ఒళ్లుగగుర్పొడిచే ఘటన.. భార్య, కూతురు గొంతుకోసిన వ్యక్తి
national | Suryaa Desk | Published : Tue, Feb 08, 2022, 07:02 PM
ముంబైలో దారుణ ఘటన జరిగింది. కుటుంబ కలహాలతో జీవిత భాగస్వామిని, కన్న కుమార్తెను ఓ కిరాతకుడు గొంతుకోసి చంపేశాడు. అనారోగ్యంతో బాధపడుతున్న వారిద్దరికీ సేవ చేయలేక, ఈ అమానుష ఘటనకు పాల్పడ్డట్టు పోలీసులకు వెల్లడించాడు. ఒళ్లుగగుర్పొడిచే ఈ ఘటన వివరాలిలా ఉన్నాయి.
ముంబైలోని అంధేరీ ప్రాంతం షేర్-ఈ పంజాబ్ కాలనీలో మాజీ ఆర్మీ ఆఫీసర్ పురుషోత్తమ్ సింగ్ గంఢోక్(89) తన భార్య జస్భీర్ కౌర్ గంఢోక్(81), దివ్యాంగురాలైన కుమార్తె కమలాజిత్ కౌర్తో కలిసి జీవిస్తున్నాడు. కొన్నేళ్లుగా ఆయన భార్య, కుమార్తె అనారోగ్య సమస్యలతో ఇబ్బంది పడుతున్నారు. వారిద్దరికీ పురుషోత్తమ్ సింగ్ సేవలు చేస్తూ వస్తున్నాడు. వారికి సేవలు చేయడం భారంగా భావించాడు. ఈ క్రమంలో ఆదివారం రాత్రి వారిద్దరినీ కత్తితో గొంతు కోసి హత్య చేశాడు. అనంతరం ఏం చేయాలో తెలియక లోపలి నుంచి తాళం వేసుకుని ఆ రాత్రంతా గడిపాడు. చివరికి సోమవారం ఉదయమే తన మరో కుమార్తెకు ఫోన్ చేసి విషయం చెప్పాడు. దాంతో హుటాహుటిన ఆమె అక్కడకు చేరుకుంది. తలుపు తెరవాలని ఎంత అడిగినా ఆమె తండ్రి నిరాకరించాడు. చివరికి పోలీసులు రావడంతో తలుపులు తీయక తప్పలేదు. పోలీసులు నిందితుడిని అరెస్టు చేసి, మృతదేహాలను పోస్టుమార్టం నిమిత్తం ఆసుపత్రికి తరలించారు.
|
|