అక్కడ వేడినీళ్ల స్నానం గగనంగా మారిందటా

సిరియాలో  వేడి నీటితో స్నానం చేయడం గగనంగా మారింది. దాంతో స్నానం చేయడానికి బాత్ హౌస్‌ల ముందు జనం క్యూలు కడుతున్నారు. అలెప్పోలోని పురాతన బాత్ హౌస్‌లకు మళ్లీ డిమాండ్ పెరిగింది. వేడి నీటి స్నానాల కోసం డబ్బులు చెల్లించుకుంటున్నారు. గంటల కొద్దీ క్యూలో నిలబడుతున్నారు. అక్కడ బాత్ హౌస్‌లకు ప్రత్యేక గుర్తింపు ఉంది. గతంలో అక్కడ జనం అప్పుడప్పుడు బాత్ హౌస్‌లకు వెళ్లి స్నానాలు చేస్తుండేవారు. అదొక సంప్రదాయంగా సాగేది. వేడి నీటి సవర్, మంచి శాస్త్రీయ సంగీతం, పాలరాతి ఆవిరి గదులు, ఫౌంటైన్లు ఉండడం ఈ స్నానపు గదుల ప్రత్యేకత. అందుకే మగవాళ్లు స్నానం చేయడానికి, మంచి సంగీతాన్ని ఆశ్వాదించడానికి, మంచి ఆహారం తినడానికి అక్కడకు వెళ్తుండేవారు. అయితే తర్వాత కాలంలో వీటికి డిమాండ్ పడిపోయి ఎవరూ అక్కడు వెళ్లేవారు కాదు. వెళ్లినా నెలకోసారి వెళ్లేవారు. దాంతో అక్కడ బాత్ హౌస్‌లు మూతబడ్డాయి. 2016లో అలెప్పో పూర్తి ప్రభుత్వ ఆధీనంలోకి వచ్చినప్పటికీ అక్కడ కేవలం పది మాత్రమే తిరిగి తెరుచుకోబడ్డాయి. మళ్లీ ఇన్నాళ్లకు ఆ స్నానపు గదులకు డిమాండ్ పెరిగింది. డీజిల్ ఇంధన కొరత వల్ల ఇళ్లలో 20 గంటల పాటు విద్యుత్ కోత విధిస్తున్నారు. దాంతో నీటి కొరత ఏర్పడింది. వేడి నీళ్లు పెట్టుకునే పరిస్థితి లేదు. ఇంట్లో అందరికీ స్నానాలు చేయడానికి సరిపడా నీరు ఉండకపోవడంతో స్నానాలు చేయడానికి బాత్ హౌస్‌లకు అందరూ పరుగులు తీస్తోన్నారు. దీంతో బాత్ హౌస్‌లు రద్దీగా మారాయి. మళ్లీ ఇక్కడ స్నానపు గదులకు గిరాకీ పెరుగుతుందని ఊహించలేదని అక్కడి వాటి యజమానులు అంటున్నారు. సిరియా యుద్ధం సమయంలో కొన్ని సార్లు నీటి కొరత, కరెంట్ కోతల కారణంగా ప్రజలు బాత్ హౌస్‌లకు వెళ్లేవారు. మళ్లీ ఇప్పుడు అక్కడ స్నానాలకు వెళ్తున్నారు. ఈ బాత్ హౌస్‌ల్లో పగటి పూట ఆడవాళ్లకు, సాయంత్రం పూట మగవాళ్లు స్నానాలు చేయడానికి అవకాశం ఇస్తారు. ఇంటి దగ్గర ఐదు నిమిషాలు పాటు చేసే స్నానాన్ని బాత్ హౌస్‌ల్లో ఐదు గంటల పాటు చేస్తుంటారు. అయితే గతంలో బాత్ హౌస్‌లకు వినోదం కోసం వెళ్తే ప్రస్తుతం నీటి కొరత కారణంగా రావాల్సి వస్తుందని అక్కడి ప్రజలు అంటున్నారు.