ఇంగ్లాండ్ ఫైనాన్స్ మినిస్టర్‌గా నారాయణమూర్తి అల్లుడు!

బ్రిటన్ ఎన్నికల్లో బోరిస్ జాన్సస్ నాయకత్వంలోని కన్జర్వేటివ్ పార్టీ ఘన విజయం సాధించి, అధికారంలోకి వచ్చింది. కన్జర్వేటివ్ పార్టీ 364కిపైగా స్థానాల్లో విజయం సాధించగా, 32 ఏళ్ల తర్వాత ఆ పార్టీకి లభించిన అత్యంత భారీ విజయం ఇదే. ఇక, ఈ ఎన్నికల్లో భారత సంతతికి చెందిన పలువురు ప్రజాప్రతినిధులుగా ఎన్నికయ్యారు. వీరిలో ఇన్ఫోసిస్ సంస్థ వ్యవస్థాపకుడు నారాయణమూర్తి అల్లుడు రిషి సునక్‌ (39) కన్జర్వేటివ్ పార్టీ తరఫున రిచ్‌మండ్ స్థానం నుంచి విజయం సాధించారు.
ప్రధాని బోరిస్ జాన్సన్‌కి రిషి అత్యంత సన్నిహితుడుగా గుర్తింపు ఉంది. గత ప్రభుత్వంలో డిప్యూటీ ఫైనాన్స్ మినిస్టర్‌గా రిషి బాధ్యతలు నిర్వర్తించారు. రిషి పనితీరు పట్ల ప్రధాని బోరిస్‌ అత్యంత సంతృప్తిగా ఉన్నట్లు ఆయన సన్నిహితులు పేర్కొన్నారు. ఈ మేరకు ఫైనాన్షియల్‌ టైమ్స్‌ పత్రిక ఓ కథనం ప్రచురించింది. ఎన్నికల సమయంలో పార్టీ అభ్యర్థిగా బోరిస్ జాన్సన్‌కు మద్దతుగా నిలిచి టీవీ చర్చల్లో చురుగ్గా పాల్గొన్న రిషి.. పార్టీ గెలుపులో కీలక పాత్ర పోషించారు. వచ్చే ఏడాది ఫిబ్రవరిలో జరిగబోయే క్యాబినెట్ విస్తరణలో ఆయనకు ఆర్థిక మంత్రి పదవి కట్టబెట్టే అవకాశం ఉంది.
ప్రస్తుతం ఉన్న ఆర్థిక శాఖను మరింత విస్తృతపరిచేందుకు అంతర్జాతీయ వ్యాపార విభాగం లాంటి ఉపశాఖల్ని విలీనం చేయాలని బోరిస్ భావిస్తున్నట్లు రాజకీయ వర్గాల్లో చర్చ జోరుగా నడుస్తోంది. కొత్తగా ఏర్పాటయ్యే ఈ శాఖ బాధ్యతలను రిషికి అప్పగించనున్నారు.
ఇన్ఫోసిస్ ఛైర్మన్ నారాయణమూర్తి అల్లుడైన రిషి సునక్‌.. ఇంగ్లాండ్‌లో హాంప్‌షైర్‌ కౌంటీలో జన్మించారు. ఆక్స్‌ఫర్డ్ యూనివర్సిటీలో ఫిలాసఫీ, పాలిటిక్స్, ఎకనమిక్స్‌లో డిగ్రీ పూర్తిచేశారు. తర్వాత స్టాన్‌ఫర్డ్‌ యూనివర్శిటీలో ఎంబీఏ చదువుతోన్న రోజుల్లో సహ విద్యార్థిని, నారాయణమూర్తి కుమార్తె అక్షతతో ప్రేమలో పడిన రిషి ఆమెను 2009లో పెళ్లిచేసుకున్నారు. వీరికి ఇద్దరు అమ్మాయిలు ఉన్నారు.
మాజీ ప్రధాని థెరిసా మే ప్రభుత్వంలోనూ మంత్రిగా పనిచేసిన రిషి.. ఇటీవల ఎన్నికల్లో విజయం తర్వాత సభలో ప్రమాణస్వీకారం సందర్భంగా భగవద్గీతపై ప్రమాణం చేసి వార్తల్లో నిలిచారు. కన్జర్వేటివ్ పార్టీ ట్రేజరీ విభాగానికి చీఫ్ సెక్రటరీగా సునక్ కొనసాగుతున్నారు. రాజకీయాల్లోకి రాక ముందు గోల్డ్‌మన్ సాచ్‌లో ఇన్వెస్టిమెంట్ ఎనలిస్ట్‌గా చేరి తర్వాత అందులో భాగస్వామి అయ్యారు. అంతేకాదు, నారాయణమూర్తి సంస్థ కాటమ్రాన్ వెంచర్స్‌ డైరెక్టర్‌గానూ ఉన్నారు.