హామీలకు కాదేది అనర్హం... మగాళ్ళ కోసం ప్రత్యేక మంత్రిత్వ శాఖ

ఉత్తరప్రదేశ్ రాష్ట్ర ఎన్నికలు ఇప్పుడు జాతీయ రాజకీయాలను ఆకర్షిస్తున్నాయి. ఈ ఎన్నికల్లో గెలుపు కోసం ఒక్కో పార్టీ ఒక్కో రకమైన హామీలను గుప్పిస్తోంది. ఎన్నికలు వస్తే చాలు… ఏ పార్టీ అయిన సరే ఇవ్వని హామీ అంటూ ఉండదు. ఎలాగైనా ఓట్లు దక్కించుకోవడానికి ప్రజలపై వరాలు జల్లు కురిపిస్తారు. సాధ్యం కానీ వాగ్దానాలు చేస్తారు. అందులో చాలా విచిత్రమైన హామీలు కూడా ఉంటాయి. అలా యూపీలో ఓ పార్టీ మగవాళ్ల కోసం ఓ మంత్రిత్వ శాఖను పెడతానని హామీ ఇచ్చింది. ఉత్తర్ ప్రదేశ్‌లో త్వరలో ఎన్నికలు జరగనున్నాయి. ఏడు దశల్లో ఇక్కడ పోలింగ్ జరగనుంది. అయితే ఇక్కడ పోటీ చేస్తోన్న మేరా అధికార్ రాష్ట్రీయ దళ్ (మర్ధ్) ప్రజలకు పలు రకాల హామీలు ఇచ్చింది. ఇందులో భాగంగా తమ పార్టీ అధికారంలోకి వస్తే పురుషుల సంక్షేమం కోసం ఓ మంత్రిత్వ శాఖను ఏర్పాటు చేస్తామని, దాంతో పాటు జాతీయ పురుష కమిషన్ కూడా ఏర్పాటు చేస్తామని హామీ ఇచ్చింది. మర్ధ్ అంటే హిందీలో పురుషుడు అని అర్థం. ఈ పార్టీ ప్రస్తుతం బరేలి, లక్నో నార్త్, హందియా, చౌరీ చౌరా స్థానాల నుంచి పోటీ చేసే అభ్యర్థుల పేర్లను ప్రకటించింది. ఈ సందర్భంగా జాతీయ పురుష కమిషన్ ఏర్పాటు చేస్తే విధాన నిర్ణయాల్లో పురుషుల సమస్యలను పరిగణలోకి తీసుకునే వెసులుబాటు ఉంటుందని ఆ పార్టీ జాతీయ అధ్యక్షుడు కపిల్ మోహన్ ఛౌదరి అన్నారు. అంతేకాదు ఆ పార్టీ మేనిఫెస్టోలో పురుషుల ఉన్నతి, భద్రత, ప్రతిష్ట కోసం చాలా హామీలను పొందుపరుస్తామని కపిల్ మోహన్ ఛౌదరి చెప్పారు. మగవాళ్ల భద్రత చట్టం, మగవాళ్ల కోసం హెల్ప్ లైన్ కూడా ఏర్పాటు చేస్తామని చెప్పుకొచ్చారు. పైగా మహిళల అభివృద్ధికి తాము అడ్డుకాదని, అయితే పురుషులు కూడా వేధింపులకు గురవుతున్నారని అన్నారు. పురుషుల హక్కులు, వారి సమస్యల పట్ల సానుభూతి అవసరమని అన్నారు.