బర్గర్ తిని వ్యక్తి మృతి.. ఇలా చనిపోయిన మొట్టమొదటి వ్యక్తి అతడే

బీఫ్ బర్గర్ తిన్న ఓ వ్యక్తి మృతి చెందడం తీవ్ర కలకలం రేపుతోంది. అరుదైన ఆల్ఫా గాల్ సిండ్రోమ్ కారణంగానే ఆ వ్యక్తి చనిపోయినట్లు పరిశోధకులు గుర్తించారు. అమెరికాకు చెందిన 47 ఏళ్ల వ్యక్తి.. గతేడాది బర్గర్ తిని అస్వస్థతకు గురయ్యాడు. టిక్ అనే పురుగు కాటు వేయడం ద్వారా సంక్రమించే అరుదైన అలర్జీ వచ్చిన వారు బీఫ్‌ను తినడం వల్ల వచ్చే ఈ ఆల్ఫా గాల్ సిండ్రోమ్ కారణంగా ప్రపంచంలో చనిపోయిన మొట్టమొదటి వ్యక్తి ఇతడే అని పరిశోధకులు తేల్చారు. 2024లో న్యూజెర్సీలో వ్యక్తి ఒక బార్బెక్యూ రెస్టారెంట్‌లో బీఫ్ బర్గర్ తిన్న తర్వాత అతడికి అలెర్జీ వచ్చింది. ఇక బర్గర్ తిన్న కొద్ది గంటల తర్వాత.. అతడికి వాంతులు కావడం మొదలయ్యాయి.

అనాఫిలాక్సిస్ (తీవ్రమైన అలర్జీ) కారణంగా ఆ వ్యక్తి మరణించారు. వర్జీనియాలోని యూవీఏ హెల్త్ పరిశోధకుల బృందం.. ఆ వ్యక్తి చనిపోయిన ఘటనకు సంబంధించిన కేసును అధ్యయనం చేసి.. ఈ మరణానికి కారణం ఆల్ఫా గాల్ సిండ్రోమ్ అని నిర్ధారించింది. దురదృష్టవశాత్తూ.. మరణించిన సమయంలో అతడి లక్షణాలను డాక్టర్లు అనాఫిలాక్సిస్‌గా గుర్తించలేకపోయారని పేర్కొంది. ఈ సిండ్రోమ్‌కు చికిత్స లేనందున.. అలర్జీ ఉన్నవారు బీఫ్ ఉత్పత్తులను పూర్తిగా నివారించాలని పరిశోధకులు సిఫార్సు చేశారు.

ఈ వ్యక్తికి గాలక్టోస్ ఆల్ఫా 1,3 గాలక్టోస్ అనే చక్కెర పదార్థానికి అలర్జీ ఉందని ముందుగానే తెలుసని పరిశోధకులు గుర్తించారు. ఈ చక్కెర పదార్థం బీఫ్‌లో ఉంటుందని.. అయితే గతంలో అతడిని టిక్ అనే పురుగు కాటు వేయడం ద్వారా ఈ అలెర్జీ వచ్చినట్లు తెలిపారు. మొదట్లో అతడు ఎలా మరణించాడు అనేది తెలుసుకునేందుకు డాక్టర్లు ఎంత ప్రయత్నాలు చేసినా దానికి కారణం దొరకలేదు. గుండెపోటు లేదా ఇతర ప్రాణాంతక సమస్యలకు సంబంధించి ఎలాంటి లక్షణాలు లేకపోవడంతో.. పోస్ట్ మార్టం నివేదికలో దీన్ని ఆకస్మిక మరణంగా పేర్కొన్నారు.

పరిశోధనలో నిర్ధారణ

వర్జీనియాలోని యూవీఏ హెల్త్ పరిశోధకుల బృందం ఈ కేసును చాలా లోతుగా అధ్యయనం చేసింది. వారు తమ పరిశోధనల ఫలితాల నివేదికను 'ది జర్నల్ ఆఫ్ అలెర్జీ అండ్ క్లినికల్ ఇమ్యునాలజీ: ఇన్ ప్రాక్టీస్'లో ప్రచురించారు. క్షీరదాల మాంసాన్ని తీసుకోవడం ద్వారా సంభవించిన ఆల్ఫా గాల్ సిండ్రోమ్ కారణంగా మొట్టమొదటి మరణ కేసు ఇదే అని తాము గుర్తిస్తున్నట్లు ఆ రీసెర్చ్ రిపోర్ట్‌లో వెల్లడించారు. ఇక ఈ అల్ఫా గాల్ సిండ్రోమ్‌ను కనుగొన్న డాక్టర్ థామస్ ప్లాట్స్ మిల్స్ మాట్లాడుతూ.. దురదృష్టవశాత్తూ ఆ సమయంలో వారు దీన్ని అనాఫిలాక్సిస్‌గా గుర్తించలేకపోయారని.. అందువల్ల దాన్ని బీఫ్‌తో అనుసంధానించలేకపోయారని పేర్కొన్నారు.

ఏజీఎస్ చికిత్స, నివారణ

ఆల్ఫా గాల్ సిండ్రోమ్‌కు ప్రస్తుతం ఎలాంటి చికిత్స లేదని డాక్టర్లు, పరిశోధకులు వెల్లడించారు. అయితే ఈ సిండ్రోమ్ ఉందని అనుమానం ఉన్నవారు పరీక్ష చేయించుకోవచ్చని.. ఈ పరిస్థితి ఉన్నవారు అలర్జీని నివారించడానికి అన్ని రకాల బీఫ్ ఉత్పత్తులను పూర్తిగా నివారించాలని పరిశోధకులు సూచించారు.