ఈ కారణాల వల్లే బ్రెయిన్ స్ట్రోక్ వస్తుంది, నిర్లక్ష్యం చేస్తే ప్రాణాలే పోతాయ్

ప్రజెంట్ జనరేషన్‌లో ప్రతీ ఒక్కరూ జాబ్ చేస్తున్నారు. దీంతో తినే ఆహారం దగ్గర్నుంచీ లైఫ్‌స్టైల్ రొటీన్ వరకూ అన్నీ కూడా అన్‌హెల్దీగా మారిపోయాయి. ముందులా ప్రశాంతంగా కూర్చుని మాట్లాడుతూ తినే తీరిక ఎవరికీ లేకుండా పోయింది. ఉదయం లేట్‌గా లేవడం, హడావిడిగా పనులు చేయడం, వర్కౌట్ చేయడానికి కూడా టైమ్ ఉండకపోవడం క్షణాల్లో రెడీ అయిపోయి ఆఫీస్‌లకి వెళ్ళడం, ఇక తినే విషయంలో బయట ఏది ఈజీగా దొరుకుతుందో అది తినడం, లంచ్ టైమ్‌లో కూడా బయట నుంచి ఆర్డర్ పెట్టుకోవడం, సాయంత్రం దాటి రాత్రి వరకూ ఆఫీస్‌ల్లో కుర్చీలకి అతుక్కుపోయి వర్క్ చేయడం, ఇంటికి రాగానే ఇన్‌స్టంట్‌గా ఏదైనా తిని ఫోన్ చూడడం, లేట్‌గా నిద్రపోవడం మళ్లీ రిపీట్. మనలో 90 శాతం మంది జనాలు ఇప్పటికీ ఇలాంటి లైఫ్‌స్టైల్‌నే లీడ్ చేస్తున్నారు. దీని వల్లే స్ట్రోక్ వంటి సమస్య వస్తుంది. ఇది ఒక్కసారి వచ్చిందంటే అంగవైకల్యం, మరణానికే దారి తీయడం వంటివి జరుగుతున్నాయి. అసలు ఈ సమస్య నాలుగు ముఖ్య కారణాలతో వస్తుందని చెబుతున్నారు నిపుణులు. వాటిని అవాయిడ్ ప్రాణాలకే ప్రమాదమైన స్ట్రోక్‌ నుంచి తప్పించుకోవచ్చు.

హై బ్లడ్ ప్రెజర్

అధిక రక్తపోటు ఎన్నో సమస్యలకి మూలకారణంగా మారుతుంది. హైబీపి అనేది రక్తనాళాలని దెబ్బతీసి స్ట్రోక్ ప్రమాదాన్ని పెంచుతుంది. దీంతో అవి ఇరుగ్గా, బలహీనంగా మారతాయి. ఇది ఇస్కీమిక్ స్ట్రోక్స్‌కి లేదా హెమరేజిక్ స్ట్రోక్స్‌కి కారణమవుతుంది. అందుకే, బ్లడ్ ప్రెజర్‌ని ఎప్పటికప్పుడు కంట్రోల్ చేసుకోవడం మంచిది. ఎందుకంటే ఇది ఎలాంటి లక్షణాలు లేకుండానే ఉంటుంది. హైబీపితో బాధపడేవారు ఎప్పటికప్పుడు బ్లడ్ టెస్టులు చేయించుకోవడం చాలా ముఖ్యం.

సరిలేని లైఫ్‌స్టైల్, డైట్

ముందుగా చెప్పుకున్నట్లు వండుకోవడానికి తినడానికి కూడా టైమ్ లేకపోయే సరికి చాలా మంది బయట దొరికే నోటికి రుచిగా అనిపించే ఆయిలీ, స్పైసీ ఫుడ్స్‌ని ఇష్టపడుతున్నారు. ఇందులో ట్రాన్స్‌ఫ్యాట్, కొలెస్ట్రాల్ సిరల్లో కొవ్వు పేరుకుపోయేలా చేసి రక్తప్రవాహాన్ని అడ్డుకుంటుంది. స్ట్రోక్ ప్రమాదాన్ని పెంచుతుంది. అదే విధంగా నిద్రలేకపోవడం, వర్కౌట్ చేయకపోవడం కూడా సమస్యకి కారణాలే.

ధూమపానం, మద్యపానం

నేటి కాలంలో చాలా మంది చిన్నవయసులోనే ఫ్యాషన్‌కో, లేదా ప్రెజర్ నుంచి రిలీఫ్ అవ్వడానికో స్మోకింగ్‌, డ్రింకింగ్‌కి అలవాటు పడ్డారు. ఇది వారి బాడీపై ఎక్కువగా ఎఫెక్ట్ చూపిస్తుంది. దీంతో చిన్నవయసులోనే స్ట్రోక్ వంటి ప్రమాదకరమైన సమస్యలొస్తాయి. సిగరెట్ పొగ శరీరంలోని సిరలని బలహీనపరుస్తుంది. రక్తాన్ని చిక్కగా చేస్తుంది. అడ్డంకుల ప్రమాదాన్ని పెంచుతుంది. ఆల్కహాల్ కారణంగా బీపి పెరుగుతుంది. ఈ రెండు అలవాట్లు శరీరాన్ని లోపలి నుండి బలహీనపరుస్తాయి.

ఒత్తిడి

చాలా మంది ఎక్కువగా స్ట్రెస్‌కి గురవుతారు. దీనివల్ల బాడీలో కార్టిసాల్ అనే హార్మోన్ పెరుగుతుంది. రక్తపోటు, చక్కెర స్థాయిలను ప్రభావితం చేస్తుంది. దీర్ఘకాలికంగా ఒత్తిడిని ఎదుర్కునేవారికి స్ట్రోక్ ప్రమాదం ఎక్కువగా ఉంటుంది. కాబట్టి, మీ బాడీతో పాటు మనసుని రిలాక్స్ చేసుకుని ఒత్తిడి లేకుండా చూసుకోండి.

వీటితో పాటు

వయసు పెరగడం

ఫ్యామిలీలో ఎవరికైనా సమస్య ఉండడం

పొల్యూషన్‌లో ఎక్కువగా గడపడం

వైరల్ ఇన్ఫెక్షన్స్ వంటి కారణాల వల్ల స్ట్రోక్ వంటి ప్రమాదం పెరుగుతుంది. కాబట్టి, వీటన్నింటిని కంట్రోల్ చేసుకోవడం మర్చిపోవద్దు.