25 ఏళ్ల హోమ్ లోన్ 10 ఏళ్లలో కట్టేయొచ్చు.. లక్షల్లో వడ్డీ ఆదా

సొంతింటి కల సాకారం చేసుకునేందుకు ప్రస్తుత రోజుల్లో చాలా మంది బ్యాంకులు, ఇతర ఫైనాన్షియల్ సంస్థల వద్ద గృహ రుణం తీసుకుంటున్నారు. లక్షల్లో లోన్ కావడంతో దీర్ఘకాలం పాటు తిరిగి చెల్లించేలా ప్లాన్ చేసుకుంటున్నారు. అయితే, కాల పరిమితి ఎక్కువగా ఎంచుకుంటే చెల్లించే వడ్డీ భారీగా ఉంటుంది. కొన్నిసార్లు అసలు కంటే వడ్డీనే ఎక్కువ కట్టాల్సి వస్తుంది. ఉదాహరణకు 25 ఏళ్ల పాటు ఈఎంఐ కట్టాలని నిర్ణయించుకుంటే అది పెద్ద భారంగా మారుతుంది. జీతంలో మెజారిటీ వాటా ఈఎంఐలకే పోతే ఆర్థికంగా ఇబ్బందులు ఎదుర్కోవలసి వస్తుంది. అయితే, సరైన ప్లాన్, ఆర్థిక క్రమశిక్షణ ఉంటే 25 ఏళ్ల రుణ చెల్లింపు కాలాన్ని 10 ఏళ్లలోనే పూర్తి చేయవచ్చు. అందుకోసం కొన్ని సింపుల్ టిప్స్ పాటిస్తే సరిపోతుంది. మరి అవేంటో ఇప్పుడే మనం తెలుసుకుందాం.

సాధారణంగా బ్యాంకులు హోమ్ లోన్ తీసుకున్న మొదట్లో మీరు చెల్లించే ఈఎంఐలో అధిక భాగం వడ్డీ కిందనే జమ చేసుకుంటాయి. ఈ విషయం చాలా మందికి తెలియదు. ఉదాహరణకు 8.50 శాతం వడ్డీతో రూ.50 లక్షల హోమ్ లోన్ 25 ఏళ్ల కాల పరిమితితో తీసుకున్నారు అనుకుంటే నెలవారీ ఈఎంఐ రూ.40 వేల వరకు కట్టాల్సి వస్తుంది. ఏడాదికి రూ.4.83 లక్షలు చెల్లించాల్సి వస్తుంది. అందులో రూ.60 వేలు మాత్రమే అసలు కింద జమ చేసుకుంటారు. మిగిలిన రూ.4.23 లక్షలు వడ్డీనే అని గుర్తుంచుకోవాలి. అందుకే హోమ్ లోన్ త్వరగా ముగించేందుకు తొలి 5-7 ఏళ్లు చాలా కీలకం.

ఏడాదికి 13 ఈఎంఐలు

లోన్ కాలపరిమితి తగ్గించేందుకు సులభమైన మార్గం అదనపు ఈఎంఐ చెల్లింపు. ఏడాదికి 12 వాయిదాలకు బదులుగా 13 ఈఎంఐలు చెల్లించాలి. అంటే ఏడాదిలో ఒకసారి మీ ఈఎంఐకి సమానమైన మొత్తాన్ని నేరుగా అసలు కింద జమ చేయాలి. ఇలా చేసినట్లయితే మీ 25 ఏళ్ల లోన్ టెన్యూర్ ఏకంగా 20 ఏళ్లకు దిగొస్తుంది. మీకు లభించే బోనస్ లేదా అదనపు ఆదాయం ఇందు కోసం ఉపయోగిస్తే సరిపోతుంది. జీతం పెరిగినప్పుడల్లా పెరిగిన ఆదాయాన్ని లోన్ భారాన్ని తగ్గించుకునేందుకు ఉపయోగించాలి.

స్టెప్-అప్ ఈఎంఐ విధానం

ఉద్యోగులకు ప్రమోషన్లు, పే హైక్‌లు ఉంటాయి. వీటి ద్వారా సమకూరే ఆర్థిక లబ్ధిని తెలివిగా ఉపయోగించాలి. మీ జీతం పెరిగినట్లే, మీ ఈఎంఐని కూడా కొంత పెంచుకుంటూ వెళ్తే బెటర్. దీన్నే స్టెప్-అప్ ఈఎంఐ అంటారు. మీ ఈఎంఐని ప్రతి ఏడాది 7.5 శాతం పెంచుకుంటే మీ లోన్ టెన్యూర్ 25 ఏళ్ల నుంచి 12 ఏళ్లకు దిగొస్తుంది. చదవేందుకు ఆశ్చర్యంగా ఉన్నా లెక్కేస్తే అసలు విషయం మీకే అర్థమవుతుంది. తొలి ఏడాది రూ.40 వేల ఈఎంఐ కడితే రెండో ఏడాది రూ.43 వేలు, ఆ తర్వాత ఏడాది రూ.46,225 ఇలా పెంచుకుంటూ వెళ్లాలి. దీంతో మీ అసలు వేగంగా తగ్గి వడ్డీ భారం తప్పుతుంది.

10 ఏళ్లలోనే అప్పు ఎలాగైనా తీర్చాలని గట్టిగా అనుకుంటే పైన చెప్పిన టిప్స్ పాటిస్తే సాధ్యమవుతుంది. ఏటా ఒక అదనపు ఈఎంఐ చెల్లించడం, నెలవారీ ఈఎంఐ 7.5 శాతం నుంచి 10 శాతం పెంచడం వంటివి చేయాలి. ఈ వ్యూహంతో 10 ఏళ్లలోనే రుణ విముక్తులు అవుతారు. అంతే కాదు లక్షల్లో వడ్డీ ఆదా అవుతుంది. రూ.50 లక్షల లోన్ తీసుకున్న వారికి రూ.40 లక్షల వరకు వడ్డీ మిగులుతుంది. దానిని పిల్లల చదువులు, పదవీ విరమణ ప్రణాళికలకు ఉపయోగించుకోవచ్చు.