లాటరీలో రూ.60 కోట్లు గెలిచిన ప్రవాస భారతీయుడు

కన్ను మూసి తెరిచేలోగా జీవితాలు మారిపోతాయి. అప్పటి వరకు బాగున్న వారు బికారులు అవ్వొచ్చు.. బికారి కాస్త కరోడ్ పతి కావొచ్చు. కావాల్సిందల్లా అదృష్టం కలసి రావడమే. ఈమధ్య కాలంలో ఇలా లక్కు కలిసి వచ్చి.. లాటరీల్లో భారీ మొత్తాన్ని గెలుచుకుంటున్న వారి గురించి తరచుగా వార్తల్లో చదువుతున్నాం. కొన్ని రోజుల క్రితం కేరళకు చెందిన ఓ యువకుడు తల్లి బర్త్ డే నంబర్ వచ్చేలా లాటరీ టికెట్ కొనడంతో అతడిని అదృష్టం వరించిన సంగతి తెలిసిందే. అతడు రూ.240 కోట్లకు పైగా గెలుచుకున్నాడు. ఈక్రమంలో తాజాగా ఇప్పుడు మరో ప్రవాస భారతీయుడికి లక్కు కలిసి వచ్చింది. అబుదాబిలో నిర్వహించిన లాటరీలో అతడు ఏకంగా రూ.60 కోట్లకు పైగా గెలిచాడు. ఆ వివరాలు..

యూఏఈలో నివాసం ఉంటున్న ఓ ప్రవాస భారతీయుడిని అదృష్టం వరించింది. అబుదాబి లో నిర్వహించే ప్రముఖ లాటరీ అయిన ‘బిగ్‌ టికెట్‌ అబుధాబి 280’ సిరీస్‌లో అతడు ఏకంగా రూ.60 కోట్లకు పైగా గెలిచాడు. ఆ వ్యక్తి పేరు శరవణన్‌ వెంకటాచలం. అతడు గత అక్టోబర్ 30న ‘463221’ నంబరుతో ఉన్న టికెట్‌ను కొన్నారు. ఇక తాజాగా ఈ లాటరీకి సంబంధించి లక్కీ డ్రా తీయగా.. శవరణన్ కొన్న టికెట్‌ను అదృష్టం వరించింది. రూ.60.42 కోట్లు (25 మిలియన్ల దిర్హామ్‌లు) గెలుచుకున్నారు. ‘బిగ్‌ టికెట్‌ అబుదాబి’ పేరుతో ఇక్కడ తరచుగా లక్కీ డ్రా తీస్తుంటారు.

బిగ్‌ టికెట్‌ అబుదాబి 280 సిరీస్‌కు సంబంధించి నిన్న అనగా నవంబర్ 3న డ్రా తీశారు. దీనిలో వెంకటాచలం కొనుగోలు చేసిన టికెట్‌కు జాక్‌పాట్‌ తగిలింది. వెంకటాచలం లాటరీలో రూ.60 కోట్లు గెలిచారనే విషయం అతడికి చెప్పడం కోసం షో నిర్వాహకులైన బౌచ్రా, రిచార్డ్‌.. శరవణన్‌ని ఫోన్‌లో సంప్రదించారు. కానీ ఆయన అందుబాటులోకి రాలేదు. చాలా సార్లు ఫోన్ చేసినప్పటికీ.. శరవణన్ మొబైల్ స్విచ్ఛాఫ్ అనే వస్తుందని నిర్వాహకులు తెలిపారు. అయితే ఈమెయిల్‌ ద్వారా శరవణన్‌ని సంప్రదిస్తామని వెల్లడించారు. గత సిరీస్‌ విజేత అయిన హరూన్‌ సర్దర్‌ నూర్‌ ఈసారి లక్కీ డ్రా తీశారు.

అయితే ఈ సంవత్సరం ఫిబ్రవరిలో కేరళకు చెందిన ఓ వ్యక్తి అబుదాబి లాటరీ 271వ డ్రాలో రూ.59 కోట్లు గెలిచిన సంగతి తెలిసిందే. అతడు కొనుగోలు చేసిన 100వ టికెట్‌కు లాటరీ తగిలింది. 19 సంవత్సరాల క్రితం ఉపాధి నిమిత్తం అబుదాబి వెళ్లిన ఆ వ్యక్తి.. గత పది సంవత్సరాలుగా ఇలా లాటరీ టికెట్లు కొనుగోలు చేస్తూ తన అదృష్టాన్ని పరీక్షించకోగా.. చివరకు అతడు కొన్న 100వ టికెట్‌కు లాటరీ తగిలింది.