అర్ధరాత్రి ఇంట్లోకి చొరబడి అత్యాచారయత్నం.. అపై..
national | Suryaa Desk | Published : Thu, Jun 04, 2020, 04:09 PM
ఒంటరి మహిళపై కన్నేసిన ఓ యువకుడు.. అర్ధరాత్రి ఇంట్లోకి చొరబడి అత్యాచారయత్నం చేశాడు. ఆమె ప్రతిఘటించడంతో దోశపెంకుతో దాడి చేసి చంపేశాడు. తమిళనాడులోని తిర్పూరు జిల్లా తిరుమురుగన్పూంది ప్రాంతంలో బుధవారం రాత్రి ఈ దారుణం జరిగింది. పోలీసులు తెలిపిన వివరాల ప్రకారం.. ముత్తు లక్ష్మి అనే 49 ఏళ్ల మహిళ పాండ్యన్ నగర్లో ఒంటరిగా నివసిస్తోంది. ఆమె ఇంటికి సమీపంలోనే భూపతి అనే 22 ఏళ్ల యువకుడు నివసిస్తున్నాడు. ముత్తులక్ష్మి ఒంటరి మహిళ కావడంతో ఆమెపై కన్నేశాడు భూపతి.
ఆమెను ఎలాగైన లోబరచుకోవాలని ప్లాన్ చేశాడు. ఈ క్రమంలోనే బుధవారం రాత్రి మద్యం మత్తులో ఇంట్లోకి చొరబడి అత్యాచారానికి యత్నించాడు. ఐతే ముత్తు లక్ష్మి అతడిని ప్రతిఘటించి దాడిచేసింది. ఆమె అడ్డుకోవడంతో తీవ్ర ఆగ్రహానికి గురైన భూపతి.. కిచెన్లో ఉన్న దోశపెంకు తీసుకొని తలపై దాడిచేశాడు. తలకు బలమైన గాయం కావడంతో తీవ్ర రక్తస్రావమై అక్కడికక్కడే మరణించింది. ఆమె చనిపోయిందని నిర్ధారించుకున్న తర్వాత అక్కడి నుంచి పారిపోయాడు. సమాచారం అందుకున్న పోలీసులు ఘటనా స్థలానికి వెళ్లి పరిశీలించారు. మృతదేహాన్ని పోస్టుమార్టం కోసం జిల్లా ఆస్పత్రికి తరలించారు. ఘటనపై కేసు నమోదు చేసుకొని దర్యాప్తు చేస్తున్నారు. పరారీలో ఉన్న భూపతి కోసం గాలిస్తున్నారు.
|
|