హై బీపీ + షుగర్ + గుండె జబ్బులు అన్నింటికీ ఒకే ఒక పరిష్కారం

నేటి బిజీ లైఫ్‌స్టైల్ చాలా మందికి ఎన్నో ఆరోగ్య సమస్యల్ని తీసుకువస్తుంది. ముఖ్యంగా డయాబెటిస్, ఊబకాయం, అధిక రక్తపోటు, కొలెస్ట్రాల్, గుండె జబ్బులు వంటి జీవనశైలి సంబంధిత వ్యాధులు వేగంగా పెరుగుతున్నాయి. వీటికి ఎన్నో కారణాలు ఉన్నాయి. ముఖ్యంగా ఉరుకుల పరుగుల జీవితం, తిండి అలవాట్లు, పొల్యూషన్ వల్ల ఎక్కువ మంది లైఫ్‌స్టైల్ వ్యాధుల బారిన పడుతున్నారు.

ఇక, పని ఒత్తిడి కూడా చాలా మంది అనుభవిస్తున్నారు. ఒత్తిడి పెరగడం వల్ల డిప్రెషన్, ఆందోళన వంటి మానసిక సమస్యలు కూడా సర్వసాధారణంగా మారుతున్నాయి. ఇవన్నీ జీవనశైలికి సంబంధించిన వ్యాధులు. అందుకే వీటిని నియంత్రణలో ఉంచుకోవాలంటే జీవనశైలిలో మార్పులు అవసరం.

ఇందుకోసం వ్యాయామం చేయడానికి ఎక్కువ సమయం కేటాయించాల్సిన అవసరం లేదు. ఆరోగ్యకరమైన ఆహారాన్ని తినండి. మీ దినచర్యలో చిన్న, ఆరోగ్యకరమైన అలవాట్లను చేర్చుకోండి. డాక్టర్ షాలిని సింగ్ సలుంకే.. ఒక ఇన్‌స్టాగ్రామ్ పోస్ట్ ద్వారా ఈ వ్యాధులన్నింటి నుంచి మిమ్మల్ని దూరంగా ఉంచడంలో సాయపడే అటువంటి ఓ టెక్నిక్ పంచుకున్నారు. ఆ పూర్తి వివరాల గురించి ఇప్పుడు తెలుసుకుందాం.

మీ రోజువారీ దినచర్యలో కేవలం ఒక అలవాటును చేర్చుకోవడం వల్ల మధుమేహం, కొలెస్ట్రాల్, అధిక రక్తపోటు, గుండె జబ్బులు వంటి జీవనశైలికి సంబంధించిన వ్యాధుల నుంచి రక్షించుకోవచ్చు. ఈ విషయాన్ని స్వయంగా డాక్టర్ షాలింగ్ సింగ్ చెప్పారు. ఇది మానసిక అనారోగ్యాన్ని కూడా నివారిస్తుంది. ఈ అలవాటు ఏంటో కాదు ధ్యానం.

ప్రపంచవ్యాప్తంగా వందలాది మందిపై పరిశోధన చేసిన తర్వాత, ప్రతిరోజూ 10 నుంచి 15 నిమిషాలు ఐదు రకాల ధ్యానం చేయడం వల్ల రక్త ప్రసరణ మెరుగుపడుతుందని నిరూపించబడింది. ఇది ప్రధాన శారీరక, మానసిక అనారోగ్యాలను తగ్గిస్తుంది. ఇవన్నీ ఒకే సెట్‌ కిందకి వస్తాయి. ఈ ఐదు రకాల ధ్యానాలపై ఓ లుక్కేద్దాం.

మైండ్‌ఫుల్ మూవ్‌‌మెంట్

ఇందులో మొదటి ధ్యానాన్ని మైండ్‌ఫుల్ మూవ్‌మెంట్ అంటారు. ఇది చాలా సులభం కానీ ప్రభావవంతంగా ఉంటుంది. ప్రతిరోజూ నడుస్తున్నప్పుడు లేదా స్ట్రెచింగ్ చేస్తున్నప్పుడు మీ కదలికలపై దృష్టి పెట్టాలని డాక్టర్ సిఫార్సు చేస్తున్నారు. మీరు దీన్ని 10 నుంచి 15 నిమిషాలు చేయవచ్చు. ఈ సమయంలో మ్యూజిక్ సౌండ్స్ లేదా సంభాషణను నివారించండి. మీ కదలికలపై మాత్రమే మీ దృష్టిని కేంద్రీకరించండి.

నవ్వుతూ ధ్యానం చేయడం

ఈ ధ్యానం మీ మానసిక, శారీరక ఆరోగ్యాన్ని మెరుగుపర్చడంలో చాలా ప్రభావవంతంగా ఉంటుంది. రోజు చివరిలో సానుకూల, సంతోషకరమైన క్షణాలను వివరంగా గుర్తుచేసుకోండి. మీరు వాటిని గుర్తుంచుకున్నప్పుడు సంతోషంగా ఉండండి, హాయిగా నవ్వండి ఈ జ్ఞాపకాలు చిన్నవి లేదా పెద్దవి కావచ్చు. ఈ చిన్న పని మిమ్మల్ని ఎంతో సంతోషంగా ఉంచుతుంది. టెన్షన్స్‌ని పక్కన పెట్టేలా చేస్తుంది.

నెమ్మదిగా శ్వాస తీసుకునే ధ్యానం

నెమ్మదిగా శ్వాస తీసుకోవడం అంటే నెమ్మదిగా, లోతైన శ్వాసలు తీసుకోవడం. ఈ ధ్యానంలో మీరు కొద్దిసేపు కూర్చుని నెమ్మదిగా, లోతుగా శ్వాస తీసుకోండి. మీరు ఒక నిమిషంలో నాలుగు నుంచి ఆరు సార్లు నెమ్మదిగా శ్వాస తీసుకోండి. ఇది మిమ్మల్ని లోపలి నుంచి ప్రశాంతపరుస్తుంది. ఇది మీ శారీరక ఆరోగ్యంపై సానుకూల ప్రభావాన్ని చూపుతుంది.

బాడీ స్కాన్ మెడిటేషన్

ఈ ధ్యానంలో మీరు మీ మొత్తం శరీరానికి విశ్రాంతి ఇవ్వండి. దీని కోసం హాయిగా కూర్చోండి లేదా పడుకోండి. ఇప్పుడు మీ దృష్టిని మొత్తం శరీరంపైకి తీసుకురండి. అంటే పాదాల నుంచి తల వరకు అనుభూతి చెందండి. నెమ్మదిగా ఏదైనా అలసట లేదా ఉద్రిక్తతను విడుదల చేయండి.

మైండ్‌ఫుల్‌నెస్ 

ఈ ధ్యానాన్ని సాధన చేయడానికి మీరు ప్రతిరోజూ కొన్ని నిమిషాలు ఖచ్చితంగా తీసుకోవాలి. నిశ్శబ్దంగా కూర్చుని మీ శ్వాసపై దృష్టి పెట్టండి. చాలా ఆలోచనలు మనసులోకి వచ్చే అవకాశం ఉంది. కానీ వాటిపై ఎక్కువ శ్రద్ధ చూపకండి లేదా మిమ్మల్ని మీరు అంచనా వేయకండి. ఆందోళన తగ్గించుకోవడానికి ఇది చాలా మంచి అలవాటు అని వెద్యులు అంటున్నారు.