పౌరులకు వీసాలు నిలిపివేస్తూ,,,పాకిస్థాన్‌కు గట్టి షాక్ ఇచ్చిన యూఏఈ

పాకిస్థాన్ పౌరులకు యునైటెడ్ అరబ్ ఎమిరేట్స్ (యూఏఈ) కొత్త వీసాలను నిలిపివేసినట్లు తెలిసింది. యూఏఈకి చేరుకున్న తర్వాత అనేక మంది పాకిస్థానీయులు నేర కార్యకలాపాలు, భిక్షాటనలో పాల్గొంటున్నారనే ఆందోళనల నేపథ్యంలో ఈ కఠిన చర్యలు తీసుకున్నట్లు పాకిస్థాన్ అంతర్గత వ్యవహారాల సెక్రటరీ సల్మాన్ చౌద్రీ సెనేట్ ఫంక్షనల్ కమిటీ ఆన్ హ్యూమన్ రైట్స్ సమావేశంలో వెల్లడించారు.

టూరిస్ట్ వీసాపై యూఏఈకి వస్తున్న అనేక మంది పాకిస్థానీయులు భిక్షాటనకు పాల్పడుతున్నట్లు అక్కడి ప్రభుత్వం గుర్తించింది. ఇలా వచ్చిన వేలాది మంది పాక్ బిచ్చగాళ్లను ఇప్పటికే వారి స్వదేశానికి పంపించింది. దీంతో నేరాలు పెరుగుతున్నాయని గ్రహించిన యూఏఈ.. సాధారణ పౌరులకు ఇచ్చే వీసాలను నియంత్రిస్తున్నట్లు సమాచారం. ప్రస్తుతం బ్లూ, డిప్లొమాటిక్ పాస్‌పోర్టులు కలిగిన వారికి మాత్రమే వీసాలు ఇస్తున్నట్లు తెలిసింది. పాక్ సెనేటర్ సమీనా ముంతాజ్ జెహ్రీ కూడా అతి కష్టం మీద కొద్దిమంది పౌరులకే వీసాలు మంజూరవుతున్నాయని తెలిపారు. ఓవర్సీస్ ఎంప్లాయిమెంట్ ప్రమోటర్ ఐసామ్ బేగ్ మాట్లాడుతూ.. వర్క్ వీసాలపై కాకుండా టూరిస్ట్ వీసాలపై యూఏఈకి వచ్చిన పాకిస్థానీయులు భిక్షాటనకు పాల్పడటంపై ఆ దేశ ప్రభుత్వం ఆందోళన చెందుతోందన్నారు.

యూఏఈ తీసుకున్న ఈ నిర్ణయం పాకిస్థాన్‌కు పెద్ద ఎదురుదెబ్బగా పరిణమించింది. ఇప్పటికే గల్ఫ్ దేశాలకు వీసాలు పొందడం కష్టంగా మారుతోంది. దుబాయ్, అబుదాబి వంటి నగరాలకు ప్రతి సంవత్సరం 8 లక్షలకు పైగా పాకిస్థానీయులు ఉద్యోగం, ప్రయాణం కోసం దరఖాస్తు చేసుకుంటారు. వాస్తవానికి 2024 డిసెంబర్‌లో కూడా యూఏఈ, సౌదీ అరేబియా సహా పలు గల్ఫ్ దేశాలు.. పాకిస్థాన్‌లోని కనీసం 30 విభిన్న నగరాలకు చెందిన పౌరులకు వీసాలు నిలిపివేశాయి. స్మగ్లింగ్, డ్రగ్ ట్రాఫికింగ్, మానవ అక్రమ రవాణా, ఇతర నేర కార్యకలాపాలలో పాక్ పౌరులు పట్టుబడటం పెరగడమే ఇందుకు కారణం.

ఒకసారి నిషేధం విధించిన తర్వాత దానిని తొలగించడం చాలా కష్టం అవుతుందని పాక్ అంతర్గత వ్యవహారాల సెక్రటరీ సల్మాన్ చౌద్రీ హెచ్చరించారు. ఈ నిర్ణయానికి ముందు యూఏఈ వీసా దరఖాస్తుదారులు తప్పనిసరిగా పోలీసుల నుంచి క్యారెక్టర్ సర్టిఫికెట్ అందించాలని నిబంధన పెట్టింది. యూఏఈ, పాకిస్థాన్‌కు అతిపెద్ద వాణిజ్య భాగస్వాములలో ఒకటిగా ఉండగా.. అక్కడ భారీ సంఖ్యలో పాకిస్థానీ ప్రవాసులు నివసిస్తున్నారు, పనిచేస్తున్నారు.