నేడు రెండో రోజు వేలం..

ఐపీఎల్ -2022 మెగా వేలం మొదటి రోజు జోరుగా సాగింది. మొత్తం 10 ఫ్రాంచైజీలు ఆటగాళ్ల కోసం పోటీ పడ్డాయి. మొదటి రోజు ఇషాన్ కిషన్ రూ.15.25 కోట్లతో అత్యంత ఖరీదైన ఆటగాడిగా నిలిచాడు. అవేష్ ఖాన్ రూ.10 కోట్లతో అత్యంత ఖరీదైన అన్‌క్యాప్డ్ ప్లేయర్‌గా నిలిచాడు. అయితే ఆదివారం రెండోరోజు వేలం జరగనుంది.శనివారం మాదిరిగానే ఆదివారం కూడా మధ్యాహ్నం 12 గంటలకు వేలం ప్రారంభం కానుంది. ముందుగా అన్ని ఫ్రాంచైజీలు తమకు నచ్చిన 20 మంది ఆటగాళ్ల జాబితాను ఉదయం 9 గంటలలోపు ఐపీఎల్ ముందు సమర్పించాలి. ఈ ఆటగాళ్లని ప్రత్యేకంగా వేలంలో చేర్చుతారు. మొదటి రోజు వేలంలో అమ్ముడుపోని ఆటగాళ్లను కూడా చేర్చుకోవచ్చు. ఆదివారం వేలం ప్రారంభమైనప్పుడు 98 నుంచి 161 వరకు ఉన్న ఆటగాళ్లను ముందుగా బిడ్ చేస్తారు. వాటి వేలం సాధారణ పద్ధతిలో జరుగుతుంది. అంటే జట్లకు ఆలోచించి వేలం వేయడానికి మరికొంత సమయం ఉంటుంది. తరువాత 162 నుంచి 600 నంబర్ల మధ్య ఉన్న ఆటగాళ్లను వేగవంతమైన వేలం వేస్తారు. అంటే ఫ్రాంచైజీలు ఎంపిక చేసిన ఆటగాళ్లు మాత్రమే వేలంలో ఉంటారు.

రెండో రోజు వేలంలో ఉన్న ప్రధాన ఆటగాళ్లు వీరే..

అజింక్యా రహానే, ఇషాంత్ శర్మ, జయదేవ్ ఉనద్కత్, చేతన్ సకారియా, కేదార్ జాదవ్, శివమ్ దూబే, మార్నస్ లాబుస్‌చాగ్నే, రాసి వాన్ డెర్ డ్యూసెన్, తబ్రేజ్ షమ్సీ, జేమ్స్ నీషమ్, టిమ్ సౌతీ, పాల్ స్టిర్లింగ్, మార్టిన్ గప్టిల్, ఓడియన్ స్మిత్‌ లు ఉన్నారు. వీరితో పాటు భారత అండర్-19 ప్రపంచకప్ విజేత జట్టు కెప్టెన్ యశ్ ధుల్, రాజ్ అంగద్ బావా వంటి యువ ఆటగాళ్లు కూడా ఉన్నారు. మరి ఏ జట్టు ఏ ఆటగాడిని ఎంత ధరకు కొనుగోలు చేస్తుందో తెలుసుకోవాలంటే మరికొన్ని గంటలు వేచి చూడాలి.