ తెరపైకి తెచ్చింది.