పత్తి చేలో గుట్టుగా గంజాయి సాగు,,,రూ.11 లక్షలు విలువ చేసే 108 మొక్కలు స్వాధీనం

హెడ్డింగ్ చూడగానే... ఇదేదో లాభసాటి పంట అనుకుంటే పొరపాటే. ఈ పంట సాగుచేస్తే... నేరుగా జైలుకు వెళ్లి కూర్చుంటారు. ఇంతకూ అదేం పంట అంటే... గంజాయి సాగు. ఒకప్పుడు నగరాల్లో మాత్రమే కనిపించే, వినిపించే మాదకద్రవ్యాలు, గంజాయి వంటి మత్తు పదార్థాలు ఇప్పుడు పల్లెల్లోకి కూడా చొచ్చుకొస్తున్నాయి.

అధిక లాభానికి ఆశపడి కొందరు రైతులు గుట్టు చప్పుడు కాకుండా తమ పంట పొలాల్లో రహస్యంగా గంజాయి సాగు చేస్తున్నారు. అయితే, గంజాయి క్రయవిక్రయాలు, రవాణా మీదనే కాక, సాగు చేసే వారి మీద కూడా అధికారులు కఠిన చర్యలు తీసుకుంటున్నారు. తాజాగా, వికారాబాద్ జిల్లా తాండూరులో ఓ రైతు పొలంలో రూ. 11 లక్షల రూపాయలు ఖరీదు చేసే 108 గంజాయి మొక్కలను స్వాధీనం చేసుకున్నారు.

వికారాబాద్ జిల్లా తాండూరు పరిధిలో గుట్టుగా సాగు చేస్తోన్న గంజాయి వనం రహస్యం బట్టబయలైంది. బర్వాద్ గ్రామంలో ఒక రైతు... ఎవరికీ అనుమానం రాకుండా... తన పొలం మధ్య గంజాయి మొక్కల సాగు చేపట్టాడు. ఒకటి, రెండు కాదు... ఏకంగా 108 మొక్కలు. వీటి విలువ సుమారు రూ. 11 లక్షలు అని తెలుస్తోంది. జిల్లా ఎక్సైజ్ అధికారులకు సదరు రైతు చేస్తున్న ఘనకార్యం గురించి సమాచారం అందడంతో... అతడి పొలానికి వెళ్లి... గంజాయి మొక్కలను స్వాధీనం చేసుకున్నారు.

బర్వాద్ గ్రామానికి చెందిన పెంటయ్య అనే రైతు తన పత్తి చేలో గుట్టుగా గంజాయి సాగు ప్రారంభించాడని అధికారులు తెలిపారు. ఈ కేసులో ఇద్దరు వ్యక్తుల ప్రమేయం ఉందని... అయితే, ఒకరు పారిపోగా... మరో వ్యక్తిని అదుపులోకి తీసుకున్నామని ఎక్సైజ్ పోలీసులు తెలిపారు. పత్తి చేనులో గంజాయి సాగు చేస్తే ఎవరికీ పెద్దగా అనుమానం రాదనే ఉద్దేశంతోనే ఆ రైతు ఇలా చేశాడని అధికారులు తెలిపారు.

కొన్ని రోజుల క్రితం ఆసిఫాబాద్ జిల్లాలో కూడా ఇలాంటి ఘటనే ఒకటి వెలుగులోకి వచ్చింది. కెరిమెరి మండలానికి చెందిన పరందోళి గ్రామ పంచాయతీ పరిధి కోటా గ్రామానికి చెందిన గైక్వాడ్ శివాజీ అనే వ్యక్తి తన పత్తి చేనులో 28 గంజాయి మొక్కలను సాగు చేయడం ప్రారంభించాడు. అయితే దీని గురించి ఎక్సైజ్ సిబ్బందికి సమాచారం అందడంతో వారు.. శివాజీ చేను దగ్గరికి వెళ్లి గంజాయి మొక్కలను స్వాధీనం చేసుకున్నారు. వీటి విలువ సుమారు రూ. 2.80 లక్షలు ఉంటుంది. గంజాయి అమ్మడం, కొనడం, వినియోగంతో పాటుగా సాగు చేసినా చట్టరీత్యా చర్యలు తీసుకుంటామని పోలీసులు హెచ్చరిస్తున్నారు.