అదిరే ఫీచర్లతో సోనీ ఎక్స్‌పీరియా కొత్త ఫోన్

టెక్ దిగ్గజం సోనీ తన కొత్త బడ్జెట్ స్మార్ట్ ఫోన్ సోనీ ఎక్స్ పీరియా 8 లైట్ ను లాంచ్ చేసింది. గత సంవత్సరం మొబైల్ వరల్డ్ కాంగ్రెస్ లో లాంచ్ అయిన సోనీ ఎక్స్ పీరియా 10 తరహాలో దీని స్పెసిఫికేషన్లు ఉన్నాయి. ఇందులో కేవలం ఒక్క వేరియంట్ మాత్రమే అందుబాటులో ఉంది. 4 జీబీ ర్యామ్ + 64 జీబీ స్టోరేజ్ తో వచ్చిన ఈ వేరియంట్ ధరను 29,800 జపాన్ యెన్‌లుగా(సుమారు రూ.20,800) నిర్ణయించారు. వైట్, బ్లాక్ రంగుల్లో ఈ ఫోన్ అందుబాటులో ఉంది. గ్లాసీ ఫినిషింగ్ ను ఇందులో అందించారు. సెప్టెంబర్ ఒకటో తేదీ నుంచి దీని సేల్ ప్రారంభం కానుంది. మనదేశంలో ఈ ఫోన్ ఎప్పుడు లాంచ్ అవుతుందో సోనీ తెలపలేదు.సోనీ ఎక్స్ పీరియా 8 లైట్ స్మార్ట్ ఫోన్ లో 6 అంగుళాల ఫుల్ హెచ్ డీ+ ట్రిల్యూమినస్ డిస్ ప్లేను అందించారు. దీని యాస్పెక్ట్ రేషియో 21:9గా ఉంది. క్వాల్ కాం స్నాప్ డ్రాగన్ 630 ప్రాసెసర్ పై ఈ ఫోన్ పనిచేయనుంది. 4 జీబీ ర్యామ్, 64 జీబీ స్టోరేజ్ ను ఇందులో అందించారు. దీన్ని మైక్రో ఎస్ డీ కార్డు ద్వారా 512 జీబీ వరకు పెంచుకోవచ్చు.ఇందులో వెనకవైపు రెండు కెమెరాలు ఉన్నాయి. వీటిలో ప్రధాన కెమెరా సామర్థ్యం 12 మెగా పిక్సెల్ కాగా, 8 మెగా పిక్సెల్ సామర్థ్యమున్న మరో కెమెరాను కూడా అందించారు. ఇందులో 21:9 వీడియో క్యాప్చరింగ్, బొకే ఎఫెక్ట్, ఈఐఎస్, 2x డిజిటల్ జూమ్, 4కే వీడియో రికార్డింగ్ వంటి ఫీచర్లను అందించారు. దీంతోపాటు ముందువైపు 8 మెగా పిక్సెల్ సెల్ఫీ కెమెరాను కూడా అందించారు.దీని బ్యాటరీ సామర్థ్యం 2870 ఎంఏహెచ్ గా ఉంది. 4జీ ఎల్టీఈ, బ్లూటూత్ వీ5.0, యూఎస్ బీ టైప్-సీ, వైఫై వంటి కనెక్టివిటీ ఫీచర్లు కూడా ఇందులో ఉన్నాయి. ఫింగర్ ప్రింట్ సెన్సార్ ను ఫోన్ పక్కభాగంలో అందించారు. దీని మందం 0.81 సెంటీమీటర్లుగానూ, బరువు 170 గ్రాములుగానూ ఉంది.