షాకింగ్ ట్విస్ట్.. గ్రీన్కార్డు ఇంటర్వ్యూకే వచ్చిన విదేశీ భాగస్వాములను హఠాత్తుగా అరెస్ట్ చేస్తున్న ICE!
international | Suryaa Desk | Published : Fri, Nov 28, 2025, 12:42 PM
అమెరికాలో శాన్ డియాగోలోని USCIS ఆఫీసులో జరుగుతున్న ఓ కొత్త ధోరణి ఇమ్మిగ్రేషన్ కమ్యూనిటీలో భయాందోళన కలిగిస్తోంది. గ్రీన్కార్డు ఇంటర్వ్యూకు హాజరయ్యేందుకు వచ్చిన విదేశీ పౌరులను నేరుగా అదుపులోకి తీసుకుంటున్నారు అక్కడి అధికారులు. ముఖ్యంగా వీసా గడువు ముగిసిన వ్యక్తులను టార్గెట్ చేస్తున్నట్టు సమాచారం.
ప్రముఖ ఇమ్మిగ్రేషన్ అటార్నీ నస్సేరీ తన క్లయింట్లలో ఐదుగురు ఇలాంటి అనుభవానికి గురయ్యారని వెల్లడించారు. వీరంతా అమెరికన్ సిటిజన్ల జీవిత భాగస్వాములే కావడం గమనార్హం. వీరిపై ఎటువంటి క్రిమినల్ రికార్డు లేదని, కేవలం ఓవర్స్టే (వీసా గడువు ముగిసి ఉండటం) మాత్రమే కారణమని ఆయన చెప్పారు.
ఇంటర్వ్యూకు రావడమే వారికి ఉచ్చులా మారుతోందని నస్సేరీ ఆవేదన వ్యక్తం చేశారు. “ఇది చాలా భయానక విషయం. ఇంటర్వ్యూకు ధైర్యంగా వస్తే చాలు… వెంటనే ICE వాళ్లు అదుపులోకి తీసేస్తున్నారు” అని ఆయన ఆందోళన వ్యక్తం చేశారు. దీంతో చాలా మంది ఇప్పుడు ఇంటర్వ్యూకే రావడానికి జంకుతున్నారట.
ఈ ఘటనలు ట్రంప్ పరిపాలనలో మళ్లీ గట్టి ఇమ్మిగ్రేషన్ ఎన్ఫోర్స్మెంట్ మొదలైందనే అనుమానాలను రేకెత్తిస్తున్నాయి. గ్రీన్కార్డు ప్రక్రియలో ఉన్నవారు, ముఖ్యంగా వీసా ఓవర్స్టే ఉన్నవారు ఇప్పుడు ఇంటర్వ్యూకు హాజరయ్యే ముందు రెండు సార్లు ఆలోచించాల్సి వస్తోంది. లాయర్లు కూడా తమ క్లయింట్లకు “రిస్క్ ఎక్కువగా ఉంది” అని హెచ్చరిస్తున్నారు.
|
|