వంట నూనెల ధరల్లో భారీ తగ్గుదల: కేంద్రం
Andhra Pradesh Telugu | Suryaa Desk | Published : Thu, Dec 30, 2021, 09:00 PM
దిగుమతి సుంకాలను తగ్గించడంతో వంట నూనెల ధరలు నిలకడగా తగ్గుముఖం పడుతున్నాయని కేంద్ర ఆహారం, ప్రజా పంపిణీ శాఖ కార్యదర్శి సుధాంశు పాండే చెప్పారు. రబీ సీజన్లో ఆవాల పంట మెరుగ్గా ఉంటుందని, ఫలితంగా వంట నూనెల ధరలు మరింత తగ్గుతాయని ఆశిస్తున్నట్లు తెలిపారు. బియ్యం, గోధుమల ధరలు అత్యంత స్థిరంగా ఉన్నాయని, పప్పు దినుసుల ధరలు నిలకడగా ఉన్నాయని చెప్పారు. కూరగాయలు, ముఖ్యంగా ఉల్లిపాయలు, బంగాళా దుంపలు, టమాటా రిటెయిల్ ధరలు కూడా తగ్గుముఖం పట్టినట్లు తెలిపారు. ప్రతి కుటుంబానికి అవసరమైన కూరగాయల ధరల్లో పెరుగుదల చెప్పుకోదగ్గ స్థాయిలో ఉండబోదని సంకేతాలు వస్తున్నాయని చెప్పారు. మన దేశ వినియోగదారులకు అవసరమైన వంట నూనెలో 60 శాతం వంట నూనె కోసం దిగుమతులపై ఆధారపడవలసి వచ్చినపుడు సహజంగానే అంతర్జాతీయ ధరల ప్రభావం పడుతుందని చెప్పారు. వంట నూనెల దిగుమతిపై సుంకాన్ని శూన్య (సున్నా) స్థితికి తగ్గించినట్లు తెలిపారు. దీనివల్ల వంట నూనెల రిటెయిల్ ధరలు చెప్పుకోదగ్గ స్థాయిలో తగ్గినట్లు తెలిపారు.
|
|