స్టేట్ పాలిటిక్స్ లో హాట్‌టాపిక్‌గా మారిన‌ ఆర్కే!

ఆర్కే...రాష్ట్ర రాజకీయాల్లో సంచలనాలకు కేరాఫ్ అడ్రస్. మాజీ సీఎం చంద్రబాబు సర్కార్ తప్పులను ఎప్పటికప్పుడు నిలదీస్తూ న్యాయ పోరాటం చేశారు. ఓటుకు నోటు కేసులో సుప్రీంకోర్టు వరకూ వెళ్లి చంద్రబాబుని ఇరుకున పెట్టినా, రాజధాని భూములపై రైతుల పక్షాన నిలబడినా, సీఎం తనయుడు లోకేష్‌పై విజయం సాధించినా ఆ క్రెడిట్ ఆయనకే దక్కింది. తాజాగా మంగళగిరి నియోజకవర్గం పరిధిలోని ఉండవల్లిలో ప్రజావేదిక కూల్చివేతతో మరోసారి తెరమీదకొచ్చారు ఆర్కే. ప్రజావేదిక కూల్చివేతతో ఏపీలో రాజకీయాలు వేడెక్కాయి. అధికార వైసీపీ, ప్రతిపక్ష టీడీపీల మధ్య మాటల యుద్ధం కొనసాగుతోంది. అయితే, అక్రమ కట్టడాలపై పోరాటం మొదలుపెట్టిన వ్యక్తిగా స్థానిక ఎమ్మెల్యే, రాష్ట్ర మంత్రి ఆళ్ల రామకృష్ణారెడ్డి హాట్ టాపిక్‌‌గా మారారు. టీడీపీ హయాంలో అక్రమాలు, నిబంధనలు అతిక్రమించి నిర్మించిన కట్టడాలపై ఆయన హైకోర్టును ఆశ్రయించారు. దీంతో చంద్రబాబు సర్కార్‌కు హైకోర్టు నోటీసులు కూడా ఇచ్చింది. ఇప్పటికీ చంద్రబాబు నివాసంపై కోర్టులో విచారణ కొనసాగుతోంది. తాజాగా వైసీపీ అధికారంలోకి రావడంతో అక్రమ కట్టడాలపై దృష్టిసారింది.  గతంలో అక్రమ నిర్మాణాలకు వ్యతిరేకంగా ఆళ్ల రామకృష్ణారెడ్డి చేసిన పోరాటాల ఫలితంగానే జగన్ సర్కార్ చర్యలు చేపట్టిందని ఆ పార్టీ వర్గాల వాదన. అయితే, ఆర్కే కూడా.. చంద్రబాబు నివాసంపై వేసిన కేసు ప్రస్తుతం కోర్టులో ఉందని, ఆయన నివాసం ఖాళీ చేయించే వరకూ తన పోరాటం కొనసాగుతోందని చెబుతున్నారు. మరోవైపు ఓటుకు నోటు కేసులో కూడా చంద్రబాబు పాత్రపై విచారణ జరపాలంటూ ఆర్కే సుప్రీంకోర్టు దాకా వెళ్లారు. రాజధాని భూముల వ్యవహారంలోనూ ప్రభుత్వ తీరుకు వ్యతిరేకంగా కోర్టును ఆశ్రయించారు. ల్యాండ్ పూలింగ్‌లో ప్రభుత్వానికి భూములు ఇవ్వని రైతుల పక్షాన నిలబడి వారికి అండగా ఉన్నారు ఆర్కే. అంతేకాదు తాజాగా ఎన్నికల్లో నారా లోకేష్‌పై ఆయన సంచలన విజయం సాధించారు. వరుస సంచలనాలతో సంచలనాలకు మారుపేరుగా నిలిచిన ఆర్కే తాజాగా కరకట్టపై అక్రమ కట్టడాల కూల్చివేతతో మరోసారి హాట్ టాపిక్‌గా మారారు. ఆయన ముందు నుంచి చెబుతున్నట్టుగానే సీఎం జగన్ అక్రమ కట్టడాలన్నీ తొలగిస్తున్నారు. దీంతో ఆ క్రెడిట్ మొత్తం ఆర్కేదే నంటున్నారు వైసీపీ నేతలు.