బిట్ కాయిన్ కు పెరుగుతున్న ఆదరణ...అక్కడే ఇన్వేస్ట్ చేస్తోంది ఎక్కువ

బిట్ కాయిన్ కు రోజురోజుకు చాలా ఆదరణ పెరుగుతోంది. క్రిప్టో కరెన్సీల్లో బిట్ కాయిన్ చాలా పాపులర్. దీని గురించి చాలా మందికి తెలిసే ఉంటుంది. పలు ప్రపంచ దేశాలు క్రిప్టో కరెన్సీని నిషేధిస్తున్నాయి. మన దేశంలో కూడా రిజర్వు బ్యాంక్ ఆఫ్ ఇండియా ఈ బిట్ కాయిన్‌పై నిషేధం విధించింది. అయితే సుప్రీం జోక్యంతో ఈ నిషేధాన్ని ఎత్తివేసింది. ఇప్పటికీ కూడా ఆర్‌బీఐ క్రిప్టో విషయంలో సానుకూలముగా లేదు. అయినా కూడా చాలా మంది బిట్ కాయిన్‌లో డబ్బులు పెడుతున్నారు. ప్రపంచ వ్యాప్తంగా కూడా ఇదే ట్రెండ్ కొనసాగుతోంది. అందుకే బిట్ కాయిన్.. బంగారం మార్కెట్‌ షేర్‌ను కొల్లగొడుతోంది. రానున్న కాలంలోనూ అంటే 2022లో కూడా ఇదే ట్రెండ్ కొనసాగవచ్చని గోల్డ్ మన్ శాక్స్ గ్రూప్ పేర్కొంటోంది. డిజిటల్ అసెట్స్‌కు ఆదరణ పెరిగిపోతుండటం ఇందుకు ప్రధాన కారణమని తెలియజేసింది. బిట్ కాయిన్ ధర లక్ష డాలర్లకు చేరొచ్చని అంచనా వేస్తోంది. గోల్డ్‌మన్ శాక్స్ ప్రకారం.. బిట్ కాయిన్ ఫ్లోట్ అడ్జస్టెడ్ మార్కెట్ క్యాపిటలైజేషన్ దాదాపు 700 బిలియన్ డాలర్లుగా ఉండొచ్చు. స్టోర్ ఆఫ్ మార్కెట్ వాల్యూలో దీని వాటా దాదాపు 20 శాతంగా ఉండొచ్చు. అదేసమయంలో బంగారంలో ఇన్వెస్ట్‌మెంట్ల విలువ 2.6 ట్రిలియన్ డాలర్లుగా ఉంది. బిట్ కాయిన్ స్టోర్ ఆఫ్ వాల్యూ మార్కెట్ వచ్చే ఐదేళ్ల కాలంలో 50 శాతానికి చేరితే.. అప్పుడు బిట్ కాయిన్ ధర లక్ష డాలర్ల పైకి చేరొచ్చని గ్లోబల్ ఫాక్స్ అండ్ ఈఎం స్ట్రాటజీ కోహెడ్ జంక్ పాండెల్ తెలిపారు. న్యూయార్‌లో బిట్ కాయిన్ ధర 46 వేల డాలర్ల వద్ద కదలాడుతోంది. గత ఏడాది బిట్ కాయిన్ రేటు 60 శాతం ర్యాలీ చేసింది. మార్కెట్ వ్యాల్యూ పరంగా చూస్తే అతిపెద్ద క్రిప్టో కరెన్సీగా కొనసాగుతున్న బిట్ కాయిన్ గత నవంబర్ నెలలో ఏకంగా 69 వేల డాలర్లకు ఎగసింది. 2016 నుంచి బిట్ కాయిన్ ఏకంగా 4700 శాతం పరుగులు పెట్టింది. బిట్ కాయిన్ దీర్ఘకాల డిజిటల్ గోల్డ్‌గా చాలా మంది అభివర్ణిస్తున్నారు. అయితే బంగారానికి, బిట్ కాయిన్‌కు ఒక పోలిక ఉంది. రెండింటిలోనూ డివిడెంట్లు, వడ్డీ వంటివి రావు. సాంప్రదాయ ఇన్వెస్ట్‌మెంట్ సాధనాలతో పోలిస్తే బిట్ కాయిన్ భిన్నంగా ఉంటుంది. కాగా బిట్ కాయిన్ వంటి క్రిప్టో కరెన్సీలో డబ్బులు పెట్టడం రిస్క్‌తో కూడుకున్న వ్యవహారం. అందువల్ల జాగ్రత్తగా ఉండాలి. ఎందుకంటే వీటికి చట్టబద్దత లేదు.