మళ్లీ వణికిస్తున్న మంకీ ఫీవర్...ఎక్కడంటే

మన దేశానికి మంకీ ఫీవర్ రూపంలో మరోసారి ప్రమాదం ముంచుకొస్తోందా అంటే అవుననే అంటున్నారు నిపుణులు. దేశంలో మంకీ ఫీవర్ మరోసారి భయపెడుతోంది. గత నెల కర్ణాటకలో ఓ కేసు నమోదుకాగా.. తాజాగా కేరళ వయనాడ్ జిల్లాలోని పనవళ్లీ గిరిజన ప్రాంతంలో 24 ఏళ్ల యువకుడి దీని బారినపడ్డాడు. జ్వరంతో ఆస్పత్రిలో చేరిన ఆ యువకుడికి మంకీ ఫీవర్ లక్షణాలున్న వైద్యులు అనుమానించారు. దీంతో అతడికి నిర్వహించిన పరీక్షల్లో మంకీ ఫీవర్ అని తేలింది. మనంతవాడీ వైద్య కళాశాలలో బాధితుడికి చికిత్స అందిస్తున్నట్లు అధికారులు తెలిపారు. ప్రస్తుతం అతడి ఆరోగ్యం నిలకడగా ఉన్నట్లు చెప్పారు. ఈ ఏడాది కేరళలో నమోదయిన తొలి మంకీ ఫీవర్ కేసు ఇదే. దీంతో అధికారులు అప్రమత్తమయ్యారు. ప్రజలు తగిన జాగ్రత్తలు తీసుకోవాలని సూచించారు. మంకీ ఫీవర్ దక్షిణాసియాలో కోతుల ద్వారా మనుషులకు సోకిన వైరల్ జబ్బు. ఫ్లావివిరిడే కుటుంబానికి చెందిన వైరస్ వల్ల ఈ వ్యాధి వ్యాపిస్తుంది. అధిక జ్వరం, ఒళ్లు నొప్పులతో దాదాపుగా డెంగీ లక్షణాలను కలిగి ఉంటుంది. దీని కారణంగా 5 నుంచి 10 శాతం మరణాలు సంభవిస్తాయి. ఇదిలావుంటే ఈ ఏడాది తొలి కేసు.. కర్ణాటకలోని శివమొగ్గ జిల్లాలో బయటపడింది. గత నెల తీర్థహళ్లి మండలంలో ఓ మహిళకు(57) మంకీ ఫీవర్ నిర్ధారణ అయినట్టు వైద్యులు తెలిపారు. రెండేళ్ల క్రితం శివమొగ్గ జిల్లా సాగర్ మండలంలోని అరళగోడు గ్రామంలో మంకీ ఫీవర్తో 26 మంది మరణించారు. ఆ తర్వాత ఇలాంటి కేసులు వెలుగులోకి రాలేదు. వాతావరణంలో మార్పుల వల్లే మంకీ ఫీవర్ వ్యాప్తి చెందుతున్నట్టు పరిశోధనల్లో వెల్లడయ్యింది. ఇక, ఆరు దశాబ్దాల కిందట శివమొగ్గ జిల్లాలోని క్యాసనూర్ గ్రామంలో ఎల్లో ఫీవర్ మాదిరిగా అంతుబట్టని వైరస్‌ ప్రబలి భారీగా ప్రాణనష్టం సంభవించడంతో దీనిపై పరిశోధనలకు అమెరికాకు చెందిన స్వచ్ఛంద సంస్థ రాక్‌ఫెల్లర్ ఫౌండేషన్ ల్యాబొరేటరీలను 1950వ దశకంలో నెలకొల్పింది. ఇందుకోసం భారీగా నిధులను వెచ్చించింది. కొత్త వైరస్‌ పుట్టుక, మానవులకు ఎలా వ్యాప్తి చెందుతుంది అనేది తెలుసుకోడానికి సాగర్‌లో ల్యాబ్, ఫీల్డ్ స్టేషన్ ఏర్పాటుచేసింది. రష్యాలోని సైబీరియాలో గుర్తించిన పేను వంటి పురుగు కాటు ద్వారా వ్యాపించిన ఓమ్స్క్ హెమరేజిక్ ఫీవర్‌కు కారణమమైన వైరస్‌కు.. దీనికి మధ్య పోలికలున్నట్టు ల్యాబ్‌ ధ్రువీకరించింది. ఇది పేలు ద్వారా కూడా సంక్రమించినట్లు కనుగొన్నారు. ఈ కొత్త వ్యాధి దాదాపు 7,000 కి.మీ దూరంలో ఉన్న రష్యా నుంచి వచ్చిందా? వలస పక్షుల వల్ల వ్యాప్తి చెందిందా? అని ముమ్మర పరిశోధనలు చేసి చివరకు మంకీ ఫీవర్‌గా గుర్తించారు.