బావ డిగ్రీ వాడుకుని డాక్టర్‌గా మారిన బామ్మర్ది

మహారాష్ట్రలోని లాతూర్ జిల్లాలో వైద్య వృత్తికే మచ్చ తెచ్చే ఒక భారీ మోసం తాజాగా వెలుగులోకి వచ్చింది. అమెరికాలో ఉన్న తన బావ సర్టిఫికేట్లను తనవి చూపించుకుంటూ.. ఓ బామ్మర్ది స్పెషల్ డాక్టర్‌గా మారాడు. ఒకటి కాదు రెండు కాదు.. ఏకంగా నాలుగేళ్లుగా వైద్యుడిగా కొనసాగుతూ అనేక మందికి వైద్యం చేశాడు. అయితే ఈ దారుణ మోసాన్ని అతడి సొంత సోదరే బయటపెట్టడంతో.. రాష్ట్రవ్యాప్తంగా సంచలనం రేగింది.

అసలేం జరిగిందంటే?

మహారాష్ట్రలోని లాతూర్‌కు చెందిన అభినవ్ సింగ్‌ అనే వ్యక్తి ఈ మోసానికి పాల్పడినట్లు అధికారులు తెలిపారు. అమెరికాలో ప్రాక్టీస్ చేస్తున్న తన బావ డాక్టర్‌ రాజీవ్‌ కుమార్‌ గుప్తా సర్టిఫికేట్లు, పేరును దుర్వినియోగం చేస్తూ.. అభినవ్ సింగ్ 2022లో జిల్లాలోని ఒక మెడికల్ కాలేజీలో స్పెషలిస్ట్ డాక్టర్‌గా ఉద్యోగం సంపాదించాడు. నాలుగేళ్ల పాటు ఆయన డాక్టర్‌ రాజీవ్‌ కుమార్‌ గుప్తాగా చలామణి అవుతూ.. రోగులకు వైద్యం అందించాడు. అయితే ఇంతకాలం పాటు ఏ ఒక్కరూ అతడు వైద్యుడు కాదనే విషయాన్ని గుర్తించకపోవడం గమనార్హం.

ఈ అక్రమంపై అభినవ్ సింగ్ అక్క డాక్టర్‌ సోనాలి సింగ్ ఉన్నత వైద్యాధికారులకు ఫిర్యాదు చేయడంతో ఈ విషయం వెలుగులోకి వచ్చింది. అమెరికాలో ఉన్న తన భర్త డాక్టర్ రాజీవ్ కుమార్ గుప్తా సర్టిఫికెట్లు, పేరు దుర్వినియోగం చేసి అభినవ్ స్పెషలిస్ట్ డాక్టర్‌గా పని చేస్తున్నాడని డాక్టర్ సోనాలి తన ఫిర్యాదులో పేర్కొన్నారు. దీంతో వెంటనే అప్రమత్తమైన మెడికల్ కాలేజీ ప్రిన్సిపల్ డాక్టర్ మయాంక్ శుక్లా.. ఈ విషయంపై దర్యాప్తు చేస్తున్నట్లు తెలిపారు. డాక్టర్ సోనాలి ఫిర్యాదు మేరకు జిల్లా చీఫ్ మెడికల్ ఆఫీసర్ ఈ కేసును పరిశోధించడానికి ఒక ప్రత్యేక ప్యానల్‌ను ఏర్పాటు చేశారు.

ఈ ప్యానల్ నకిలీ డాక్టర్ సమర్పించిన సర్టిఫికెట్లు, నియామక ప్రక్రియను పూర్తిగా పరిశీలించనుంది. ప్యానల్ నుంచి నివేదిక అందిన తర్వాత అభినవ్ సింగ్‌పై చట్టపరమైన చర్యలు తీసుకుంటామని అధికారులు స్పష్టం చేశారు. అంతేకాకుండా మోసపూరితంగా డాక్టర్‌గా విధులు చేపట్టినప్పటి నుంచి అభినవ్ సింగ్ అందుకున్న జీతాన్ని పూర్తిగా తిరిగి చెల్లించాల్సిందిగా ఆదేశాలు జారీ చేయనున్నారు. ఈ ఘటనపై పోలీసులు ఇంకా పూర్తి వివరాలు వెల్లడించనప్పటికీ.. జిల్లాలోని వైద్య వర్గాలలో తీవ్ర కలకలం రేగింది.