తండ్రి సంపాదించిన ఆస్తులపై కొడుకుకు హక్కు ఉండదు....కేరళ హైకోర్టు

తండ్రి, వారసత్వ ఆస్తిపై కుమారుడికి ఉండే హక్కుల గురించి.. కేరళ హైకోర్టు ఇచ్చిన తీర్పు ఇప్పుడు తీవ్ర చర్చకు దారి తీసింది. ఒక వ్యక్తి తన తండ్రి ఆస్తికి సంబంధించి దాఖలు చేసిన కేసులో విచారణ జరిపిన కేరళ హైకోర్టు.. సంచలన తీర్పును వెలువరించింది. తండ్రికి వారసత్వంగా వచ్చిన ఆస్తిపై మాత్రమే కుమారుడికి పుట్టుకతో హక్కులు ఉంటాయని తెలిపిన న్యాయస్థానం.. ఒకవేళ ఆ ఆస్తి తండ్రి కష్టార్జితం అయితే దానిపై కుమారుడికి ఎలాంటి హక్కులు ఉండవని వెల్లడించింది. తండ్రి తాను సంపాదించిన ఆస్తిని.. ఎవరికైనా ఇచ్చే వెసులుబాటు ఉంటుందని.. కచ్చితంగా కుమారుడికే ఇవ్వాలని ఎక్కడా లేదని తేల్చి చెప్పింది.

హిందూ వారసత్వ చట్టంపై కేరళ హైకోర్టు తాజాగా ఈ ముఖ్యమైన తీర్పును వెలువరించింది. ఒక వ్యక్తికి వారసత్వ ఆస్తి విభజన ద్వారా వాటాను పొందితే.. అది అతని సొంత ఆస్తిగా పరిగణించబడినప్పటికీ.. అతనికి కొడుకు పుట్టిన వెంటనే ఆ ఆస్తి కొడుకుతో కలిసి సహ వారసత్వ ఆస్తిగా మారుతుందని తెలిపింది. అసలు ఆ ఆస్తిని తండ్రి స్వయంగా సంపాదించింది అయితే.. కొడుకుకు పుట్టుకతోనే దానిపై హక్కు రాదని తేల్చి చెప్పింది. అలాంటి ఆస్తిని తండ్రి తన ఇష్టానుసారం అమ్ముకోవచ్చు లేదా ఎవరికైనా బహుమతిగా ఇవ్వవచ్చని స్పష్టం చేసింది.

కేరళకు చెందిన ఓ వ్యక్తి.. తన తండ్రి ఆస్తిని తనకు ఇవ్వకుండా దూరం చేశాడని కుమారుడు కోర్టును ఆశ్రయించాడు. 46 సెంట్ల భూమిని ఆ వ్యక్తి తన భార్యకు బహుమతిగా ఇవ్వగా.. ఆమె దాన్ని తమ కుటుంబంలోని ఐదుగురు సభ్యులకు పంచి ఇస్తున్నట్లు వీలునామా రాసింది. అయితే ఆ ఆస్తిని తాత స్వయంగా కొనుగోలు చేశారని.. తండ్రి కష్టార్జితం కాదని కోర్టు నిర్ధారించింది. అయితే తండ్రికి అది తన వాటాగా, సోదరి నుంచి రిలీజ్ డీడ్ ద్వారా వచ్చినందున.. అది అతని వ్యక్తిగత ఆస్తిగానే కోర్టు పరిగణించబడింది. దీంతో ఆ ఆస్తిపై కొడుకుకు ప్రత్యేక హక్కు లేదని కోర్టు తేల్చి చెప్పింది.

తండ్రి తన కష్టపడి సంపాదించిన ఆస్తిని తన భార్యకు బహుమతిగా ఇవ్వడం.. ఆమె ద్వారా ఇతరులకు వీలునామా రాయించడం చెల్లుబాటు అవుతుందని ఈ కేసులో హైకోర్టు తీర్పునిచ్చింది. ఈ తీర్పుతో ఆస్తి పంపకాల విషయంలో తండ్రి నిర్ణయమే ఫైనల్ అని మరోసారి కోర్టు రుజువు చేసింది. అందుకే ఉమ్మడి కుటుంబాల్లో ఇలాంటి వివాదాలు రాకుండే ఉండేందుకు.. ఆస్తి ఎలా సంక్రమించింది (వారసత్వంగానా లేక కష్టపడి సంపాదించిందా) అనేది స్పష్టంగా పత్రాల్లో రాసుకోవాలని న్యాయ నిపుణులు సూచిస్తున్నారు.