జనవరి 29న బడ్జెట్ 2026: సామాన్యులకు శుభవార్తేనా?

Economic Survey 2026:ప్రస్తుత ఆర్థిక సంవత్సరం 2025–26కు సంబంధించిన ఆర్థిక సర్వేను గురువారం, జనవరి 29న కేంద్ర ప్రభుత్వం విడుదల చేయనుంది. ఆర్థిక మంత్రిత్వ శాఖలోని ఆర్థిక వ్యవహారాల విభాగం రూపొందించిన ఈ నివేదికను ఆర్థిక మంత్రి నిర్మలా సీతారామన్ పార్లమెంట్‌లో సమర్పించనున్నారు.ప్రధాన ఆర్థిక సలహాదారు (Chief Economic Advisor) నేతృత్వంలో పనిచేసే నిపుణుల బృందం ఈ సర్వే నివేదికను సిద్ధం చేసి ఆర్థిక మంత్రిత్వ శాఖకు అందజేస్తుంది.ఈ ఏడాది బడ్జెట్ సమావేశాల తొలి దశ జనవరి 28న ప్రారంభమై ఫిబ్రవరి 13 వరకు కొనసాగనుంది. కేంద్ర బడ్జెట్‌ను ఫిబ్రవరి 1న పార్లమెంట్‌లో ప్రవేశపెట్టనున్నారు. సాధారణంగా బడ్జెట్‌కు ముందు రోజు ఆర్థిక సర్వేను విడుదల చేస్తారు. అయితే ఈసారి కొన్ని రోజుల ముందుగానే సర్వే నివేదికను సమర్పించనున్నారు.
ఆర్థిక సర్వేలో ఏముంటుంది? దాని ప్రాముఖ్యత ఏమిటి?బడ్జెట్ అనేది రాబోయే ఆర్థిక సంవత్సరానికి ప్రభుత్వ ఆదాయాలు, ఖర్చులపై చేసే అంచనా. ప్రభుత్వానికి ఎంత ఆదాయం లభించనుంది, ఎంత అప్పు తీసుకోనుంది, ఏ శాఖలకు ఎంత నిధులు కేటాయించాలి వంటి అంశాలపై ముందస్తు ప్రణాళికను బడ్జెట్ రూపంలో వెల్లడిస్తారు.కానీ ఆర్థిక సర్వే దేశ ఆర్థిక వ్యవస్థ యొక్క వాస్తవ స్థితిని విశ్లేషిస్తుంది. గత ఆర్థిక సంవత్సరంలో దేశం సాధించిన మొత్తం ఆర్థిక పనితీరును ఇది సమగ్రంగా పరిశీలిస్తుంది. వ్యవసాయం, పరిశ్రమలు, సేవల రంగం సహా వివిధ విభాగాల పురోగతిని ఈ నివేదికలో సమీక్షిస్తారు.అలాగే జిడిపి వృద్ధి రేటు, ద్రవ్యోల్బణం, ద్రవ్యలోటు వంటి కీలక ఆర్థిక సూచకాలపై విస్తృత డేటాను ఈ సర్వే అందిస్తుంది. భవిష్యత్ ఆర్థిక విధానాలు, సంస్కరణలకు అవసరమైన సూచనలు కూడా ఇందులో పొందుపరిచారు. మొత్తంగా, దేశ స్థూల ఆర్థిక పరిస్థితిపై ప్రభుత్వానికి స్పష్టమైన అవగాహన కల్పించే ముఖ్యమైన పత్రంగా ఆర్థిక సర్వే నిలుస్తుంది.