ఆధార్ ప్రూఫ్‌గా ఎలా? సుప్రీంకోర్టు కీలక వ్యాఖ్యలు వైరల్!

ఆధార్ కార్డు విషయంపై సుప్రీంకోర్టు కీలక తీర్పు వెల్లడించింది. ఆధార్ అనేది భారత పౌరసత్వానికి ఎట్టి పరిస్థితుల్లోనూ ధృవపత్రం కాదని ధర్మాసనం స్పష్టం చేసింది.ఓటర్ల జాబితా సమగ్ర సవరణపై ఇవాళ సుప్రీంకోర్టులో విచారణ జరిగింది. పశ్చిమబెంగాల్, తమిళనాడు, కేరళలో ఓటర్ రోల్స్‌ రివిజన్‌పై ఈసీ తీసుకున్న నిర్ణయాన్ని సవాల్ చేస్తూ పలు పిటిషన్లు దాఖలయ్యాయి. ఈ పిటిషన్లను సీజేఐ జస్టిస్ సూర్యకాంత్, జస్టిస్ జోయ్‌మాల్యా బాగ్చి ధర్మాసనం విచారించింది. ఈ విచారణ సందర్భంగా “ఆధార్ ఉన్న వారందరికీ ఓటర్ కార్డు ఎలా ఇస్తారు?” అంటూ కోర్టు ప్రశ్నించింది. కొంతమంది చొరబాటుదారులు కూడా ఆధార్ కార్డులు పొందుతున్నారని ప్రస్తావిస్తూ ధర్మాసనం అసంతృప్తి వ్యక్తం చేసింది.భారత పౌరులు కానివారు ఆధార్ పొందితే, వారిని ఓటర్ల జాబితాలో చేర్చాలా? అంటూ కోర్టు కఠిన వ్యాఖ్యలు చేసింది. పౌరసత్వానికి ఆధార్ ఎట్టి పరిస్థితుల్లోనూ ఆధారం కాదని స్పష్టం చేస్తూ, ఆధార్‌ను సంక్షేమ పథకాల అమలుకు మాత్రమే ఉపయోగించే విధంగా ప్రభుత్వం రూపొందించిందని ధర్మాసనం పేర్కొంది. రేషన్ కార్డు కోసం ఆధార్ పొందిన వ్యక్తికి ఆటోమేటిక్‌గా ఓటర్ హక్కు ఎలా ఇస్తారు? అని కోర్టు ప్రశ్నించింది.ఇక్కడ కార్మికులుగా పనిచేస్తున్న చొరబాటుదారులకు కూడా ఓటు హక్కు కల్పిస్తారా? అంటూ మండిపడిన ధర్మాసనం, ఈ విషయంపై డిసెంబర్ 1 లోపు స్పష్టమైన సమాధానం ఇవ్వాలని ఎన్నికల సంఘానికి డెడ్‌లైన్ విధించింది.ఓటు హక్కును నిర్ణయించడానికి ఆధార్‌ను ప్రామాణిక పత్రంగా పరిగణించలేమని సుప్రీంకోర్టు మరోసారి గుర్తు చేసింది. విదేశీయులు ఆధార్ కార్డు కలిగి ఉన్నారని మాత్రమే వారిని ఓటర్ల జాబితాలో చేర్చాలా? అని కోర్టు పిటిషనర్లను ప్రశ్నించింది.పిటిషనర్ల తరఫున న్యాయవాది కపిల్ సిబల్ వాదిస్తూ, ఓటర్ల సవరణ ప్రక్రియ ఓటర్లపై రాజ్యాంగ విరుద్ధమైన భారం మోపుతోందని తెలిపారు. దీనికి స్పందించిన సుప్రీంకోర్టు, “ఇప్పటి వరకు సవరణ ప్రక్రియ లేనట్టా? ఇప్పుడు ప్రారంభించారని అభ్యంతరం చెప్పడం సరైంది కాదు” అంటూ వ్యాఖ్యానించింది.