'బాలల దినోత్సవం నాడే 'నేషనల్ చైల్డ్‌'ను బాధించాం.. క్షమించండి': బీజేపీ పోస్ట్ వైరల్

దేశవ్యాప్తంగా బాలల దినోత్సవం సందర్భంగా పిల్లలకు శుభాకాంక్షలు వెల్లువెత్తుతున్న వేళ.. అస్సాం రాజకీయాలు అనూహ్య వివాదంలో చిక్కుకున్నాయి. అస్సాం బీజేపీ అధికారిక సోషల్ మీడియా పేజీ చేసిన ఒక వ్యంగ్య ట్వీట్ ఇప్పుడు పెను దుమారం రేపుతోంది. ఈ ట్వీట్‌లో.. జాతీయ బాలల దినోత్సవం నాడే అనుకోకుండా.. "నేషనల్ చైల్డ్‌"‌ను బాధించామని పేర్కొన్నారు. దీంతో ఇది కాస్తా వైరల్‌గా మారింది. ముఖ్యంగా రాహుల్ గాంధీని ఉద్దేశించే బీజేపీ ఈ ట్వీట్ చేసినట్లు అంతా భావిస్తున్నారు.

"జాతీయ బాలల దినోత్సవం సందర్భంగా 'జాతీయ బిడ్డ' (National Child)ను బాధపెట్టినందుకు మేము హృదయపూర్వకంగా క్షమాపణలు చెబుతున్నాము. ఇది నిజంగా దురదృష్టకరం" అంటూ అస్సాం బీజేపీ అధికారిక ఖాతా నుంచి ట్వీట్ చేసింది. ఈ ట్వీట్‌లో ఉపయోగించిన 'జాతీయ బిడ్డ' అనే పదం.. ప్రతిపక్ష నేత, కాంగ్రెస్ నాయకుడు రాహుల్ గాంధీని ఉద్దేశించి చేసినట్లుగా భావిస్తున్నారు. ఇందుకు సంబంధించి ఫొటోలను ఎడిట్ చేస్తూ.. సదరు పోస్టు కింద కామెంట్లు కూడా పెడుతున్నారు. ముఖ్యంగా ప్రధాన మంత్రి నరేంద్ర మోదీ.. రాహుల్ గాంధీని తన ఒళ్లో పడుకోబెట్టుకుని పాలు తాగిస్తున్నట్లుగా, రాహుల్ గాంధీని చిన్న పిల్లాడిగా చూపిస్తూ మీమ్స్ వైరల్ చేస్తున్నారు.

బీహార్ అసెంబ్లీ ఎన్నికల ఫలితాల్లో కాంగ్రెస్ పార్టీకి ఘోర పరాజయం ఎదురైన నేపథ్యంలోనే బీజేపీ ఈ రకమైన వ్యంగ్యాస్త్రాలు విసిరినట్లుగా తెలుస్తోంది. ఎవరూ ఊహించని విధంగా ఎన్డీఏ 209 స్థానాల్లో ముందంజలో సాగుతుండడం.. కాంగ్రెస్ కేవలం నాలుగు సీట్లలోనే ఆధిక్యం కొనసాగించడంతో.. రాహుల్ గాంధీ తీవ్ర నిరాశకు గురయ్యారు. ఈక్రమంలోనే బీజేపీ ఈ విధమైన కామెంట్ చేస్తూ.. రాహుల్ గాంధీపై విమర్శలు కురిపించినట్లు విశ్లేషకులు భావిస్తున్నారు.

అస్సాం బీజేపీ చేసిన ఈ ట్వీట్‌పై కాంగ్రెస్ నాయకులు తీవ్ర స్థాయిలో మండిపడుతున్నారు. గెలుపు, ఓటములు సహజం అని వివరిస్తూనే.. బీజేపీ ఏ స్థాయిలో దిగజారిపోయిందో చెప్పడానికి ఇది నిదర్శనం అని వివరిస్తున్నారు. బాలల దినోత్సవం రోజున కూడా దేశ నాయకుడిని వ్యక్తిగతంగా కించపరచడం విపరీత ధోరణి అంటూ చెప్పుకొస్తున్నారు. బీజేపీ వెంటనే ఈ ట్వీట్ డిలీట్ చేసి, రాహుల్ గాంధీకి క్షమాపణలు చెప్పాలని డిమాండ్ చేస్తున్నారు. ఈ ట్వీట్ చూస్తే మరి మీకేమనిపిస్తుందో కామెంట్ల రూపంలో తెలియజేయండి.