62 ఏళ్లుగా ఒక్క క్షణం కూడా నిద్రపోని వ్యక్తి, ,,,,సైన్స్‌కు అంతుచిక్కని రహస్యం

మానవ శరీరం, మెదడుకు నిద్ర ఎంత అవసరమో సైన్స్ చెబుతున్న ప్రతి వాదనను పటాపంచలు చేస్తూ వియత్నాంకు చెందిన 81 ఏళ్ల రైతు థాయ్ న్గోక్ జీవిస్తున్నారు. వియత్నాంలోని క్వాంగ్ నామ్ ప్రావిన్స్‌కు చెందిన న్గోక్.. తాను గత 62 ఏళ్లుగా అంటే 1962 నుంచి ఒక్క క్షణం కూడా నిద్ర పోలేదని చెబుతున్నారు. ఆయన కథనం ప్రపంచవ్యాప్తంగా శాస్త్రవేత్తలను, ప్రజలను ఆశ్చర్యానికి గురిచేస్తోంది.

జ్వరం తర్వాతే నిద్ర లేని జీవితం..

న్గోక్ 20 ఏళ్ల వయసులో ఉన్నప్పుడు ఆయనకు తీవ్రమైన జ్వరం వచ్చింది. దాన్నుంచి కోలుకోవడానికి కూడా చాలానే సమయం పట్టింది. అయితే అదృష్టవశాత్తు ఈ జ్వరం తగ్గిపోయింది. కానీ ఆ జ్వరంతో పాటు నిద్రపోయే సామర్థ్యాన్ని కూడా న్గోక్ కోల్పోయారు. ఎంత ప్రయత్నించినా ఆయన నిద్ర పోలేకపోయారు. దీంతో పడుకోవడానికి ఆయన ఎన్నో మందులు వాడారు. ఇంటి చిట్కాలు ప్రయత్నించారు. నిద్ర కోసం మద్యం కూడా సేవించారు. కానీ ఏదీ పని చేయలేదు. దీంతో ఆయన నిద్రపోవడం మానేశారు. ఈ విషయాన్ని నేరుగా న్గోక్‌యే వెల్లడించగా.. ఆయన కుటుంబ సభ్యులు కూడా ఈ విషయం నిజమేనని తెలిపారు. గత ఆరు దశాబ్దాలుగా ఆయన నిద్రపోవడం తామెప్పుడూ చూడలేదని చెప్పారు.

మానవుడు కొన్ని రోజులకు మించి నిద్ర లేకుండా జీవించలేరని, నిద్ర లేకపోతే జ్ఞాపక శక్తి, రోగనిరోధక శక్తి, మానసిక సామర్థ్యాలు దెబ్బతింటాయని శాస్త్రీయ పరిశోధనలు చెబుతున్నాయి. కానీ న్గోక్ మాత్రం సాధారణంగా జీవిస్తున్నారు. పలుమార్లు వైద్యులు పరీక్షించినప్పటికీ.. ఆయన రక్తపోటు, గుండె, మెదడు పనితీరు సాధారణంగానే ఉండటం వైద్య నిపుణులను తీవ్ర గందరగోళానికి గురిచేస్తోంది.

న్గోక్ దినచర్య చాలా చురుకుగా ఉంటుంది. ఆయన ప్రతిరోజు తమ పొలంలో కష్టపడి పని చేస్తారు. భారీ బరువులను మోస్తారు. అలాగే బియ్యపు వైన్‌ను తయారు చేస్తారు. అంతేకాకుండా రాత్రుళ్లు కూడా గ్రామస్థులతో కబుర్లు చెబుతూనే ఉంటారు. ప్రముఖ అమెరికన్ ట్రావెల్ యూట్యూబర్ డ్రూ బిన్స్కీ 2023లో న్గోక్‌ను కలిసి.. ఆయన దినచర్యను గమనించారు. బిన్స్కీ రాత్రంతా ఆయనతోనే గడిపినప్పటికీ.. న్గోక్ నిరంతరం ఏదో ఒక పనిలో నిమగ్నమై ఉండటం చూసి ఆశ్చర్యపోయారు. న్గోక్ రోజుకు సుమారు అర లీటరు బియ్యపు వైన్‌ను తాగుతారని.. అలాగే దాదాపు 70 సిగరెట్లు తాగుతారని బిన్స్కీ వీడియోలో పేర్కొన్నారు. ఈ అలవాట్లు ఉన్నప్పటికీ.. ఆయన చురుకుదనం, సంతృప్తితో ఉండటం విశేషం.

న్గోక్ కథనం సోషల్ మీడియాలో వైరల్ కావడంతో ఆయన శారీరక బలాన్ని కొందరు ప్రశంసించగా, మరికొందరు యుద్ధ పోస్ట్ ట్రామాటిక్ స్ట్రెస్ కారణంగానే ఆయన ఈ పరిస్థితిని ఎదుర్కొంటున్నారని భావిస్తున్నారు. ఈ అసాధారణ జీవనం, మానవ శరీరం సామర్థ్యాన్ని ప్రశ్నిస్తూ, ప్రపంచవ్యాప్తంగా ఒక అద్భుతంగా నిలిచింది.