అమల్లోకి కొత్త లేబర్ కోడ్స్.. తగ్గనున్న చేతికొచ్చే వేతనం

కేంద్ర ప్రభుత్వం ఇటీవల ఉద్యోగులు/కార్మికులకు సంబంధించి కీలక ప్రకటన చేసింది. ప్రస్తుతం అమల్లో ఉన్న 29 కార్మిక చట్టాల స్థానంలో.. నాలుగు కొత్త కార్మిక కోడ్స్‌ను కేంద్ర ప్రభుత్వం తీసుకొచ్చింది. 2025, నవంబర్ 21 నుంచి ఇవి అమల్లోకి వచ్చాయి. కొత్త కార్మిక చట్టాలతో.. కార్మికులు, ఉద్యోగులు, గిగ్ వర్కర్స్, ఫిక్స్‌డ్ టర్మ్ ఎంప్లాయీస్, అసంఘటిత రంగ కార్మికులు ఇలా అందరికీ మేలు చేసేలా తెచ్చినట్లు కేంద్రం ప్రకటించింది. మరింత మెరుగైన సామాజిక ఉద్యోగ భద్రత అందుతుందని హామీ ఇస్తోంది. కొత్త కార్మిక చట్టాల నేపథ్యంలో.. ఉద్యోగులకు వేతన గణనలో కూడా కీలక మార్పు చోటు చేసుకోబోతోంది. మొత్తం వేతనంలో అలవెన్సులు 50 శాతానికి మించొద్దని కొత్త నిబంధనలు చెబుతున్నాయి. ఈ క్రమంలోనే.. శాలరీ స్ట్రక్చర్‌లో మార్పులు వస్తే.. దానికి అనుగుణంగానే ఉద్యోగులకు చేతికి అందే వేతనం తగ్గుతుందని నిపుణులు అంచనా వేస్తున్నారు.

29 కార్మిక చట్టాల స్థానంలో.. వేతనాల కోడ్- 2019, సామాజిక భద్రతా కోడ్- 2020, పారిశ్రామిక సంబంధాల కోడ్- 2020, వృత్తి భద్రత, ఆరోగ్యం, పని పరిస్థితుల కోడ్- 2020 ను కేంద్రం తీసుకొచ్చింది. ఈ కార్మిక చట్టాలకు సంబంధించి పూర్తి మార్గదర్శకాల్ని 45 రోజుల్లో కేంద్రం వెలువరించనుంది. ఈ నిబంధనలకు అనుగుణంగా.. అప్పుడు ఉద్యోగుల శాలరీ విధానంలో కంపెనీలు.. మార్పు చేసుకోవాల్సి ఉంటుంది.

కొత్త కార్మిక కోడ్స్‌లో వేతనాల విభాగాల్లో వేతనం అనే పదాన్ని నిర్వచించారు. ఇక్కడ అలవెన్సులు 50 శాతానికి మించొద్దు. అంటే బేసిక్ పే (కనీస వేతనం), డియర్‌నెస్ అలవెన్స్ (డీఏ), రిటైనింగ్ అలవెన్స్ 50 శాతం వరకు ఉండాలి. ఇప్పట్లో చాలా కంపెనీలు.. బేసిక్ ప్లస్ డీఏను తక్కువగా చూపిస్తూ.. అలవెన్సుల రూపంలోనే ఎక్కువ చెల్లిస్తుంటాయి. ఇప్పుడు కొత్త చట్టం ప్రకారం.. వేతనాల గణన మార్చాల్సి వస్తుంది. అంటే ఇక్కడ వేతనం పెరిగినప్పుడు.. ఆ మేర పీఎఫ్ కాంట్రిబ్యూషన్ కూడా పెరుగుతుంటుంది. ఈ క్రమంలోనే చేతికొచ్చే వేతనం తగ్గుతుందన్నమాట. అప్పుడు రిటైర్మెంట్ తర్వాత వచ్చే మొత్తం సహా గ్రాట్యుటీ కూడా ఎక్కువ మొత్తం లభిస్తుంది. కాబట్టి.. చేతికి అందే వేతనం తగ్గుతుందని బాధపడొద్దు.

ప్రస్తుతం బేసిక్ పేలో 12 శాతం పీఎఫ్ కిందికి వెళ్తుంది. ఇక్కడ వేతనం పెరిగితే.. ఆ మేర పీఎఫ్ మొత్తం కూడా పెరగాల్సి ఉంటుంది. ఇంకా గ్రాట్యుటీని కూడా వేతనం ఆధారంగానే లెక్కిస్తారు కాబట్టి ఈ మొత్తం కూడా పెరుగుతుంది. సవరించిన వేతన విధానం వల్ల చేతికి అందే వేతనం (బై హ్యాండ్ శాలరీ) తగ్గినా కూడా.. రిటైర్మెంట్ సమయంలో వచ్చే ప్రయోజనాలు పెరుగుతాయని నిపుణులు చెబుతున్నారు.