గూగుల్ ప్లే మ్యూజిక్ యాప్ వాడేవారికి షాక్

గూగుల్ ప్లే మ్యూజిక్ యాప్ యూజర్లకు గూగుల్ అలర్ట్ మెసేజ్ పంపిస్తోంది. గూగుల్ ప్లే మ్యూజిక్ డేటాను ఫిబ్రవరి 24న డిలిట్ చేస్తామని వార్నింగ్ మెసేజ్ పంపిస్తోంది. అంటే గూగుల్ ప్లే మ్యూజిక్ యాప్‌లో స్టోర్ చేసిన పాటలు, లైబ్రరీలో ఉన్న సాంగ్స్ లిస్ట్ డిలిట్ కానుంది. ఎనిమిదేళ్ల క్రితం ప్లే మ్యూజిక్ యాప్‌ను రూపొందించింది గూగుల్. ప్లే మ్యూజిక్ యాప్‌ను షట్ డౌన్ చేస్తున్నట్టు గతేడాదే గూగుల్ ప్రకటించింది. ఈ యాప్ స్థానంలో యూట్యూబ్ మ్యూజిక్ యాప్‌ను రీప్లేస్ చేయనుంది. ఫిబ్రవరి 24 నుంచి మీరు గూగుల్ ప్లే మ్యూజిక్ యాప్‌ను ఉపయోగించలేరు. సరిగ్గా అదే రోజున గూగుల్ ప్లే మ్యూజిక్‌లోని మీ డేటా డిలిట్ అవుతుంది. మ్యూజిక్ లైబ్రరీ, అప్‌లోడ్స్, పర్చేసెస్ లాంటివి ఏవీ ప్లే మ్యూజిక్‌లో ఉండవు. రికవర్ చేయడం కూడా సాధ్యం కాదు. మరి గూగుల్ ప్లే మ్యూజిక్ యాప్ యూజర్లు ఇప్పుడు ఏం చేయాలి? చాలా సింపుల్. గూగుల్ ప్లే మ్యూజిక్ యాప్‌లోని డేటాను యూట్యూబ్ మ్యూజిక్‌కు ట్రాన్స్‌ఫర్ చేసుకోవచ్చు. ఇందుకోసం యూట్యూబ్ మ్యూజిక్ కొత్త ఫీచర్ అందుబాటులోకి తీసుకొచ్చింది.
గూగుల్ ప్లే మ్యూజిక్ నుంచి యూట్యూబ్ మ్యూజిక్‌లోకి చాలా సులువుగా డేటా ట్రాన్స్‌ఫర్ చేయొచ్చు. ముందుగా మీ స్మార్ట్‌ఫోన్‌లో యూట్యూబ్ మ్యూజిక్ యాప్ డౌన్‌లోడ్ చేయాలి. ఆ తర్వాత ట్రాన్స్‌ఫర్ పైన క్లిక్ చేస్తే గూగుల్ ప్లే మ్యూజిక్ యాప్‌లోని డేటా మొత్తం యూట్యూబ్ మ్యూజిక్‌లోకి ట్రాన్స్‌ఫర్ అవుతుంది. గూగుల్ ప్లే మ్యూజిక్ యాప్‌లోని మ్యూజిక్ లైబ్రరీ, ప్లేలిస్ట్స్, ఇతర డేటా యూట్యూబ్ మ్యూజిక్‌లో కనిపిస్తుంది. మీరు ఇక యూట్యూబ్ మ్యూజిక్ ఉపయోగిస్తే సరిపోతుంది. ఫిబ్రవరి 24 నుంచి మీకు గూగుల్ ప్లే మ్యూజిక్ యాప్‌ ఎలాగూ పనిచేయదు.