ఆస్ట్రేలియాలో ఇంగ్లండ్‌కు తొలి విజయం,,,15 ఏళ్ల చెత్త రికార్డుకు బ్రేక్

ఇంగ్లండ్‌‌కు ఎన్నో ఏళ్లుగా కలగా మిగిలిపోయిన ఆస్ట్రేలియాలో టెస్టు విజయం.. 15 ఏళ్ల తర్వాత నెరవేరింది. యాషెస్ సిరీస్ అటు ఆస్ట్రేలియా, ఇటు ఇంగ్లండ్‌కు ఎంతో ప్రతిష్టాత్మకమైంది. అలాంటి యాషెస్ సిరీస్‌ కోసం ఆస్ట్రేలియాలో అడుగుపెట్టిన ప్రతిసారీ ఇంగ్లండ్‌కు ఘోర అవమానమే మిగిలింది. 2011 తర్వాత ఇప్పటి వరకు ఆస్ట్రేలియాలో ఇంగ్లండ్ ఒక్కసారి కూడా టెస్టు మ్యాచ్ గెలవలేదు. అలాంటి శాపం నుంచి మెల్‌బోర్న్ క్రికెట్ గ్రౌండ్‌లో ఇంగ్లండ్‌కు విముక్తి లభించింది.

యాషెస్ సిరీస్ 2025 -26 మంచి అంచనాలతో ఆస్ట్రేలియాలో అడుగుపెట్టిన ఇంగ్లండ్‌కు ఘోర అవమానం ఎదురైంది. పెర్త్ మొదలు అడిలైడ్ వరకు వరుసగా మూడు టెస్టుల్లోనూ ఘోర ఓటమిపాలయింది. పెర్త్‌లో అంచనాలు తలకిందులు అవడంతో ఆస్ట్రేలియా విజయం సాధించగా, మిగతా రెండు టెస్టులు కూడా వన్ సైడ్‌గా ఆస్ట్రేలియా గెలుపొందింది. దాంతో 3 -0తో మరో రెండు టెస్టులు మిగిలుండగానే ఇంగ్లండ్ సిరీస్ కోల్పోయింది.

ఆఖరి రెండు టెస్టుల్లో కనీసం ఒక్కటైనా నెగ్గాలని ఇంగ్లండ్ చూసింది. ఈలోపే బీచ్‌లో ఇంగ్లండ్ ప్లేయర్ల రచ్చ, బెన్ డకెట్ తాగేసి వీధుల్లో తిరగడం మెల్‌బోర్న్ టెస్టుకు ముందు ఇంగ్లండ్‌ను మానసికంగా డిస్టర్బ్ చేసింది. అయినప్పటికీ నాలుగో టెస్టులో ఇంగ్లండ్ కమ్ బ్యాక్ ఇచ్చి నాలుగు వికెట్ల తేడాతో గెలిచి పరువు నిలబెట్టుకుంది.

ఇంగ్లండ్ 2011 జనవరిలో సిడ్నీలో చివరిసారిగా టెస్టు గెలిచింది. ఆ తర్వాత ఒక్క మ్యాచ్ కూడా విజయం సాధించలేదు. మొత్తం 18 మ్యాచ్‌లు ఆడితే 16 మ్యాచ్‌లలో ఓడిపోగా, రెండు టెస్టులు డ్రా అయ్యాయి. మెల్‌బోర్న్‌లో జరిగిన 19వ మ్యాచ్‌లో విజయం సాధించి 15 సంవత్సరాలుగా ఉన్న చెత్త రికార్డును తుడిపేసుకుంది.

మెల్‌బోర్న్ టెస్టు రెండో ఇన్నింగ్స్‌లో 175 పరుగుల లక్ష్యంతో బరిలోకి దిగిన ఇంగ్లండ్ ఆరంభం నుంచే దూకుడుగా ఆడింది. బెన్ డకెట్ - జాక్ క్రాలీ 50 పరుగుల భాగస్వామ్యంతో ఇంగ్లండ్‌కు శుభారంభం అందించడం. జాకబ్ బేతెల్ అద్భుతంగా ఆడటంతో ఇంగ్లండ్ విజయం ఖరారయింది. బ్రూక్ - స్మిత్ విన్నింగ్ పార్ట్‌నర్‌షిప్‌తో ఇంగ్లండ్‌కు మంచి రోజులు తీసుకొచ్చారు. ఐదు రోజుల టెస్టు మ్యాచ్ కేవలం రెండు రోజుల్లోనే ముగియడంతో మెల్‌బోర్న్ పిచ్‌పై తీవ్ర విమర్శల వర్షం కురుస్తోంది.