సుప్రీం తీర్పు ముందు ట్రంప్ వార్నింగ్ – US ఎకానమీకి పెద్ద షాక్?"

అమెరికా అధ్యక్షుడు డోనాల్డ్ ట్రంప్ అమెరికా ఆర్థిక వ్యవస్థ కుప్పకూలిపోతుందని హెచ్చరించారు. ముఖ్యంగా అమెరికా సుప్రీం కోర్టు ఒక కీలక తీర్పు ఇవ్వబోతున్న సమయంలో ట్రంప్ చేసిన వ్యాఖ్యలు అంతర్జాతీయ వర్గాల్లో తీవ్ర చర్చనీయాంశమయ్యాయి.ఇటీవల అమెరికా సుప్రీం కోర్టు, అధ్యక్షుడు ట్రంప్ చైనా, భారత్ సహా పలు దేశాలపై భారీ టారిఫ్‌లు విధించిన నిర్ణయం తన అధికార పరిధిలోకే వస్తుందా, లేక అధికారం మించి తీసుకున్న నిర్ణయమా అన్న అంశంపై విచారణ జరుపుతోంది. కోర్టు తీర్పు ట్రంప్ నిర్ణయాలకు వ్యతిరేకంగా వస్తే, అధ్యక్షుడి వాణిజ్య అధికారాలపై పరిమితులు విధించే అవకాశం ఉందని నిపుణులు చెబుతున్నారు.అయితే ట్రంప్ మాత్రం కోర్టు తన అధికారాలను తగ్గించే విధంగా తీర్పు ఇస్తే, “అమెరికా ఆర్థిక వ్యవస్థ కుప్పకూలిపోతుంది” అని గట్టి హెచ్చరిక జారీ చేశారు. ఆయన ప్రకారం, తాను తీసుకున్న టారిఫ్ పెంపు నిర్ణయాల వల్ల అమెరికా ప్రభుత్వ ఆదాయం గణనీయంగా పెరిగిందని, దేశ ఆర్థిక స్థితి బలపడిందని చెప్పారు.తాజాగా CBS ‘60 Minutes’ ఇంటర్వ్యూలో మాట్లాడుతూ ట్రంప్, “కోర్టు నా టారిఫ్ అధికారాలను రద్దు చేస్తే, అమెరికా ఎకానమీ గో టు హెల్ అవుతుంది” అంటూ తీవ్ర వ్యాఖ్యలు చేశారు. తన టారిఫ్ పాలసీ వల్ల అమెరికా స్టాక్ మార్కెట్ భారీ లాభాలను సాధించిందని ఆయన పేర్కొన్నారు.ఇక సుప్రీం కోర్టు మాత్రం ట్రంప్ ఈ టారిఫ్ నిర్ణయాలను ఇంటర్నేషనల్ ఎమర్జెన్సీ ఎకనామిక్ పవర్స్ యాక్ట్ (IEEPA) పరిధిలో తీసుకున్నారా, లేక తన అధికారాలను మించి వ్యవహరించారా అనే అంశాన్ని పరిశీలిస్తోంది. అధ్యక్షుడిగా ట్రంప్ దాదాపు 90 దేశాలపై టారిఫ్‌లు పెంచి ప్రపంచ వాణిజ్య వాతావరణాన్ని కుదిపేశారు. ముఖ్యంగా చైనాపై 145 శాతం వరకు, భారత్‌పై సుమారు 50 శాతం టారిఫ్‌లు విధించారు.ఈ చర్యల వల్ల అమెరికా ప్రభుత్వానికి దాదాపు 90 బిలియన్ డాలర్ల అదనపు ఆదాయం లభించిందని, గత ఏడాదితో పోలిస్తే టారిఫ్ ఆదాయం 242 శాతం పెరిగిందని సమాచారం.అయితే సుప్రీం కోర్టు తీర్పు ట్రంప్‌కు వ్యతిరేకంగా వస్తే, అమెరికా ప్రభుత్వం కంపెనీలకు టారిఫ్ పేరిట వసూలు చేసిన డబ్బును తిరిగి చెల్లించాల్సిన పరిస్థితి ఏర్పడవచ్చు. ఇది అమెరికా ఆర్థిక వ్యవస్థకు, అంతర్జాతీయ మార్కెట్లకు భారీ దెబ్బ అవుతుందనే ఆందోళన వ్యక్తమవుతోంది.