న్యూజిలాండ్ జట్టులో రజనీకాంత్ ఫ్యాన్ ఆదిత్య అశోక్,,,?

న్యూజిలాండ్ వన్డే జట్టులో సూపర్ స్టార్ రజనీకాంత్ ఫ్యాన్ ఉన్నాడు. దాంతో ఇప్పుడు ఆ ప్లేయర్ ఎవరు? ఎక్కడ పుట్టాడు అంటూ నెట్టింట తెగ సెర్చ్ చేస్తున్నారు. భారత్‌తో జరుగుతున్న తొలి వన్డేతో ఆదిత్య అశోక్ పేరు క్రికెట్ అభిమానుల్లో ఒక్కసారిగా ఆసక్తి రేపింది. భారత్‌లో పుట్టి న్యూజిలాండ్ తరఫున ఆడుతున్న ఈ ప్లేయర్ ఫుల్ డీటెయిల్స్ తెలుసుకోవాలంటే వార్తలోకి వెళ్లాల్సిందే!

ఆదిత్య అశోక్ తమిళనాడులోని వెల్లూరులో జన్మించాడు. నాలుగేళ్ల వయసు వరకూ భారత్‌లోనే పెరిగిన అతడు, తల్లిదండ్రుల ఉద్యోగ అవకాశాల కారణంగా ఆ తర్వాత న్యూజిలాండ్‌లోని ఆక్లాండ్‌కు వెళ్లాడు. అక్కడే క్రికెట్‌పై పూర్తి స్థాయిలో దృష్టి పెట్టిన ఆదిత్య, ఆక్లాండ్ డొమెస్టిక్ క్రికెట్‌లో రాణించాడు.

2020 అండర్-19 వరల్డ్ కప్‌లో న్యూజిలాండ్ తరఫున ప్రాతినిధ్యం వహించిన ఆదిత్య, ఆ తర్వాత దేశవాళీ క్రికెట్‌లో తన ప్రతిభను నిరూపించుకున్నాడు. 2021 డిసెంబరులో ఆక్లాండ్ జట్టుకు తరఫున టీ20 డెబ్యూ చేసిన అతడు, తక్కువ సమయంలోనే అన్ని ఫార్మాట్లలో రెగ్యులర్ ఆటగాడిగా మారాడు. 2022-23 సీజన్ అతడి కెరీర్‌లో కీలక మలుపు. ఆ సీజన్‌లో అద్భుత ప్రదర్శనలతో న్యూజిలాండ్ యంగ్ క్రికెటర్ ఆఫ్ ది ఇయర్ అవార్డును కూడా అందుకున్నాడు.

యూఏఈ పర్యటనలో తొలి సారిగా న్యూజిలాండ్ జాతీయ జట్టుకు ఎంపికైన ఆదిత్య, అక్కడ టీ20 అంతర్జాతీయ మ్యాచ్ ఆడాడు. ఆ తర్వాత బంగ్లాదేశ్‌తో వన్డే సిరీస్‌లో వన్డే డెబ్యూ కూడా చేశాడు. అయితే వెన్నెముక గాయం అతడి కెరీర్‌కు తాత్కాలిక బ్రేక్ వేసింది. ఇప్పటివరకు మూడు అంతర్జాతీయ మ్యాచ్‌ల్లో రెండు వికెట్లు సాధించాడు.

ఆదిత్య అశోక్‌కు క్రికెట్ ఎంత ఇష్టమో, తమిళ సూపర్ స్టార్ రజనీకాంత్ అంటే అంతే అభిమానం. అతడి బౌలింగ్ చేయి మీద “ఎన్ వళి తని వళి” అనే తమిళ డైలాగ్ టాటూ ఉంది. ఇది పదయప్ప సినిమాలో తెలుగులో నరసింహ మూవీలో డైలాగ్. నరసింహ సినిమాలో రజనీకాంత్ ఫేమస్ డైలాగ్ 'నా దారి రహదారి'ని ఆదిత్య తన చేతిపై వేయించుకున్నాడు. ఈ సినిమా అతడు తన తాతతో కలిసి చూసిన చివరి చిత్రం కావడంతో, ఈ డైలాగ్ ఎంతో ప్రత్యేకమైందని చెప్పుకొచ్చాడు.

భారత ఉపఖండ పరిస్థితులకు అలవాటు పడేందుకు, 2025లో ఆదిత్య చెన్నై సూపర్ కింగ్స్ అకాడమీలో కొన్ని వారాలు శిక్షణ తీసుకున్నాడు. అదే శిక్షణ ఇప్పుడు భారత్‌తో జరుగుతున్న సిరీస్‌లో అతడికి ఉపయోగపడే అవకాశం ఉంది. భారత గడ్డపై న్యూజిలాండ్ తరఫున బరిలోకి దిగిన ఈ వెల్లూరు కుర్రాడు, తన స్పిన్ మంత్రంతో ఎలాంటి ప్రభావం చూపిస్తాడోనని అందరూ ఎదురుచూస్తున్నారు.