టీమిండియాపై పోరుకు సిద్ధమైన 'తమిళ' తంబీ.. కివీస్ జట్టులో లెగ్ స్పిన్నర్ ఆదిత్య అశోక్ మెరుపులు!

భారత గడ్డపై భారత్‌తో జరుగుతున్న తొలి వన్డేలో న్యూజిలాండ్ జట్టు ఒక ఆసక్తికర మార్పుతో బరిలోకి దిగింది. కివీస్ తుది జట్టులో భారత సంతతికి చెందిన లెగ్ స్పిన్నర్ ఆదిత్య అశోక్ చోటు దక్కించుకోవడం విశేషం. 2002 సెప్టెంబర్ 5న తమిళనాడులోని వేలూరులో జన్మించిన ఆదిత్య, ఇప్పుడు తన సొంత దేశంపైనే కివీస్ జెర్సీ ధరించి బౌలింగ్ దాడిని ప్రారంభించబోతున్నాడు. భారత మూలాలు ఉన్న ఆటగాళ్లు విదేశీ జట్లకు ప్రాతినిధ్యం వహించడం కొత్తేమీ కాకపోయినా, ఒక తమిళ యువకుడు న్యూజిలాండ్ స్పిన్ విభాగానికి వెన్నెముకగా మారడం చర్చనీయాంశమైంది.
ఆదిత్య అశోక్ ప్రయాణం కేవలం 4 ఏళ్ల ప్రాయంలోనే మలుపు తిరిగింది. తన కుటుంబం న్యూజిలాండ్‌కు వలస వెళ్లడంతో అక్కడే పెరిగి, అక్కడి క్రికెట్ వ్యవస్థలో రాటుదేలాడు. 2023 ఆగస్టులో న్యూజిలాండ్ తరఫున అంతర్జాతీయ టీ20ల్లోకి ప్రవేశించిన ఈ యువ స్పిన్నర్, అదే ఏడాది డిసెంబర్‌లో వన్డేల్లో కూడా అరంగేట్రం చేశాడు. కివీస్ దేశవాళీ క్రికెట్‌లో పొదుపుగా బౌలింగ్ చేస్తూ వికెట్లు పడగొట్టే నైపుణ్యం ఉండటంతో సెలక్టర్లు అతడిని టీమిండియాతో జరిగే సిరీస్‌కు ప్రధాన అస్త్రంగా ఎంచుకున్నారు.
న్యూజిలాండ్‌లో స్థిరపడినా ఆదిత్యకు తన మాతృభూమితో అనుబంధం మాత్రం తెగిపోలేదు. తన బౌలింగ్ నైపుణ్యాలను మెరుగుపరుచుకోవడానికి అతను అప్పుడప్పుడూ చెన్నైకి వస్తుంటాడు. ముఖ్యంగా ప్రతిష్టాత్మకమైన చెన్నై సూపర్ కింగ్స్ (CSK) అకాడమీలో శిక్షణ పొందడం ద్వారా భారత ఉపఖండ పరిస్థితులపై పట్టు సాధించాడు. ఈ అనుభవం అతనికి భారత బ్యాటర్లను ఎదుర్కోవడంలో కీలకం కానుంది. వేలూరు నుంచి ఆక్లాండ్ వరకు సాగిన అతని క్రికెట్ ప్రయాణం ఎంతో మంది యువ క్రికెటర్లకు స్ఫూర్తినిస్తోంది.
కేవలం క్రికెట్ మైదానంలోనే కాకుండా, వ్యక్తిగత ఇష్టాల్లోనూ ఆదిత్య అచ్చమైన తమిళుడిగానే కనిపిస్తాడు. సూపర్ స్టార్ రజనీకాంత్‌కు అతను వీరాభిమాని కావడం విశేషం. తలైవా సినిమాలంటే పడిచచ్చే ఆదిత్య, మైదానంలో కూడా అదే వేగాన్ని, స్టైల్‌ను ప్రదర్శిస్తాడని అభిమానులు ఆశిస్తున్నారు. ఒకవైపు భారత జట్టును ఓడించాలనే లక్ష్యం, మరోవైపు తన పూర్వీకుల దేశంలో రాణించాలనే పట్టుదలతో ఆదిత్య అశోక్ ఈ తొలి వన్డేలో ఎలాంటి మ్యాజిక్ చేస్తాడో చూడాలి.