వ్లాదిమిర్ పుతిన్‌ అరెస్ట్‌కు ఆదేశిస్తారా,,,? ట్రంప్ సమాధానం ఇదే

వెనుజులాపై వైమానిక దాడులు చేపట్టి, ఆ దేశ అధ్యక్షుడు నికోలస్ మదురో, ఆయన భార్యను అదుపులోకి తీసుకున్న తర్వాత అమెరికా, రష్యా మధ్య సంబంధాలపై స్పష్టత వస్తోంది. ఈ అరెస్ట్‌పై ఉక్రెయిన్ అధ్యక్షుడు వొలొడిమిర్ జెలెన్‌స్కీ ‘బలవంతుడిదే రాజ్యం’ అన్నట్లుగా ఉందని వ్యాఖ్యానించారు. రష్యా అధ్యక్షుడు వ్లాదిమిర్ పుతిన్‌కు అమెరికా చేతిలో ఇలాంటిదే జరుగుతుందని జెలెన్‌స్కీ జోస్యం చెప్పారు. అయితే, ట్రంప్ మాత్రం పుతిన్‌ను అరెస్టు చేయడం "అవసరం లేదు" అని, కానీ ఆయనతో తనకున్న సంబంధంపై "చాలా నిరాశగా" ఉన్నానని పేర్కొనడం గమనార్హం.

 పుతిన్‌పై అంతర్జాతీయ క్రిమినల్ కోర్ట్ యుద్ధ నేరాలకు సంబంధించి అరెస్టు వారెంట్ జారీ చేసింది. మదురో అరెస్టు, అమెరికా మిత్రదేశాలకు, ముఖ్యంగా 2022 నుంచి రష్యా దాడులను ఎదుర్కొంటున్న ఉక్రెయిన్‌కు ధైర్యాన్నిచ్చింది. కీవ్‌ను రష్యా ఆక్రమణ నుంచి కాపాడుకుంటూనే ఉంది. మదురో అరెస్టుపై జెలెన్‌స్కీ స్పందిస్తూ.. ‘ఒక నియంతను ఇలాగే చూడాలంటే, అమెరికాకు ఏం చేయాలో తెలుసు’ అని పరోక్షంగా పుతిన్‌ను ఉద్దేశించి అన్నారు.

ఈ క్రమంలో ఉక్రెయిన్ అధ్యక్షుడి వ్యాఖ్యలను ప్రస్తావిస్తూ పుతిన్‌ను అరెస్టు చేసే మిషన్‌ గురించి ఎప్పుడైనా ఆదేశిస్తారా అని తాజాగా మీడియా ప్రశ్నించగా.. ‘అది అవసరం లేదు అనుకుంటున్నాను’ అని అమెరికా అధ్యక్షుడు డొనాల్డ్ ట్రంప్ బదులిచ్చారు. ‘నేను ఎనిమిది యుద్ధాలను పరిష్కరించాను. ఇది మధ్యస్థంగా లేదా సులభమైన వాటిలో ఒకటిగా ఉంటుందని అనుకున్నాను’ అని ట్రంప్ విలేకరులతో అన్నారు.

‘‘గత నెలలో వారు 31,000 మందిని కోల్పోయారు. వీరిలో చాలా మంది రష్యా సైనికులే. రష్యా ఆర్థిక వ్యవస్థ బాగా లేదు. నేను దీనిని పరిష్కరిస్తాననే నమ్మకంతో ఉన్నాను.. త్వరగా చేసి ఉంటే బాగుండేది, ఎందుకంటే చాలా మంది చనిపోతున్నారు, ఎక్కువగా సైనికులే’ అని ట్రంప్ అన్నారు.

గతవారం వెనుజులా రాజధాని కారకాస్‌లో అర్ధరాత్రి దాటిన తర్వాత అమెరికా మెరుపు దాడులు చేపట్టింది. వెనిజులా అధ్యక్షుడు మదురో, ఆయన భార్య సిలియా ఫ్లోరెస్ తమ ఇంట్లో నిద్రిస్తున్న సమయంలో అమెరికా యుద్ధ విమానాలు నగరంపై వైమానిక దాడులు ప్రారంభించాయి. ఆ తర్వాత అమెరికాకు చెందిన అత్యంత రహస్యమైన డెల్టా ఫోర్స్ సైనికులు మదురోను అదుపులోకి తీసుకుని, అమెరికా సైనిక స్థావరానికి తీసుకెళ్లారు. అక్కడి నుంచి యూఎస్ఎస్ జిమా అనే భారీ యుద్ద నౌకలో న్యూయార్క్‌కు తరలించారు. ఈ పరిణామాలు అంతర్జాతీయంగా తీవ్ర కలకలం రేపుతున్నాయి. వెనుజులాతోనే ముగియదని, తమ దేశానికి డ్రగ్స్ పంపుతోన్న కొలంబియా, మెక్సికోలకు ఇదే గతి పడుతుందని ట్రంప్ హెచ్చరించారు.