ఆ బీజేపీ ఎమ్మెల్యే నా బిడ్డకు తండ్రి...పోలీసులకు ఫిర్యాదు చేసిన మహిళా

బీజేపీకి చెందిన ఎమ్మెల్యే తన కడుపులోని బిడ్డకు తండ్రి అని ఓ మహిళా పోలీస్ స్టేషన్ ఎక్కింది. రాజకీయాల్లో ఉన్నవారు వివాదాల్లో చిక్కుకోవడం సర్వ సాధారణం. తరుచూ ఏదో ఒక వివాదంలో ఇరుక్కుని వార్తల్లో నిలుస్తారు. తాజాగా, కర్ణాటకకు చెందిన బీజేపీ ఎమ్మెల్యే సైతం ఇలాగే ఓ వివాదంలో చిక్కుకున్నారు. ఆయనపై ఓ మహిళ సంచలన ఆరోపణలు చేసింది. ఎమ్మెల్యే రాజకుమార్ పాటిల్ తెల్కూర్ తన కడుపులో పెరుగుతున్న బిడ్డకు తండ్రని పోలీసులకు ఫిర్యాదు చేయడం కర్ణాటకలో సంచలనంగా మారింది. అయితే, ఆమె ఆరోపణలను ఎమ్మెల్యే కొట్టిపారేశారు. ఇందులో ఏ మాత్రం నిజం లేదని తప్పుడు ఆరోపణలు చేస్తోందని ఆయన పేర్కొన్నారు. ఆమెతో తనకు 2009లో పరిచయమైందని, 2013లో ఒకసారి తనను కలిసి భూవివాదాన్ని పరిష్కరించాలని కోరిందన్నారు. ఆ తర్వాత తన కుమారుడు చదువు కోసం సాయం చేయాలని కోరితే.. అందుకు చేస్తానని మాట ఇచ్చినట్లు తెలిపారు. ఇంత కంటే ఆమెతో తనకు ఎటువంటి సంబంధం లేదని ఎమ్మెల్యే రాజ్‌కుమార్ ఉద్ఘాటించారు. ఆమె ఇలా బెదిరించడం ఇది మొదటిసారి కాదని, గతంలో సోషల్ మీడియాలో తప్పుడు ప్రచారం చేసిందన్నారు. పోలీసులకు ఫిర్యాదు చేయకుండా ఉండాలంటే తనకు కొంత డబ్బు ఇవ్వాలని డిమాండ్ చేసిందని తెలిపారు. ఆ పాచిక పారకపోవడంతో ఇప్పుడు తన బిడ్డకు నేను తండ్రినంటూ నిందలు వేస్తుందని మండిపడ్డారు. తన రాజకీయ వ్యతిరేకులతో చేతులు కలిపి వారి ప్రోద్బలంతో ఇలాంటి బెదిరింపులకు పాల్పడుతోందని ఎదురుదాడి చేశారు. తనను బ్లాక్ మెయిల్ చేస్తోందని ఎమ్మెల్యే రాజ్‌కుమార్ ఫిర్యాదు చేయడంతో పోలీసులు ఆమెను అదుపులోకి తీసుకుని 12 గంటల పాటు విచారించారు. అయితే, బాధిత మహిళ వాదన మాత్రం మరోలా ఉంది. తనకు పుట్టిన తన బిడ్డను చూసుకోవడం లేదంటూ సోమవారం పోలీసు కమిషనర్ కార్యాలయంలో ఫిర్యాదు చేసింది. ‘‘నేను పదో తరగతిలో ఉండగా 16 ఏళ్లప్పుడు నన్ను ఫాలో అయి సంబంధం పెట్టుకోవాలని బలవంతం చేశాడు.. మా నాన్న నాకు వేరే వ్యక్తితో పెళ్లి చేశారు.. ఆ తర్వాత మేం బెంగళూరుకు వచ్చేశాం.. అయినా కూడా రాజ్‌కుమార్ తెల్కూర్ మా ఇంటికి వస్తూ కోరిక తీర్చమనేవాడు.. మా మధ్య అక్రమ సంబంధం ఉందని నా భర్తకు చెబుతానని బ్లాక్‌మెయిల్ చేసి లొంగదీసుకున్నాడు.. తన లైంగిక వాంఛలను తీర్చుకోడానికి పదేపదే ఇలా చేశాడు.. అతడి వల్ల నేను ఓ బిడ్డకు జన్మనిచ్చాను.. అదే కారణంతో నా భర్త నాకు విడాకులు ఇచ్చాడు’’ అని ఆరోపించింది. ‘‘ఈ ఏడాది ఫిబ్రవరి 6న పోలీసులు ఎటువంటి నోటీసులు లేకుండా నా ఇంటిలోకి చొరబడి, ఎత్తుకెళ్లారు.. మీడియా ముందు ఆయనతో ఎటువంటి సంబంధం లేదని ఒప్పుకోమని ఒత్తిడి చేశారు.. అయితే దీనికి నేను అంగీకరించలేదు.. నా 14 ఏళ్ల బిడ్డకు ఎమ్మెల్యే రాజ్‌కుమార్ పాటిల్ తండ్రి.. నా జీవితాన్ని నాశనం చేసినందుకు అతడిపై ఎఫ్‌ఐఆర్ నమోదు చేయాలని అభ్యర్థిస్తున్నాను’’ అని కమిషనర్‌కు చేసిన ఫిర్యాదులో కోరింది.