బుర్ఖా ధరించి పార్లమెంటుకు వచ్చిన మహిళా సెనేటర్.. సస్పెండ్ చేసిన స్పీకర్

ఆస్ట్రేలియా రాజకీయాల్లో తరచుగా వివాదాలకు కేంద్ర బిందువుగా ఉండే 71 ఏళ్ల సెనేటర్ పౌలిన్‌ హాన్‌సన్ మరో వివాదంలో చిక్కుకున్నారు. ముఖ్యంగా పార్లమెంటుకు బుర్ఖా ధరించి రావడంతో ఆమె తీవ్ర పరిణామాలు ఎదుర్కొన్నారు. ఈ చర్యను అగౌరవకరమైన నిరసనగా భావించిన తోటి సెనేటర్లు.. ఆమెపై కఠిన చర్యలు తీసుకున్నారు. ఫలితంగా ఆమెను వచ్చే ఏడాది ఫిబ్రవరిలో మళ్లీ సమావేశాలు ప్రారంభమయ్యే వరకు పార్లమెంటు నుంచి సస్పెండ్ చేశారు.

బుర్ఖా ధరించడంపై నిరసన..

వలస వ్యతిరేక, ముస్లిం వ్యతిరేక వన్‌ నేషన్‌ పార్టీకి నాయకురాలైన హాన్‌సన్.. ఆస్ట్రేలియాలో బుర్ఖాను, ముఖాన్ని పూర్తిగా కప్పి ఉంచే వస్త్రాలను నిషేధించాలని డిమాండ్ చేస్తూ ఒక బిల్లును ప్రవేశ పెట్టారు. అయితే తోటి సెనేటర్లు ఆ ప్రతిపాదనను చర్చకు కూడా అంగీకరించకపోవడంతో.. దీనికి నిరసనగా ఆమె సోమవారం రోజున తల నుంచి పాదం వరకు కప్పి ఉంచే బుర్ఖా ధరించి సెనేట్‌లోకి వచ్చారు. ఈ చర్యను సెనేట్‌లో ఒక నాటకీయ స్టంట్‌గా తోటి సెనేటర్లు అభివర్ణించారు. ఆదిలోనే సెనేట్ ఆమెను ఆ రోజు సమావేశాల నుంచి సస్పెండ్ చేసింది.

అయితే పౌలిన్ హాన్‌సన్ తన చర్యకు క్షమాపణలు చెప్పడానికి నిరాకరించడంతో.. మరుసటి రోజు సెనేట్ ఒక తీర్మానాన్ని ఆమోదించింది. ఈ తీర్మానం ప్రకారం.. ఆమెను వరుసగా ఏడు సెనేట్ సిట్టింగ్ రోజుల నుంచి బహిష్కరించారు. 27వ తేదీ అంటే గురువారంతో ఈ ఏడాది సెనేట్ సమావేశాలు ముగుస్తుండగా.. ఆమె సస్పెన్షన్ వచ్చే ఏడాది ఫిబ్రవరిలో పార్లమెంటు తిరిగి ప్రారంభమయ్యే వరకు కొనసాగుతుంది.

తనపై తీసుకున్న చర్యపై సెనేటర్ హాన్‌సన్ తీవ్రంగా స్పందించారు. "వారు బుర్ఖాను నిషేధించడానికి అంగీకరించరు. కానీ అదే బుర్ఖాను నేను ధరించి పార్లమెంటుకు వచ్చినా అంగీకరించరు. పార్లమెంటులో ఎలాంటి అధికారిక డ్రెస్ కోడ్ లేనప్పటికీ.. నేను ధరించడానికి అనుమతించలేదు. ఇది ద్వంద్వ నీతి" అని ఆమె ఆవేదన వ్యక్తం చేశారు. సెనేట్‌లో ఈ చర్యపై తీవ్ర చర్చ జరిగింది. మలేషియాలో జన్మించిన సెనేట్ ప్రభుత్వ నాయకురాలు పెన్నీ వాంగ్.. హాన్‌సన్ చర్య దాదాపు 10 లక్షల మంది ముస్లింల మతాన్ని అపహాస్యం చేసిందని, ఆస్ట్రేలియా సామాజిక ఐక్యతను దెబ్బతీస్తుందని ఆరోపించారు. హాన్‌సన్ గతంలో 2017లో కూడా ఇదే విధమైన నిరసన ప్రదర్శించినప్పటికీ.. అప్పుడు ఆమెపై ఎలాంటి చర్య తీసుకోలేదు. ఈ చర్యలు ఆస్ట్రేలియాలో ముస్లింలు, వలసదారుల పట్ల వివక్షను పెంచుతున్నాయని ముస్లిం సెనేటర్లు విమర్శించారు.