గ్రీన్‌కార్డు ఇంటర్వ్యూల కోసం పిలుస్తూ అరెస్టులు,,,విదేశీయులకు అమెరికా బిగ్ షాక్

అమెరికాలో శాశ్వత నివాసం కల్పించే గ్రీన్ కార్డు కోసం వేలాది మంది ఎదురు చూసే విషయం అందరికీ తెలిసిందే. అయితే ఇప్పుడు.. ఇలాంటి వాళ్ల వెన్నులో వణుకుపుట్టే విధమైన వార్తలు వస్తున్నాయి. ముఖ్యంగా గ్రీన్ కార్డ్ ఇంటర్వ్యూల కోసం దరఖాస్తుదారులను పిలిపించి.. అక్కడే ఇమ్మిగ్రేషన్ అధికారులు వారిని అరెస్టు చేసి, అదుపులోకి తీసుకుంటున్నట్లు అమెరికా మీడియాలో వస్తున్న కథనాలు తీవ్ర ఆందోళన కలిగిస్తున్నాయి. యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్‌ కార్యాలయాలు ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ అధికారుల సహకారంతో ఈ అరెస్టులు చేస్తున్నట్లు ఇమ్మిగ్రేషన్ న్యాయవాదులు వెల్లడించారు.

వీసా గడువు ముగిసినా దేశంలోనే ఉన్నవారిని లక్ష్యంగా చేసుకుని ఈ అరెస్టులు జరుగుతున్నాయని ఇమ్మిగ్రేషన్ న్యాయవాది సమన్‌ నస్సేరి తెలిపారు. ఐసీఈ, యూఎస్‌సీఐఎస్‌లు ఒకే విధానాన్ని అమలు చేస్తున్నాయన్నారు. గ్రీన్‌కార్డు ఇంటర్వ్యూల కోసం అని పిలిపించి.. వీసా గడువు ముగిసిన వారిని ఐసీఈ అరెస్టులు చేస్తోందని ఆయన వివరించారు. గత వారం రోజుల్లో శాన్‌డియాగోలోని యూఎస్‌సీఐఎస్ కార్యాలయం నుంచి ఇంటర్వ్యూలకు వచ్చిన తన అయిదుగురు క్లయింట్‌లను అధికారులు అరెస్టు చేసినట్లు పేర్కొన్నారు. వారందరికీ ఎలాంటి నేర చరిత్ర లేదని, కానీ వీసా గడువు ముగిసినందునే అదుపులోకి తీసుకున్నారని పేర్కొన్నారు.

ఒక కేసులో అయితే గ్రీన్ కార్డ్ ఇంటర్వ్యూ కోసం వచ్చిన వ్యక్తితో పాటు వారి అమెరికన్ భాగస్వామిని కూడా అదుపులోకి తీసుకున్నట్లు తెలుస్తోంది. అయితే అరెస్టు అయిన వారంతా యూఎస్‌ పౌరులను వివాహం చేసుకున్నవారే కావడం గమనార్హం. మరో ఇమ్మిగ్రేషన్ న్యాయవాది హబీబ్‌ హస్బిని కూడా ఇలాంటి కేసులు అధికంగా వస్తున్నాయని.. ముఖ్యంగా శాన్‌డియాగో యూఎస్‌సీఐఎస్ కార్యాలయం నుంచే ఈ నిర్బంధ కేసులు ఎక్కువగా ఉన్నాయని తెలిపారు. దీంతో గ్రీన్‌కార్డు ఇంటర్వ్యూలకు వెళ్లే అభ్యర్థులకు ఆయన సూచనలు జారీ చేశారు.

ఈ అరెస్టులను ICE సమర్థించుకుంది. ICE ప్రతినిధి ఒక మీడియాతో మాట్లాడుతూ.. జాతీయ, ప్రజా, సరిహద్దు భద్రతకు తాము కట్టుబడి ఉన్నామన్నారు. అమెరికాలో చట్టవిరుద్ధంగా ఉన్న వ్యక్తులను ఇమ్మిగ్రేషన్ చట్టం ప్రకారం అరెస్టు చేయడం, నిర్బంధించడం జరుగుతుందని స్పష్టం చేశారు.