ప్చ్… Sorry Vaibhav, కానీ నిజాలు తప్పించుకోవు!

దుబాయ్‌లోని ఐసీసీ అకాడమీ గ్రౌండ్‌లో అండర్‌–19 ఆసియా కప్‌–2025 శుక్రవారం ప్రారంభమైంది. గ్రూప్–‘ఎ’ మ్యాచ్‌లో యునైటెడ్ అరబ్ ఎమిరేట్స్‌ జట్టుతో తలపడిన భారత్‌ టాస్‌ కోల్పోయి ముందుగా బ్యాటింగ్‌కు దిగింది. ఓపెనర్‌ మరియు కెప్టెన్‌ ఆయుష్‌ మాత్రే త్వరగా పెవిలియన్ చేరినా, మరో ఓపెనర్ వైభవ్‌ సూర్యవంశీ మాత్రం ప్రారంభం నుంచే దూకుడు ప్రదర్శించాడు. కేవలం 56 బంతుల్లో శతకం పూర్తి చేసిన ఈ లెఫ్టీ, ఒక దశలో డబుల్‌ సెంచరీ దిశగా సాగినట్టే కనిపించాడు. అయితే ఉద్దిశ్‌ సూరి బౌలింగ్‌లో బౌల్డ్‌ కావడంతో అతని దాడి ఇన్నింగ్స్‌కు ముగింపు పలికింది. మొత్తం 95 బంతులపై 9 ఫోర్లు, 14 సిక్సర్లతో వైభవ్‌ 171 పరుగులు సాధించాడు. అతనికి తోడు ఆరోన్‌ జార్జ్‌ మరియు విహాన్‌ మల్హోత్రా చెరో 69 పరుగులతో, వేదాంత్‌ త్రివేది 38 పరుగులతో, అభిజ్ఞాన్‌ కుందు 32 నాటౌట్‌తో రాణించడంతో భారత్‌ నిర్ణీత 50 ఓవర్లలో 6 వికెట్లకు 433 పరుగుల భారీ స్కోరు అందుకుంది.ఇప్పటికే యూత్‌ వన్డేల్లో ఒక శతకం ఉన్న వైభవ్‌ ఇటీవల ఇంగ్లాండ్‌ అండర్–19పై కేవలం 52 బంతుల్లోనే శతకం బాదుతూ రికార్డు నమోదు చేశాడు. అయితే ఆసియా కప్‌లో UAEపై చేసిన తాజా శతకానికి యూత్‌ వన్డే స్టేటస్‌ వర్తించదు. కారణం– అసోసియేట్‌ జట్లతో జరిగే అండర్‌–19 ఆసియా కప్‌ మ్యాచ్‌లకు యూత్‌ వన్డే హోదా ఉండదు. అందుకే ఈ అద్భుత శతకం అధికారిక రికార్డుల్లో చోటు చేసుకోలేదు. కానీ డిసెంబర్‌ 14న పాకిస్తాన్‌ వంటి టెస్టు హోదా ఉన్న జట్టుతో జరగబోయే మ్యాచ్‌లో వైభవ్‌ మరోసారి శతకం సాధిస్తే, అది మాత్రం రికార్డుల్లో నమోదు అవుతుంది. ఇదిలా ఉంటే, సీనియర్‌ టీ20ల్లో కూడా వైభవ్‌ ఇప్పటివరకు మూడు శతకాలు బాదాడు—ఐపీఎల్‌ 2025లో రాజస్థాన్‌ రాయల్స్‌ తరఫున ఒకటి, ACC రైజింగ్‌ స్టార్స్‌ ఆసియా కప్‌లో UAEపై మరొకటి, అలాగే సయ్యద్‌ ముస్తాక్‌ అలీ ట్రోఫీలో మహారాష్ట్రపై మరో శతకం సాధించాడు.