అమెరికాలో ఉగ్యోగాల కోత, 20 ఏళ్లలో ఇదే అధికం.. ఒక్క నెలలో 1.5 లక్షల జాబ్స్ ఉఫ్

గత కొంత కాలంగా పెద్ద పెద్ద కంపెనీలు ఉద్యోగాల్లో కోత విధిస్తున్నాయి. అమెరికాలో ఒక్క అక్టోబర్‌లోనే 1,53,074 ఉద్యోగాలు తొలగిస్తున్నట్లు వివిధ కంపెనీలు ప్రకటించడం పరిస్థితి తీవ్రతకు అద్దం పడుతోంది. గత 20 ఏళ్లలో ఒక నెలలో ఇంత భారీ మొత్తంలో ఉద్యోగాల కోత విధించడం ఇదే మొదటిసారి కావడం గమనార్హం. ఏఐ రాకతో పరిశ్రమలు పనిచేసే తీరులో విపరీతమైన మార్పులు వస్తుండంతో.. చాలా కంపెనీలు కాస్ట్ కట్టింగ్‌లకు దిగుతున్నాయి. అందులో పది కంపెనీలు వేలాది మంది ఉద్యోగులను తొలగిస్తున్నాయి. దీంతో మున్ముందు ఇంకెన్ని ఉద్యోగాలు పోతాయో అన్న భయాందోళనలు నెలకొన్నాయి.

ఛాలెంజర్, గ్రే అండ్ క్రిస్మస్ నివేదిక ప్రకారం.. ఈ అక్టోబర్‌లో ఉద్యోగాల కోత సెప్టెంబర్‌లో (54,064) కంటే 183 శాతం ఎక్కువ. గతేడాది అక్టోబర్‌తో పోలిస్తే ఉద్యోగుల తొలగింపులు 175 శాతం పెరిగాయి. ఈ ఏడాది ఇప్పటివరకు 10,99,500 ఉద్యోగాల్లో కోత విధించాయి. గతేడాది ఇదే కాలం కంటే ఇది.. 65 శాతం ఎక్కువ. ఇక 2020లో కొవిడ్ మహమ్మారి తర్వాత అత్యధికంగా ఉద్యోగాల్లో కోత విధించాయి కంపెనీలు. టెక్నాలజీ వేర్ హౌసింగ్ రంగాల్లో మాత్రం ఉద్యోగాల కోత ట్రెండ్ తక్కువగా కనిపించింది. అక్టోబర్‌లో ఈ రంగంలో 450 వ్యక్తిగత ఉద్యోగాల తొలగింపులు ప్రకటించాయి కంపెనీలు. అయినా సెప్టెంబర్‌లో 400లతో పోలిస్తే ఇది ఎక్కువే.

ఎందుకిలా జరుగుతోంది..

కొవిడ్ సమయంలో నియామకాలు ఒక్కసారిగా పెరిగాయని.. ఆ కంపెనీలు ఇప్పుడు మళ్లీ ఉద్యోగాల్లో కోతలు విధిస్తున్నాయని వర్క్‌ప్లేస్ నిపుణుడు ఆండీ ఛాలెంజర్ తెలిపారు. ఏఐ వాడకం పెరగడం, డిమాండ్ తగ్గడం, కార్పొరేట్ ఖర్చులను తగ్గించడం కోసం కూడా కంపెనీలు ఉద్యోగాల్లో కోత విధిస్తున్నాయన్నారు. అంతేకాకుండా కొత్త నియామకాలను కూడా నిలిపివేస్తున్నాయని తెలిపారు. అయితే నివేదిక ప్రకారం.. చాలా కంపెనీలు కాస్ట్ కట్టింగ్ చేయడం కోసం ఉద్యోగాల్లో కోత విధిస్తున్నట్లు చెప్పాడి. దాదాపు 50,437 మంది ఉద్యోగాలు ఇదే కారణం వల్ల పోయాయి. ఇక రెండో కారణం ఏఐ. దీని వల్ల అక్టోబర్‌లో 31,039 మంది ఉద్యోగాలు కోల్పోయారు. ఆటోమేషన్, కంపెనీ పునర్‌వ్యవస్థీకరణలో భాగంగా కంపెనీలు 48,414 ఉద్యోగాల్లో కోత విధించినట్లు నివేదిక పేర్కొంది.

ఇక నాన్ ఫ్రావిట్ రంగానికి ప్రభుత్వ నిధులు ఆగిపోవడంతో.. ఈ ఏడాది 27,651 ఉద్యోగులను తొలగించింది. గతేడాదితో 5,329 పోలిస్తే 419 శాతం ఎక్కువ. ఇటీవల అమెజాన్ 14 వేల ఉద్యోగాలు తొలగిస్తున్నట్లు ప్రకటించింది. ఇది కంపెనీ వర్క్‌ఫోర్స్‌లో 4 శాతం. యూనైటెడ్ పార్సిల్ సర్వీస్ 48,000 ఉద్యోగాల్లో కోత విధించింది. ఇంటెల్ (20 వేలు), మైక్టోసాప్ట్ (6 వేలు), సేల్స్‌ఫోర్స్ (4 వేలు), మెటా (600 ఏఐ డివిజన్‌లో), అప్లైడ్ మెటీరియల్స్ ( 1,400), చెగ్ (388 ఏఐ వల్ల) రివియన్ (600) ఉద్యోగాల్లో కోత విధించాయి. ఇవే కాకుండా ప్రముఖ కార్పొరెట్ కంపెనీలు.. స్టార్‌బక్స్, డెల్టా ఎయిర్ లైన్స్, కార్‌మ్యాక్స్, మోల్సన్ కూర్స్ బెవెరేజ్, పారామౌంట్ స్కైడ్యాన్స్, గూగుల్, పేకామ్, స్మార్ట్‌షీట్, హ్యాండ్‌షేక్.. వంటి కంపెనీలు కూడా ఉద్యోగాల్లో కోత విధించాయి.