9 నెలల్లోనే వివేక్ రామస్వామి ఆస్తులు డబుల్

భారతీయ అమెరికన్ వ్యాపారవేత్త, రాజకీయ నాయకుడు వివేక్ రామస్వామి ఆర్థికంగా అద్భుతమైన విజయాన్ని సాధించారు. ఫోర్స్ నివేదికే ఈ విషయాన్ని వెల్లడించింది. ముఖ్యంగా ఆయన నికర సంపద కేవలం తొమ్మిది నెలల వ్యవధిలోనే దాదాపు రెట్టింపు అయినట్లు పేర్కొంది. మార్చిలో సుమారు 1 బిలియన్ డాలర్లుగా ఉన్న ఆయన ఆస్తుల విలువ... తాజాగా 80 శాతం పెరుగుదలతో 1.8 బిలియన్ డాలర్లకు చేరుకున్నట్లు వివరించింది. రాజకీయాల్లో క్రియాశీలకంగా ఉంటూ.. తీవ్ర విమర్శలను, వివాదాలను ఎదుర్కొంటున్నప్పటికీ ఆయన సంపద ఈ స్థాయిలో పెరగడం విశేషం.

రామస్వామి సంపదలో ఈ భారీ వృద్ధికి ప్రధాన కారణం.. ఆయన స్థాపించిన పాత ఫార్మాస్యూటికల్ కంపెనీ రోయివెంట్ సైన్సెస్. 2014లో రామస్వామి స్థాపించిన ఈ సంస్థకు చెందిన ఓ అనుబంధ కంపెనీ.. ఇటీవలే స్వయం-రోగనిరోధక వ్యాధి డ్రగ్‌కు సంబంధించి ఫేజ్ 3 ట్రయల్‌లో సానుకూల ఫలితాలను ప్రకటించింది. ఈ ఫలితాల కారణంగానే మార్కెట్‌లో కంపెనీ విలువ ఒక్కసారిగా పెరిగిపోయింది. రోయివెంట్‌లో రామస్వామికి ఉన్న సుమారు 49 మిలియన్ షేర్ల వాటా విలువ ఇప్పుడు 1 బిలియన్ డాలర్లుగా మారిపోయింది. రోయివెంట్ మాత్రమే కాకుండా.. 2020లో ఆయన సహ-స్థాపించిన చాప్టర్ అనే స్టార్టప్ కూడా ఆయన సంపదకు మరో వనరుగా మారింది.

రామస్వామి తన రాజకీయ ప్రయాణంలో అనేక కీలక ఘట్టాలను చవిచూశారు. 2024 అధ్యక్ష ఎన్నికల్లో పోటీ చేసేందుకు సిద్ధం అయ్యారు. ఇందుకోసం తన సొంత డబ్బులో నుంచి 26 మిలియన్ డాలర్లను ఖర్చు చేశారు. కానీ ఆ తర్వాత పోటీ నుంచి తప్పుకుని అందరికీ షాక్ ఇచ్చారు. అయితే ప్రస్తుతం ఆయన వచ్చే ఏడాది నవంబరులో జరగబోయే ఒహాయో గవర్నర్ ఎన్నికల్లో రిపబ్లికన్ అభ్యర్థిగా పోటీ చేసేందుకు సిద్ధమవుతున్నారు. ఈ ఎన్నికల ప్రచారం మధ్య కూడా ఆయన సంపద పెరగడం గమనార్హం. ఆయన ఎన్నికల ప్రచారానికి కేవలం 200,000 డాలర్లు మాత్రమే లోన్ ఇవ్వగా.. జూలై చివరి వరకు మొత్తం 9.7 మిలియన్ డాలర్లు సమీకరించారు.

డోనాల్డ్ ట్రంప్ నుంచి ఆయనకు బలమైన మద్దతు లభించింది. రామస్వామి గవర్నర్ ఎన్నికల అభ్యర్థిత్వానికి ట్రంప్ మద్దతిస్తూ.. ఆయన 'సమ్‌థింగ్ స్పెషల్' అని ప్రశంసించారు. అయినప్పటికీ రాజకీయంగా వివేక్ అనేక వివాదాలను ఎదుర్కొన్నారు. హెచ్-1బీ వీసాలపై ఆయనకున్న వైఖరి, హిందూ వ్యతిరేకత, రిపబ్లికన్ పార్టీలో అంతర్గత విమర్శలను కోరడం వంటి అంశాలపై ఆయనపై పెద్ద ఎత్తున విమర్శలు వచ్చాయి. అయినప్పటికీ.. ఈ వివాదాలేవీ ఆయన ఆర్థిక వృద్ధిని అడ్డుకోలేకపోయాయి. ఇవన్నీ గుర్తించిన ఫోర్బ్స్.. రామస్వామి వివాదాల మధ్య కూడా త్వరగా పుంజుకోగల సామర్థ్యం ఉన్న వ్యక్తి అని అభివర్ణించింది.