15 నిమిషాల్లోనే మనుషుల్ని ఉతికే వాషింగ్ మెషీన్

టెక్నాలజీకి పుట్టినిల్లుగా భావించే జపాన్ మరో వినూత్న ఆవిష్కరణను ప్రపంచానికి పరిచయం చేసింది. మనుషులను ఉతికే వాషింగ్ మెషీన్‌ను తయారు చేసి.. యావత్ మానవ జాతిని ఆశ్చర్యానికి గురి చేసింది. ఒసాకాలో జరిగిన వరల్డ్ ఎక్స్‌పోలో అందరి దృష్టిని ఆకర్షించిందీ.. ఈ తదుపరి తరం మానవ వాషింగ్ మెషీన్ . ఇప్పుడు ఈ హ్యూమన్ వాషింగ్ మెషీన్ వాణిజ్యపరంగా మార్కెట్‌లోకి విడుదలైంది. జపాన్‌కు చెందిన టెక్ కంపెనీ సైన్స్ అభివృద్ధి చేసిన ఈ క్యాప్సూల్ లాంటి మెషీన్ ఇప్పుడు అందరి దృష్టినీ ఆకర్షిస్తోంది.

సైన్స్ సంస్థ తయారు చేసిన ఈ హ్యూమన్ వాషింగ్ మెషీన్‌కు 'ఫ్యూచర్ హ్యూమన్ వాషర్' అని పేరు పెట్టారు. ఒసాకాలో జరిగిన 6 నెలల ఎక్స్‌పోలో ఈ ఫ్యూచర్ హ్యూమన్ వాషర్‌కు సంబంధించిన ప్రోటోటైప్‌ను ప్రదర్శించగా.. 2.7 కోట్ల మంది సందర్శకులను ఆకర్షించింది. ఈ వాషింగ్ మెషీన్‌లో ఉన్న పాడ్‌లో పడుకుని మూత మూసుకోవాల్సి ఉంటుంది. అయితే సాధారణంగా బట్టలు ఉతికే వాషింగ్ మెషీన్‌లాగానే ఉన్న ఈ ఫ్యూచర్ హ్యూమన్ వాషర్.. స్పిన్ లేకుండానే శరీరం శుభ్రం కావడం విశేషం.

ఈ అత్యాధునిక హ్యూమన్ వాషింగ్ మెషీన్ కేవలం 15 నిమిషాల్లోనే మనుషులకు పూర్తి శుభ్రపరిచిన అనుభవాన్ని అందిస్తుంది. మొదట ఎవరైనా ఒకరు 2.3 మీటర్ల పొడవు గల ఈ క్యాప్సూల్‌లోకి వెళ్లి పడుకోవాల్సి ఉంటుంది. ఇక ఆటోమేటిక్ వాష్ ప్రారంభం కాగానే.. అందులోని మైక్రోబబుల్స్, సూక్ష్మ తుంపరల షవర్ ద్వారా శరీరాన్ని సున్నితంగా శుభ్రం చేస్తుంది. ఇక అందులో ఉన్న వ్యక్తి భద్రత కోసం ఇంటర్నల్ సెన్సార్లు.. వాషింగ్ సమయంలో ఆ వ్యక్తి ఆరోగ్య సంకేతాలను ట్రాక్ చేస్తాయి.

ఇక ఆ హ్యూమన్ వాషింగ్ మెషీన్‌లో శుభ్రపరిచే ప్రక్రియ జరుగుతున్నప్పుడు.. క్యాప్సూల్ లోపల ప్రశాంతమైన దృశ్యాలు, సాఫ్ట్ మ్యూజిక్‌ను ప్లే చేస్తారు. ఇఖ నీటితో శుభ్రపరిచిన తర్వాత.. ఆ మెషీన్.. అందులో ఉన్న వ్యక్తిని ఆటోమేటిక్‌గా ఆరబెడుతుంది. దీంతో అందులో ఉన్న వ్యక్తి ఎలాంటి టవల్ లేకుండానే బయటికి వచ్చేలా ఏర్పాట్లు చేశారు.

ఇక ఈ హ్యూమన్ వాషింగ్ మెషీన్ చాలా అరుదైనది కావడంతో.. ఎలక్ట్రానిక్స్ రిటైల్ దిగ్గజం యమదా డెంకి కూడా.. కస్టమర్లను తమ స్టోర్లకు రప్పించుకోవడానికి.. ఈ మెషీన్‌ను కొనుగోలు చేసింది. డిసెంబర్ 25వ తేదీ నుంచి యమదా డెంకీ.. ఒక డెమో యూనిట్‌ను ప్రదర్శనకు ఉంచనున్నట్లు సంబంధిత వర్గాలు వెల్లడించాయి.

ఇది కేవలం శరీరాన్ని మాత్రమే కాకుండా ఆత్మను కూడా శుభ్రం చేస్తుందనని సైన్స్ సంస్థ ప్రతినిధి సచికో మేకురా తెలిపారు. వాషింగ్ సమయంలో అందులో ఉన్న వారి హార్ట్ బీట్, ఇతర కీలక ఆరోగ్య సంకేతాలను సెన్సార్ల ద్వారా పర్యవేక్షించనున్నట్లు వెల్లడించారు. ఈ ప్రోటోటైప్‌పై అమెరికా రిసార్ట్ కంపెనీతో సహా అంతర్జాతీయ సంస్థలు ఆసక్తి చూపిస్తున్నాయి. దీంతో దీన్ని మార్కెట్లోకి విడుదల చేయాలని సైన్స్ సంస్థ నిర్ణయం తీసుకుంది. మొదటి యూనిట్‌ను ఒసాకాలోని ఒక హోటల్ కొనుగోలు చేసింది. దీని రిటైల్ ధర సుమారు 60 మిలియన్ యెన్లు అంటే మన భారత కరెన్సీలో సుమారు రూ.3.25 కోట్లుగా ఉంటుందని అంచనా వేస్తున్నారు. ఈ అరుదైన యంత్రాన్ని సైన్స్ కంపెనీ కేవలం 50 యూనిట్లు మాత్రమే ఉత్పత్తి చేయాలని భావిస్తోంది.

ఈ ఫ్యూచర్ హ్యూమన్ వాషర్ మెషీన్‌ను 1970లో ఒసాకా ఎక్స్‌పోలో ప్రదర్శించిన ఒక ప్రోటోటైప్‌ను ఆధునీకరించి.. తయారు చేశారు. అప్పటి ఆలోచన స్ఫూర్తితోనే తమ కంపెనీ అధ్యక్షుడు దీన్ని అభివృద్ధి చేశారని సైన్స్ సంస్థ ప్రతినిధి తెలిపారు. ఈ ఒసాకా ఎక్స్‌పోను సందర్శించలేని వారు కూడా ఈ టెక్నాలజీని అనుభవించాలని సైన్స్ కంపెనీ ఛైర్మన్ యసుయాకి ఆయోమా కోరారు.