కరెంట్ కనెక్షన్ ఇక మరింత సులభంగా

కరెంట్ కనెక్షన్ కావాలంటే ఇకపై ఓ కంగారు పడిపోవాల్సిన పని లేదు. విద్యుత్ కార్యాలయాల చుట్టూ ప్రదక్షిణలు అస్సలు అవసరం లేదు. విద్యుత్ కనెక్షన్ కోసం అధికారుల చుట్టూ తిరగాల్సిన తిప్పలూ ఇక ఉండవు. ఇక అదనపు ఛార్జీల మాటే లేదంటోంది ఏపీ విద్యుత్ శాఖ. ఇందుకు కారణం ఏపీ ఎలక్ట్రిసిటీ రెగ్యులేటరీ కమిషన్ తీసుకువచ్చిన సంస్కరణలే. కేంద్ర ప్రభుత్వం, అలాగే రాష్ట్ర ప్రభుత్వ ఆదేశాలతో ఏపీఈఆర్‌సీ విద్యుత్ కనెక్షన్ల విషయంలో తాజాగా కొన్ని సంస్కరణలు తీసుకువచ్చింది. దీంతో పైన చెప్పుకున్న బాధలు, ఇబ్బందులు అన్నీ తప్పనున్నాయని అధికారులు చెప్తున్నారు.

కొత్త ఇంటికి కరెంట్ కనెక్షన్ కావాలన్నా, కొత్తగా విద్యుత్ కనెక్షన్ తీసుకోవాలన్నా ఇక మరింత సులభమని అధికారులు చెప్తున్నారు. అలాగే విద్యుత్ స్తంభం నుంచి ఇళ్లు 30 మీటర్ల కంటే ఎక్కువ దూరం ఉంటే.. కొత్తగా కరెంట్ స్తంభాలు ఏర్పాటు చేసేందుకు అయ్యే ఖర్చును ఇన్ని రోజులూ ఆ ఇంటి యజమానులే భరించాల్సి ఉండేది. కరెంట్ కనెక్షన్ కోసం దరఖాస్తు చేసుకున్న తర్వాత.. విద్యుత్ సిబ్బంది క్షేత్ర స్థాయిలో పరిశీలన చేసిన తర్నాత.. ఈ మొత్తాన్ని నిర్ణయించేవారు. వీటికి అదనంగా డెవలప్‌మెంట్ ఛార్జీలు, సర్వీస్ లైన్ వంటివి అదనంగా వసూలు చేసేవారు. కరెంట్ సిబ్బంది అనధికారికంగా వసూలు చేసే పైకం దీనికి ఎక్స్‌ట్రా. అయితే ఇకపై వీటికి చెల్లుచీటీ పడనుంది. ఏపీ ఎలక్ట్రిసిటీ రెగ్యులేటరీ కమిషన్‌ కొత్త విద్యుత్తు కనెక్షన్ల జారీలో తెచ్చిన సంస్కరణలతో వీటికి చెక్ పడనుంది.

 ఏపీ ఎలక్ట్రిసిటీ రెగ్యులేటరీ కమిషన్‌ సంస్కరణల ప్రకారం.. కొత్త కనెక్షన్, అదనపు లోడ్‌ కేటగిరీ ఆధారంగా ఛార్జీలు నిర్ణయిస్తారు. అలాగే అదనపు ఛార్జీలు అనేవి ఉండవు. గృహావసరాల విద్యుత్ కనెక్షన్లు (ఎల్‌టీ) అయితే కిలోవాట్‌కు రూ.1,500 చెల్లించాల్సి ఉంటుంది. అలాగే ఒక కిలోవాట్ నుంచి 20 కిలోవాట్ల వరకూ అదనంగా ప్రతి కిలోవాట్‌కు రెండు వేల చొప్పున చెల్లించాల్సి ఉంటుంది. 20 కిలోవాట్ల నుంచి 150 కిలోవాట్ల వరకు ప్రతి కిలోవాట్‌కు 12 వేల 600 చొప్పున చెల్లించాల్సి ఉంటుంది. ఇక వాణిజ్య కనెక్షన్ల విషయానికి వస్తే కిలోవాట్‌ కరెంట్‌కు రూ.1,800, 20 కిలోవాట్ల విద్యుత్ వరకు అదనంగా ప్రతి కిలోవాట్‌కు అదనంగా2 వేలు చెల్లించాల్సి ఉంటుంది. అలాగే 20 కిలోవాట్ల నుంచి 150 కిలోవాట్ల వరకు ప్రతి కిలోవాట్‌కు 12,600 చొప్పున చెల్లించాల్సి ఉంటుంది.