ఆధార్ ఎంతో విలువైంది...వాటి సంబంధిత అంశాలపై అప్రమత్తంగా ఉండాలి

ఆధార్ కు సంబంధిత అంశాలపై మనం ఎపుడూ అప్రమత్తంగా ఉండాలి. ఆధార్ కార్డు గురించి ప్రత్యేకంగా చెప్పాల్సిన పని లేదు. చాలా ముఖ్యమైన డాక్యుమెంట్లలో ఇది కూడా ఒకటి. మీరు పాన్ కార్డు పొందాలన్నా, రేషన్ కార్డు కోసం అప్లై చేసుకోవాలన్నా.. కచ్చితంగా ఆధార్ కార్డు ఉండాల్సిందే. ఇంకా మొబైల్ సిమ్ కార్డు, బ్యాంక్ అకౌంట్ ఓపెనింగ్ ఇలా చాలా వాటికి ఆధార్ కార్డు అవసరం అవుతుంది. అందుకే ఆధార్ కార్డుకు అధిక ప్రాధాన్యం ఉంటుంది. ఆధార్ కార్డు కలిగిన వారు అందులో వివరాలు కూడా కరెక్ట్‌గా ఉండేలా చూసుకోవాలి. లేదంటే ఇబ్బందులు పడాల్సి వస్తుంది. ఆధార్‌లో వివరాలు సరిగా లేకపోతే పాన్ ఆధార్ లింక్, డ్రైవింగ్ లైసెన్స్ ఆధార్ లింక్ ఇలా చాలా వాటికి సమస్యలు ఎదుర్కోవలసి వస్తుంది. అంతేకాకుండా ఆధార్ కార్డుతో లింక్ అయిన మొబైల్ నెంబర్‌ కూడా మీరు మీ ఫోన్‌లో వాడుతూ ఉండాలి. లేదంటే అప్పుడు కూడా ఇబ్బందులు తప్పవు. ఓటీపీ రాకపోవడం వల్ల సమస్యలు ఎదురవుతాయి. మీరు మొబైల్ నెంబర్ మార్చినా.. లేదంటే పోగొట్టుకున్నా.. కొత్త నెంబర్‌ వాడేటప్పుడు.. ఆ నెంబర్‌ను ఆధార్ కార్డులో కూడా అప్‌డేట్ చేసుకోవాలి. అప్పుడు ఎలాంటి ఆటంకాలు లేకుండా పనులు అన్నీ పూర్తి అవుతాయి. ఒకవేళ మీరు మీ ఆధార్ మొబైల్ నెంబర్ అప్‌డేట్ చేసుకోవాలని భావిస్తే.. దగ్గరిలోని ఆధార్ కేంద్రం వద్దకు వెళ్లి మొబైల్ నెంబర్‌‌ను అప్‌డేట్ చేసుకోవాల్సి ఉంటుంది. ఆధార్ కార్డును ఆన్‌లైన్‌లో అప్‌డేట్ చేసుకోవడం కుదరదు. అందువల్ల ఆధార్ సెంటర్‌కు వెళ్లాల్సిందే. అయితే మీరు ఆధార్ సెంటర్‌కు వెళ్లే ముందు ఆన్‌లైన్‌‌లో ఒకపని పూర్తి చేయాలి. అపాయింట్‌మెంట్ తీసుకోవాలి. యూఐడీఏఐ వెబ్‌సైట్‌లోకి వెళ్లి అపాయింట్‌మెంట్ తీసుకోవచ్చు. మీరు ఏ రోజు ఏ టైమ్‌కు వెళ్లాలో స్లాట్ బుక్ చేసుకోవాలి. ఆ టైమ్‌కు వెళ్లి పని పూర్తి చేసుకోవచ్చు. దీని కోసం మీరు ఆధార్ సెంటర్‌లో వేచి ఉండాల్సిన పని లేదు. మీరు ఈ లింక్ https://appointments.uidai.gov.in/bookappointment.aspx ద్వారా అపాయింట్‌మెంట్ బుక్ చేసుకోవచ్చు. ఇకపోతే మీకు మరో ఆప్షన్ కూడా ఉపయోగించుకోవచ్చు. పోస్ట్‌మ్యాన్ కూడా ఆధార్ మొబైల్ నెంబర్ అప్‌డేట్ చేయొచ్చు. అందువల్ల మీరు మీ ఏరియాలోని పోస్ట్‌మ్యాన్ సాయంతో కూడా ఆధార్ కార్డులో మొబైల్ నెంబర్‌ అప్‌డేట్ చేసుకోవచ్చు. ఇకపోతే ఆధార్ మొబైల్ నెంబర్ కోసం రూ.50 చార్జీ చెల్లించుకోవాల్సి వస్తుంది.