నెలకు రూ. 4 వేల సిప్.... చేతికి ఒకేసారి రూ. 6 కోట్లు

చాలా మంది స్టాక్ మార్కెట్లకు ప్రత్యామ్నాయంగా దీర్ఘకాలంలో మెరుగైన రిటర్న్స్ అందుకునేందుకు మ్యూచువల్ ఫండ్లను ఎంచుకుంటారని చెప్పొచ్చు. ఇక్కడ కాంపౌండింగ్ కారణంగా సంపద కాలం గడుస్తున్న కొద్దీ విపరీతంగా పెరుగుతుంటుంది. అయితే మ్యూచువల్ ఫండ్లలో చాలా మంది సిప్ రూపంలో పెట్టుబడులు పెట్టేందుకు ఆసక్తి చూపిస్తుంటారు. ఇక్కడ ఆర్థిక క్రమశిక్షణ చాలా ముఖ్యం. కేవలం రిటర్న్స్ వెంట పడటం మాత్రమే కాదు.. కచ్చితమైన క్రమశిక్షణతో పొదుపు చేస్తూ.. సిప్ పెట్టుబడులు పెడుతుండాలి. మ్యూచువల్ ఫండ్స్ ముఖ్యంగా రిటైర్మెంట్ ప్రయోజనాల్ని అందిస్తుంది. ఆ సమయానికి పెద్ద మొత్తంలో డబ్బులు వచ్చేలా పెట్టుబడులు పెట్టాలి.

ఇటీవల బంగారం ధరలు పెరుగుతుండటం వల్ల అటువైపు కూడా పెట్టుబడులు పెరుగుతున్నాయి. దీంతో ఈక్విటీ మ్యూచువల్ ఫండ్లతో పాటుగా.. గోల్డ్‌కు కూడా పోర్ట్‌ఫోలియోలో చోటు కల్పించాల్సిన అవసరం ఉందని ఆర్థిక నిపుణులు చెబుతున్నారు.

ఇటీవల ఈటీ నౌ మనీ షోకు వచ్చిన రమేష్ అనే ఒక 34 ఏళ్ల పెట్టుబడిదారుడు.. నెలకు రూ. 24 వేలను 6 వేర్వేరు మ్యూచువల్ ఫండ్స్ పథకాల్లో సమానంగా అంటే ఒక్కో దానిలో రూ. 4 వేల చొప్పున పెట్టుబడి పెడుతున్నారు. అతడు 22 ఏళ్ల పాటు తన పెట్టుబడుల్ని కొనసాగిస్తానని చెప్పారు. దీనిపై నిపుణులు ఆసక్తికరమైన విశ్లేషణ చేశారు. ఆ మొత్తం 22 ఏళ్లకు ఎంతవుతుందో వివరించారు.

రమేష్ పెట్టుబడులు చేసిన పథకాలు.. పరాగ్ పారిఖ్ ఫ్లెక్సీ క్యాప్ ఫండ్, కోటక్ మల్టీ క్యాప్ ఫండ్, ఇన్వెస్కో ఇండియా లార్జ్ అండ్ మిడ్ క్యాప్ ఫండ్, ఐసీఐసీఐ ప్రుడెన్షియల్ రిటైర్మెంట్ ఫండ్, మోతీలాల్ ఓస్వాల్ మిడ్ క్యాప్ ఫండ్, బంధన్ స్మాల్ క్యాప్ ఫండ్ ఉన్నాయి.

ఇలా 6 పథకాల్లో సగటున వార్షిక ప్రాతిపదికన 12 శాతం రాబడి చొప్పున ఇచ్చినా.. నెలకు రూ. 24 వేల సిప్ పెట్టుబడి 22 ఏళ్లలో రూ. 3 కోట్లు అవుతుందని నిపుణులు చెప్పారు. అయితే ఇక్కడే చాలా మంది పొరపాటు చేస్తున్నారని.. నిర్ణీత మొత్తాన్ని ఏళ్ల తరబడి అలాగే కొనసాగించడం మంచిది కాదని సలహా ఇస్తున్నారు నిపుణులు. పెరుగుతున్న ఆదాయానికి అనుగుణంగా పెట్టుబడిని పెంచాలని అంటున్నారు. ఇక్కడ ఏటా మీ పెట్టుబడిని 10 శాతం చొప్పున పెంచితే 22 ఏళ్లలో ఇదే ఏకంగా రూ. 6 కోట్లుగా అవుతుందని అంటున్నారు. అంటే తొలి ఏడాది నెలకు సిప్ రూ. 24 వేల చొప్పున చెల్లిస్తే.. రెండో ఏడాది 10 శాతం పెరిగి రూ. 26,400 అవుతుంది. మూడో ఏడాది రూ. 29,040 చొప్పున ఇలా సిప్ చేసుకుంటూ వెళ్లాలి. ఇంకా నెలకు రూ. 2 వేల నుంచి 4 వేల వరకు గోల్డ్ మ్యూచువల్ ఫండ్స్ లేదా గోల్డ్ ఈటీఎఫ్‌లో ఇన్వెస్ట్ చేయాలని సూచిస్తున్నారు.