సముద్ర గర్భంలో భారత రాష్ట్రపతి.. జలాంతర్గామిలో ప్రయాణించనున్న ద్రౌపదీ ముర్ము

భారత సాయుధ దళాల సుప్రీం కమాండర్, రాష్ట్రపతి ద్రౌపదీ ముర్ము మరో చారిత్రాత్మక సాహసానికి సిద్ధమయ్యారు. కర్ణాటకలోని కార్వార్ నౌకాదళ స్థావరం నుంచి ఆమె రేపు జలాంతర్గామి (సబ్‌మెరైన్)లో ప్రయాణించనున్నారు. దేశ రక్షణ వ్యవస్థ పనితీరును స్వయంగా పరిశీలించడంతో పాటు, నౌకాదళ సిబ్బందిలో ఉత్సాహాన్ని నింపేందుకు ఈ పర్యటనను ఏర్పాటు చేశారు. ఈ పర్యటన ద్వారా భారత రక్షణ రంగ చరిత్రలో ఆమె తన పేరును సువర్ణాక్షరాలతో లిఖించుకోనున్నారు.
రాష్ట్రపతి హోదాలో జలాంతర్గామిలో ప్రయాణిస్తున్న రెండో వ్యక్తిగా ద్రౌపదీ ముర్ము రికార్డు సృష్టించబోతున్నారు. గతంలో 2006వ సంవత్సరంలో అప్పటి రాష్ట్రపతి, ‘మిస్సైల్ మ్యాన్’ ఏపీజే అబ్దుల్ కలాం విశాఖపట్నం వేదికగా సబ్‌మెరైన్‌లో ప్రయాణించి తొలి రాష్ట్రపతిగా నిలిచారు. సుమారు రెండు దశాబ్దాల విరామం తర్వాత ఒక భారత రాష్ట్రపతి సముద్ర గర్భంలోకి వెళ్తుండటం విశేషం. ఈ అరుదైన ఘనత సాధిస్తున్న తొలి మహిళా రాష్ట్రపతిగా కూడా ముర్ము చరిత్ర సృష్టించనున్నారు.
ద్రౌపదీ ముర్ముకు ఇలాంటి సాహసాలు కొత్తేమీ కాదు, గతంలోనూ ఆమె తన ధైర్యాన్ని చాటుకున్నారు. 2023వ సంవత్సరంలో అస్సాంలోని తేజ్‌పూర్ ఎయిర్‌ఫోర్స్ స్టేషన్ నుంచి 'సుఖోయ్-30 MKI' యుద్ధ విమానంలో ఆమె ఆకాశ విహారం చేశారు. అలాగే గత అక్టోబర్ నెలలో అత్యాధునిక 'రఫేల్' యుద్ధ విమానంలో ప్రయాణించి రక్షణ రంగంపై తనకున్న మక్కువను చాటుకున్నారు. ఇప్పుడు జలాంతర్గామి పర్యటన ద్వారా గగనతలం నుంచి సముద్ర లోతులకు ఆమె తన ప్రయాణాన్ని కొనసాగిస్తున్నారు.
ఈ పర్యటన సందర్భంగా రాష్ట్రపతి ముర్ము జలాంతర్గామి లోపల ఉండే సాంకేతిక వ్యవస్థలు మరియు ఆపరేషన్లను ప్రత్యక్షంగా వీక్షించనున్నారు. సుదీర్ఘ కాలం పాటు నీటి అడుగున ఉండి దేశ సరిహద్దులను కాపాడే నౌకాదళ అధికారుల జీవనశైలిని, వారు ఎదుర్కొనే సవాళ్లను ఆమె అడిగి తెలుసుకోనున్నారు. కార్వార్ హార్బర్‌లో జరిగే ఈ కార్యక్రమంలో ఉన్నత స్థాయి నౌకాదళ అధికారులు పాల్గొని, సముద్ర భద్రతకు సంబంధించిన వ్యూహాలను రాష్ట్రపతికి వివరించనున్నారు.