వన్డే ర్యాంకింగ్స్‌లో మళ్లీ టాప్‌లోకి ,,,,టీమిండియా స్టార్ బ్యాటర్ రోహిత్ శర్మ

టీమిండియా మాజీ కెప్టెన్, స్టార్ బ్యాటర్ రోహిత్ శర్మ .. మరోసారి ఐసీసీ ర్యాంకింగ్స్‌లో సత్తాచాటాడు. తన కెరీర్‌లోనే తొలిసారిగా గత నెలలో ఐసీసీ వన్డే ర్యాంకింగ్స్‌లో అగ్రస్థానానికి చేరిన అతడు.. వారం క్రితం ఆ ర్యాంక్‌ను కోల్పోయాడు. న్యూజిలాండ్‌కు చెందిన డారిల్‌ మిచెల్.. రోహిత్‌ను వెనక్కి నెట్టి అగ్రస్థానానికి చేరాడు. తాజాగా హిట్‌మ్యాన్ మరోసారి టాప్‌లోకి దూసుకెళ్లాడు. దక్షిణాఫ్రికాతో వన్డే సిరీస్ ప్రారంభానికి ముందు నంబర్ వన్ వన్డే బ్యాటర్‌గా నిలిచాడు.

పాకిస్తాన్ కంటే కిందకు దిగజారిన భారత్.. వరల్డ్ టెస్టు ఛాంపియన్‌షిప్ పాయింట్స్ టేబుల్‌లో టీమిండియా స్థానం ఇదే

ప్రస్తుతం రోహిత్ శర్మ ఖాతాలో 781 రేటింగ్ పాయింట్లు ఉన్నాయి. దీంతో అతడు వన్డే ర్యాంకింగ్స్‌లో అగ్రస్థానానికి వచ్చాడు. గతవారం ఈ జాబితాలో టాప్‌లో నిలిచిన.. న్యూజిలాండ్ ఆటగాడు డారిల్ మిచెల్ రెండో స్థానానికి పడిపోయాడు. అతడి ఖాతాలో ప్రస్తుతం 766 ర్యాంకింగ్ పాయింట్లు ఉన్నాయి. వెస్టిండీస్‌తో జరిగిన మూడు వన్డేలో సిరీస్‌ను న్యూజిలాండ్ 3-0తో క్లీన్ స్వీప్ చేసింది. అయితే ఇందులో తొలి వన్డేలో మిచెల్ శతక్కొట్టాడు. దీంతో ఐసీసీ ర్యాంకింగ్స్‌లో టాప్‌లోకి దూసుకొచ్చాడు.

అయితే వెస్టిండీస్‌తో రెండు, మూడో వన్డేలకు మిచెల్ దూరమయ్యాడు. దీంతో వన్డే ర్యాంకింగ్స్‌లో రేటింగ్ పాయింట్లు కోల్పోయి.. రెండో స్థానానికి పడిపోయాడు. ప్రస్తుతం ఐసీసీ వన్డే ర్యాంకింగ్స్‌లో అప్ఘానిస్థాన్‌కు చెందిన ఇబ్రహీం జద్రాన్ (764 రేటింగ్ పాయింట్లు), శుభ్‌మన్ గిల్ (745 పాయింట్లు), విరాట్ కోహ్లీ (725 పాయింట్లు) తర్వాతి స్థానాల్లో ఉన్నారు. వన్డేల్లో బౌలర్లు, ఆల్‌రౌండర్ల ర్యాంకింగ్స్‌లో అప్ఘానిస్థాన్ ఆటగాళ్లు సత్తాచాటారు. బౌలర్ల ర్యాంకింగ్స్‌లో రషీద్ ఖాన్.. ఆల్‌రౌండర్ల ర్యాంకింగ్స్‌లో అజ్మతుల్లా ఒమర్జాయ్ అగ్రస్థానాల్లో ఉన్నారు.

ఇక, హిట్‌మ్యాన్ రోహిత్ శర్మ మరో నాలుగు రోజుల్లో మైదానంలోకి అడుగుపెట్టనున్నాడు. సౌతాఫ్రికాతో నవంబర్ 30 నుంచి జరగనున్న వన్డే సిరీస్‌లో అతడు బరిలోకి దిగనున్నాడు. రెగ్యులర్ కెప్టెన్ శుభ్‌మన్ గిల్ గాయంతో దూరం కావడంతో ఈ సిరీస్‌కు తాత్కాలిక కెప్టెన్‌గా కేఎల్ రాహుల్ నియమితుడయ్యాడు. తొలి వన్డే రాంచీలో జరగనుంది. రెండో వన్డే డిసెంబర్ 3న రాయ్‌పూర్‌లో.. మూడో వన్డే డిసెంబర్ 6న విశాఖలో జరగనుంది.