ఒంటరిగా కలవాలంటూ వేధింపులు.. డాక్టర్ పై కేసు నమోదు
Andhra Pradesh Telugu | Suryaa Desk | Published : Sun, Dec 26, 2021, 08:59 AM
ఓ మహిళా వైద్యురాలిని వేధింపులకు గురిచేస్తున్న ప్రైవేటు ఆసుపత్రి వైద్యుడిపై పోలీసులు కేసు నమోదు చేశారు. ఈ ఘటన ఏపీలోని కృష్ణా జిల్లాలో జరిగింది. కృష్ణాజిల్లా మైలవరంలోని కృష్ణకిశోర్ అనే వైద్యుడు తనను లైంగికంగా వేధిస్తున్నాడని ఓ మహిళా వైద్యురాలు విజయవాడ పడమట పోలీసులకు ఫిర్యాదు చేశారు. గతంలో తామిద్దరం కలిసి ఓ ఆసుపత్రిలో పనిచేశామని, ఆ సమయంలో తనను పెళ్లి చేసుకోవాలని కృష్ణకిశోర్ కోరాడని బాధితురాలు తెలిపారు. అతడిని పెళ్లి చేసుకునేందుకు తాను నిరాకరించానని, అప్పటినుంచి వేధించడం మొదలు పెట్టాడని బాధితురాలు ఫిర్యాదులో పేర్కొన్నారు. తన ఇంటికి వచ్చి బలవంతంగా తాళికట్టేందుకు ప్రయత్నించాడని, ఫోన్లో బెదిరిస్తున్నాడని ఫిర్యాదులో పేర్కొన్నారు. తనపై కక్ష పెంచుకున్న కిశోర్ తన భర్తను చంపేస్తానంటూ వేధింపులకు పాల్పడుతున్నట్టు ఆమె పోలీసులకు వివరించారు. ఒంటరిగా కలవాలని, తాను చెప్పిన చోటుకి రావాలని ఫోన్ చేసి బెదిరిస్తున్నాడని తెలిపారు. బాధితురాలి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.
|
|