ఇప్పటికీ నేను, అజహర్‌ మాట్లాడుకుంటాం : సంగీత బిజ్లానీ

ముంబయి: తాను ఇప్పటికీ మాజీ క్రికెటర్‌ అజహరుద్దీన్‌తో టచ్‌లో ఉన్నానని అంటున్నారు ఆయన మాజీ సతీమణి సంగీత బిజ్లానీ. 1990ల్లో బాలీవుడ్‌ చిత్ర పరిశ్రమలో ఒక వెలుగు వెలిగిన సంగీత.. అజహర్‌తో వివాహమయ్యాక సినిమాలకు పూర్తిగా దూరమయ్యారు. తాజాగా ఆమె ఓ ఇంటర్వ్యూలో సెకండ్‌ ఇన్నింగ్స్‌ గురించి, అజహర్‌తో తనకున్న బంధం గురించి మాట్లాడారు.

‘నేను అజహర్‌తో విడిపోయినప్పటికీ అతనితో ఇంకా టచ్‌లో ఉన్నాను. విడిపోయినంత మాత్రాన అతనితో మాట్లాడకుండా ఉండాలన్న నియమం లేదు. బహుశా బంధాలంటే అలాగే ఉంటాయేమో. ప్రస్తుతం నా జీవితంతో నేను సంతోషంగా ఉన్నాను. నా చుట్టూ ఏం జరుగుతోందో ప్రశాంతంగా గమనించే స్టేజ్‌లో ఉన్నాను. నేను ఎక్కువగా ధ్యానం చేస్తున్నందుకు నాలో ఈ ప్రశాంతత వచ్చిందేమో!’

‘నేను ‘అజహర్‌’ బయోపిక్‌ చూశాను. చెప్పాలంటే నాకు సినిమా నచ్చలేదు. అందులో నిజాలు చూపించకుండా కేవలం నాటకీయతకే ప్రాధ్యానం ఇచ్చారు. నేను, అజహర్‌ మొదటిసారి కలుసుకోవడం కూడా తప్పుగా చూపించారు. నాకు సినిమా అసలు నచ్చలేదు. నిజాలు చూపించి ఉంటే బాగుండేది. నా పాత్రలో నర్గీస్‌ ఫక్రీ నటించారు. ఆమె కన్నా కరీనా కపూర్‌ని ఎంచుకుని ఉంటే బాగుండేది. మేమిద్దరం ఒకేలా ఉంటామని అంటుంటారు చాలా మంది. అసలు సినిమా అలా ఎందుకు తీశారో నాకు అర్థం కాలేదు. ఈ సినిమా చూశాక చాలా మందికి అజహర్‌ చేసిన మ్యాచ్‌ ఫిక్సింగ్‌ సంఘటనే గుర్తొస్తుంది’

అనంతరం సినిమాల గురించి మాట్లాడుతూ.. ‘నాకు సినిమాలో అవకాశాలుచాలానే వచ్చాయి. కానీ నాకు నటించాలని అనిపించలేదు. ఈ సమయంలోనాకు ఎలాంటి పాత్రలు నప్పుతాయో అలాంటివే చేస్తాను. నాకు శ్రీదేవి నటించిన ‘ఇంగ్లిష్‌ వింగ్లిష్‌’ సినిమా నచ్చింది. ‘పింక్‌’, ‘పార్చ్‌డ్‌’ సినిమాలు కూడా చాలా బాగున్నాయి. ఇప్పుడు చిత్ర పరిశ్రమ కంటెంట్‌ ఉన్న చిత్రాలకే ప్రాధాన్యత ఇస్తోంది. ప్రస్తుతం ఓ సినిమాకి సంబంధించిన స్క్రిప్ట్‌ చదువుతున్నాను. నాకు నచ్చితే ఈ సినిమాతోనే నాసెకండ్‌ ఇన్నింగ్స్‌ మొదలవుతుంది’ అని చెప్పుకొచ్చారు సంగీత.